1 Timoteo 4 - Tokelauan New Testament

Nā Faiakoga Pepelo

¹ E manino lele te lea mai a te Agaga, e i ei nā tino ka olo kehe mai to lātou talitonuga faka-Kelihiano, i ni taimi mulimuli; ka uhitaki ki lātou ki nā agaga talapepelo, ma mulimuli ki akoakoga a nā tēmoni.

² Ko nā akoakoga vēnā e fakahalalau e nā tino talapepelo fakahehē, kua mamate o lātou lotofuatia, e vē na huhunu i he ukamea kakaha.

³ E akoako e ki lātou ko te fakaipoipo ma te kakai ki ni itūkāigā meakai, e hē ni mea e tatau ke fai. Oi ka ko nā meakai uma iēnei na gaohia e te Atua ke kakai ki ei, kāfai kua uma he tatalo fakafetai, nā tino kua talitonu ma iloagia te meamoni.

⁴ Ko nā mea uma lele na gaohia e te Atua e lelei; e hēai he mea e tiakia, kae ko nā mea uma lele e tatau ke talia ma he tatalo o te fakafetai,

⁵ auā ko te kupu a te Atua ma te tatalo, e talia ai nā mea iēnei e te Atua.

He Kaukauna Lelei e a Keliho Iehu

⁶ Kāfai e tuku atu e koe nā fakatonuga iēnei ki nā tino kua talitonu, ka kavea koe ma kaukauna lelei a Keliho Iehu. Ka fakaalia e koe ko koe kua matua i nā akoakoga e uiga ki to tātou talitonuga ma nā takitakiga kua mulimuli koe ki ei.

⁷ Kae tau mamao ma nā tala fāgogo mai anamua, auā e hē paia ma hēai he aogā. Tokaga oi koleni ke maua e koe he ōlaga e fiafia ki ei te Atua.

⁸ Ko te koleni fakamālohi tino e moni e aogā, kae ko te koleni fakateagaga e tāua atu ia i nā itū uma lele, auā e mautinoa ai te maua o te ola nei, ma i te lumanaki.

⁹ Ko he fakakupuga tēnei e hako lelei lava, ma e tatau ke talia kātoatoa.

¹⁰ Ko ki tātou e fītatā auā ko ki tātou kua fakamoemoe tahi ki te Atua e ola pea, te Fakaola o tagata uma, kae maihe ki lātou kua talitonu.

¹¹ Fakatonu ma akoako ki ei nā mea iēnei.

¹² Nahe i ei he tino e fakatauemu atu ona ko koe e tamaiti, kae ke kavea koe ma fakatakitakiga ki nā tino kua talitonu, e ala i tau tautala, tau āmio, tō alofa, tō fakatuatua, ma tō mamā kātoatoa.

¹³ Ka ko hēki fanatu au, ke mautinoa e faitau e koe nā Tuhituhiga Paia ki tagata, ma lāuga ma akoako atu ki a te ki lātou.

¹⁴ Fakaaogā te meaalofa fakateagaga kua ia te koe, na tuku atu e ala i nā kupu a te kau pelofeta, ma i te fakaeke atuga o nā lima o te kau toeaina ki ō luga.

¹⁵ Fai nā tiute iēnei o koe ma te fakamāoni, kae ke kitea e tagata uma te tuputupu o koe, i te ōlaga faka-Kelihiano.

¹⁶ Kikila lelei tau āmio ma te faiga o au akoakoga. Fakamālohi oi fai nā mea kua fakatonu atu ai koe e au. Kāfai e fai e koe nā mea iēnei, ka fakaolagia koe e te Atua vēnā ma nā tino e fakalogo atu ki a te koe, e ala i au gāluega.