1 Timoteo 5 - Tokelauan New Testament

Tiute ki nā tino kua Talitonu

¹ Nahe munaia e koe he tamāloa kua matua, kae apoapoaki ki ei e vē ko he tamana ki a te koe. Ke vē nā tamāloa talavou ni uho ki a te koe i au faiga e fai ki ei,

² ko fafine mātutua ke vē ni mātua, ma fafine talavou ke vē ni tuafafine, ma tō loto mamā kātoatoa.

³ Āva ki nā fafine kua oti a lātou tāne e nonofo nā ko ki lātou.

⁴ Kae kāfai he fafine kua oti tana tāne kae e i ei hana fānau pe ni ona mokupuna, e tatau ke fakatino muamua e ki lātou o lātou tiute faka-Kelihiano ki o lātou lava kāiga. I te faiga tēnei, ka toe totogi ai e ki lātou o lātou mātua ma o lātou tupuna, auā ko te mea ia e fofou ki ei te Atua.

⁵ Ko he fafine kua oti tana āvaga e nofo tautahi ma hēai he tino e ia tauhiagia, kua tukutahi tona fakamoemoe ki te Atua, ma e tatalo pea lava i te ao ma te pō, mo he fehoahoani.

⁶ Kae ko he fafine kua oti tana āvaga kae e fano oioti tona māfaufau ki nā mea fakafiafia o te ōlaga, kua oti, e ui lava koi ola.

⁷ Fakatonu ki ei te mea tēnei, kae ke nahe i ei he tino o ki lātou e i ei hona hehē.

⁸ Kae kāfai he tino e hē ia tauhia lelei ona kāiga, kae maihe lava ona tōtino moni, ko tona uiga kua teteke e ia te talitonuga, ma e hili atu te kino o ia i lo nā tino e hēki talitonu.

⁹ Nahe tuhia te igoa o he fafine kua oti tana āvaga ki te lihi o nā fafine kua oti a lātou āvaga, vaganā kua hili atu ona tauhaga i te onohefulu. E hē gata i tēnā, e tatau ko he fafine na fakaipoipo fakafokotahi oioti,

¹⁰ ma e tatau ke i ei he fakamāoniga o ana gāluega lelei nae fai: he fafine nae tauhi lelei ki tana fānau, nae talia e ia ni tino kehe ki tona fale, nae faia ni gāluega ma te loto maulalo mo iētahi tagata Kelihiano, nae fehoahoani ki nā tino puapuagātia, ma nae tuku tahi tona loto ki te faiga o nā gāluega e lelei.

¹¹ Kae nahe tuhia ki te lihi nā igoa o nā fafine talavou kua oti a lātou tāne; auā kāfai nā tuinanauga o ki lātou e fai ma mea ka fia fakaipoipo ai, oi ka liliu kehe ai ki lātou mai ia Keliho,

¹² ma ka fakahalagia ai ona kua hē tauhi ki lātou ki te lātou takutinoga na fai muamua ki a te ia.

¹³ E hē gata i tēnā, kua ki lātou iloa foki oi fakamāumau o lātou taimi, i te oatu mai tēia fale ki tēia fale. Kae ko te mea e hili te kino, kua ki lātou iloa oi faitala fakakino ma aiā tauanoa ki nā mea e hēai he lātou fekau ki ei.

¹⁴ Ko au la e fofou ko nā fafine tamaiti kua oti a lātou tāne, ke āvavaga ma fai ni a lātou fānau, ma kikila lelei o lātou kāiga, kae ke nahe i ei ai he avanoa ke fai mai ai ni tala fakakino e nā tino e fili ki a te ki tātou.

¹⁵ Auā ko iētahi fafine kua oti a lātou tāne, kua olo kehe ma kua mulimuli ki a Hātani.

¹⁶ Kae kāfai he fafine Kelihiano e i ei ni fafine kua oti a lātou tāne i tona kāiga, e tatau ke tauhi e ia ki lātou kae nahe tukua ke fai ma kavega ki te ekalehia, kae ke mafai ai e te ekalehia oi tauhi nā fafine kua oti a lātou tāne e nonofo nā ko ki lātou.

¹⁷ Ko nā takitaki toeaina e lelei te faiga o a lātou gāluega, e tatau ke fakaluaina o lātou totogi e maua, kae maihe lava ki lātou e gālulue fītā i te lāuga ma te akoako atu.

¹⁸ Auā e leamai te tuhituhiga paia, “Nahe lokagia te gutu o te povi kāfai e fakaaogā e koe ke holia te haito ke tuku kehekehe ai nā fuāhaito mai nā fuhi haito” ma “Ko nā tino faigāluega e tatau ke maua ni o lātou totogi.”

¹⁹ Nahe taliagia he mōliaga o he takitaki toeaina, heiloga e fakamāonia e ni molimau e toka lua pe hili atu.

²⁰ Tautalagia i mua o te Ekalehia nā tino uma e faia pea lava te agahala, kae ke lagona ai e iētahi tino te mātataku, ma hē fakatakitaki ai ki lātou ki ei.

²¹ I mua o te Atua ma Keliho Iehu, vēnā ma te kau agelu paia, ko au e apoapoaki mālohi atu ko koe ke uhitaki ki nā fakatonuga iēnei, e aunoa ma he fakailoga tino, pe fakapito ki he tino, i nā mea uma e fai e koe.

²² Nahe vavevave oi fakauta ō lima ki luga o nā tino ke fakapaia mo te gāluega a te Aliki, pe kau fakatahi i te agahala a he tino; kae e tatau koe ke mamā i taimi uma.

²³ Nahe kē inu oioti ki te vai, kae inu foki hina uaina taigole ke fehoahoani ki tō manava, auā koe e tauale ho.

²⁴ Ko agahala a nā tahi tino e kitea gōfie, ma ko a lātou agahala e muamua atu ia te ki lātou ki te fakamahinoga; kae ko nā agahala a iētahi tino e fātoā kitea mulimuli.

²⁵ E vēnā foki oi kitea gōfie nā gāluega lelei, ma e pa foki lava ki nā gāluega e hē kitea gōfie, e hē mafai ke mumunia.