2 Ioane 1 - Tokelauan New Testament

¹ Mai te Toeaina — Ki te Fafine pele ma tana fānau, e alofa lahi au ki ei. Ma e hē nā ko au oioti, kae ko ki lātou uma e iloa te meamoni, e alolofa atu ki a te koutou,

² auā ko te meamoni tēnei e tūmau i loto ia te ki mātou ma ka i ei pea ia te ki mātou ke pa ki te hēgata.

³ Ke ia te ki tātou te alofa tūnoa, te agalelei ma te fīlēmū mai te Atua te Tamana ma Iehu Keliho te Ataliki o te Tamana; ke kavea nā mea iēnei mo ki tātou, e ala i te meamoni ma te alofa.

Ko te Meamoni ma te Alofa

⁴ Kai te lahi o toku fiafia i te kō iloaga ko iētahi o fānau a koutou e mulimuli ki te meamoni, e vē lava oi fakatonu mai ai ki tātou e te Tamana.

⁵ Ma ko au la e lea atu vēnei ki a te koe te Māfine pele: ko ki tātou uma e tatau ke alofa tētahi ki tētahi. E hē ko he fakatonuga fou tēnei kua tuhi atu ai au; ko te fakatonuga na tuku mai lava ki a te ki tātou mai te kāmataga.

⁶ Ko te uiga o te alofa e lea atu ai au, ko ki tātou e tatau ke ola uhitaki ki nā mea e fakatonu mai e te Atua. Ko te fakatonuga la e vē ona fakalogo koutou ki ei mai te kāmataga, e lea mai ko ki tātou uma e tatau ke ola i te alofa.

⁷ Kua tokalahi ia tagata fakahehē kua olo ki itū uma o te lalolagi, ni tino e hē talitonu ko Iehu Keliho na hau ko he tagata ola. Ko nā tino vēnā e tau fakahehē ma e teteke ki a Keliho.

⁸ Koutou la ke mataala, kae ke nahe kave kehea ai te aogā o nā gāluega nae fai e ki mātou ma ka maua ai he koutou taui kātoatoa.

⁹ Ko ai lava e hē tūmau i nā akoakoga a Keliho, kae fakaopoopo e ia ni mea ki ei, e hē ia te ia te Atua. Ko ai lava e tūmau i nā akoakoga, e ia te ia te Tamana vēnā ma te Ataliki.

¹⁰ Ko te mea ia, kāfai ni tino e oatu ki a te koutou kae hē ia te ki lātou te akoakoga tēnei, nahe koutou taliagia ki loto o outou fale; nahe koutou lea foki vē, “Ke ia te koutou te fīlēmū.”

¹¹ Auā ko ai lava e fakafeiloakia ni tino vēnei, kua kavea ia ma o lātou hoa, i nā mea kino a ki lātou e fai.

Nā toe Kupu

¹² E lahi lele nā mea e fia lea atu ai au ki a te koutou, kae ko au e hē fofou ke tuhi i he pepa ma he peni; ko au e fia fanatu oi kikila koutou ma ke talanoa fakatahi ai ki tātou, kae ke kātoatoa ai to tātou fiafia.

¹³ E fakafeiloaki atu nā fānau a te koutou Tuafafine pele ki a te koutou.