1 Timoteo 2 - Tokelauan New Testament

Ko nā Tāpuakiga

¹ Ko te mea muamua la, ko au e aioi atu ko koutou ke ole atu ki te Atua mo nā manakoga o tagata uma, ke tatalo mo iētahi tino ma tatalo ma hui o ki lātou, ma ke fakafetai ki te Atua mo tagata uma,

² mo tupu ma ki lātou uma e i ei te pule, kae ke mafai ai ki tātou ke ola i he ōlaga e toka fīlēmū, ma ifo atu ki te Atua ma te agaga fakaaloalo.

³ Ko te mea tēnei e lelei ma e tonu i te kikila te Atua to tātou Fakaola,

⁴ tē e fofou ko tagata uma ke fakaolagia, ma ke ki lātou iloa te meamoni.

⁵ Auā e fokotahi te Atua, ma fokotahi tē e maua ai te hokotaga i te va o te Atua ma tagata, ko Keliho Iehu tēnā,

⁶ na ia ofo atua tona ola, ke fakahaoloto ai ia tagata uma mai te agahala ma te oti. Ko te fakamāoniga tēnā i te taimi tatau, ko te Atua e fofou ke fakaola ia tagata uma.

⁷ Ko te mea ia na tōfia ai au ma apohitolo vēnā ma faiakoga mo tagata nukukehe, ke kō folafola atua te akoakoga moni e uiga ki a Iehu. Ko au e hē pepelo; ko au e lea atu i te meamoni!

⁸ Ko au la e fofou ko tamāloloa ke tatalo i autou tāpuakiga uma lele, nā tamāloa kua ofo atu o lātou tagata mo te Atua ma e mafai ke hiki ake o lātou lima ki luga i te tatalo, e aunoa ma he loto ita pe tauaikupu ma iētahi tino.

⁹ Ko au foki e fofou ko fafine ke loto maulalo ma popoto i te faiga o nā tēuga o ki lātou. E tatau ke fai fakalelei o lātou kofu; nahe fifilia o lātou laulu, pe teuteu i ni aulo pe ni pēnina pe ni kofu taugatā lahi,

¹⁰ kae teteu ia lātou gāluega lelei e vē oi tatau ke fai e fafine, kua ia te ki lātou te fakatuatua faka-Kelihiano.

¹¹ Ko fafine e tatau ke ki lātou maua nā akoakoga e aunoa ma te tautala, ma i te loto maulalo.

¹² E hē fakataga e au ki lātou ke fai ma faiakoga, pe pule ki tamāloloa; e tatau ki lātou ke nahe tautatala.

¹³ Auā ko Atamu te na gaohia muamua, oi hohoko ai ma Eva.

¹⁴ Ma e hē ko Atamu te na fakahehē e te gata, kae ko te fafine te fakahehē ma na ia holia ai te tūlāfono a te Atua.

¹⁵ Kae ka maua e fafine te fakaolataga e ala i te fānau mai e ki lātou o tamaiti, pe kāfai e tūmau pea to lātou fakatuatua, te alofa ma te āmiotonu vēnā ma te loto maulalo.