1 Timoteo 3 - Tokelauan New Testament

Takitaki o te Ekalehia

¹ Ko te fakakupuga tēnei e hako: Kāfai he tino e fofou ke kavea ia ma takitaki o he Ekalehia, ko tona uiga e naunau ke ia faia he gāluega e lelei.

² Ko he takitaki o he Ekalehia e tatau ke nahe i ei hona hehē; e tatau ke fokotahi oioti tana āvaga, ke fai fuafua lelei ona uiga, ke ola pūlea ma āmio mamalu; e tatau ke talia e ia ni tino kehe i tona fale, ma lelei i te akoako atu;

³ e hē ko he tino e fiafia oi inu lahi ma konā, e hē fakahāuā kae e agamalū ma tauhi ki te fīlēmū, e hē mānumanu ki te tupe;

⁴ e tatau ke ia mafaia oi kikila lelei tona kāiga, ma akoako tana fānau ke iloa uhitaki ma fakaaloalo.

⁵ Auā kāfai he tamāloa e hē ia mafai oi kikila lelei tona kāiga, e vēhea ona mafai e ia oi kikila lelei te Ekalehia a te Atua?

⁶ E tatau ko he tino kua matua i te fakatuatua, auā e i nā ka fefete tona loto i te fāfia ma fakahalagia ai, e vē ko te fakahalaga o te Tiāpolo.

⁷ E tatau ko he tino e fakaaloalogia e nā tino e hē i loto o te Ekalehia, kae ke nahe takuvalea ai ia ma pakū ai ki loto o te māilei a te Tiāpolo.

Nā Tiākono

⁸ Ko nā tiākono e tatau foki ni tino e āmio lelei ma e fakamāoni; e hē fiafia inu lahi ki te uaina pe mānumanu ki te tupe;

⁹ e tatau ki lātou ke pipiki mau ki te meamoni kua fakaalia e uiga ki te talitonuga, ma te lotofuatia e mamā.

¹⁰ E tatau ke fakamāonia muamua e ki lātou ki te Ekalehia ko ki lātou ni tino e lelei kātoatoa, oi fātoā mafai ai ke gālulue i nā tofi tiākono.

¹¹ Ko nā āvaga a ki lātou e tatau foki ni tino e āmio lelei ma e hē faitala fakakino; e tatau ke fai fuafua lelei o lātou uiga ma ke fakamāoni i mea uma.

¹² Ko te tiākono e tatau ke fokotahi oioti tana āvaga, ma ia mafaia oi kikila lelei tana fānau ma tona kāiga.

¹³ Ko nā tiākono e lelei te faiga o a lātou gāluega, e taku leleia ma fakaaloalogia, ma ki lātou mafaia oi tautatala mālohi, e uiga ki to lātou fakatuatua ki a Keliho Iehu.

¹⁴ Ko au e fakamoemoe e fanatu i he taimi lata mai, kae kua tuhi atu e au nā mea iēnei mo koe,

¹⁵ nā ia au e tuai atu. Ko te tuhi tēnei e fakailoa atu ai ki a te koe, nā mea e tatau ke havavali ai ki tātou i loto o te kāiga o te Atua, ko te Ekalehia tēnā a te Atua e ola pea lava, ma ko te poutū ma te lagolago o te meamoni.

Ko he Pehe ki a Iehu

¹⁶ Kua iloa uma lele e ki tātou, te uiga kehe o te mealilo e uiga ki to tātou talitonuga: Na hau ia i tona tino tagata, na fakamāonia te hako o ia e te Agaga, ma na kitea ia e agelu. Na tālaki e uiga ki a te ia ki nukukehe, na talitonu ki a te ia te lalolagi, ma na kavake ki te lagi e te Atua.