1 Tehalonia 5 - Tokelauan New Testament

Nofo Hāuni mo te Haele mai o te Aliki

¹ E hē tatau ke tuhi atu au ki a te koutou, te kau uho, e uiga ki nā taimi ma nā aho ka tutupu ai nā mea iēnei.

² Auā kua iloa lelei lava e koutou, ko te Aho o te Aliki ka hau e vē he tino kaihohoa i te pō.

³ Kāfai ia tagata e lea vē, “Ko mea uma kua totoka lelei ma haogalēmū,” kae nā lava e teki kua pakē he mea ma fakatāugā ai ki lātou! E fakafuaheki lele te pa mai e vē ko nā tīgā o he fafine kua fakatīgā i te taimi ka fānau ai, ma ka hēai lele he tino e hao mai ai.

⁴ Kae ko koutou, te kau uho, e hē i loto o te pōuliuli, ma e hē tatau ai ke pa fakafuaheki atu te Aho ki a te koutou, e vē he tino kaihohoa.

⁵ Ko koutou uma lele ni tino e o te mālamalama, ni tino e o te ao. Ko ki tātou e hē ni tino e o te pō, pe o te pōuliuli.

⁶ Ko te mea ia, ko ki tātou e hē tatau ke momoe e vē ko iētahi tino; ko ki tātou e tatau ke āla ma ke hako te māfaufau.

⁷ Auā ko te pō te momoe ai ia tagata; ko te pō te fai konanā ai ki lātou.

⁸ Kae ko ki tātou ni tino e o te ao, ma e tatau o tātou māfaufau ke hako. E tatau ke kokofu ki tātou i te fakatuatua ma te alofa e vē he talipupuni fatafata, ma to tātou fakamoemoe ki te fakaolataga e vē he pūloutau.

⁹ Ko ki tātou e hēki filifilia e te Atua ke pagātia i tona tōkahā, kae na ia filifilia ki tātou ke fai mo ki tātou te fakaolataga, e ala i to tātou Aliki ko Iehu Keliho,

¹⁰ tē na mate mo ki tātou, kae ke nonofo fakatahi ai ki tātou ma ia, e tuha lava pe koi ola pe kua oti ki tātou, i te taimi e hau ai.

¹¹ Ko te mea ia e tatau ai lava koutou ke fakamākeke ma fehoahoani tētahi ki tētahi, e vē lava ko te mea e fai e koutou i te taimi nei.

Nā toe Fakahinoga ma nā toe Kupu

¹² Ko ki mātou e fakatagi atu ki a te koutou, te kau uho, ko koutou ke āva ki nā tino e gālulue mo koutou, ki lātou iēnā e takitakia ma akoakoa koutou i te ōlaga faka-Kelihiano.

¹³ Koutou ke fakaaloalo lahi ma alolofa ki a te ki lātou, ona ko nā gāluega a ki lātou e fai. Ke maua fakatahi e koutou te fīlēmū.

¹⁴ Ko ki mātou e ole atu ki a te koutou, te kau uho, ko koutou ke lapataki mālohi atu ki nā tino e nonofo tauanoa e hēai ni gāluega e faia, fakamākeke atu ki nā tino matamumuli, fehoahoani atu ki nā tino vāivai, ma ke lava te koutou onohai ki tagata tau tokatahi uma.

¹⁵ Kikila ke nahe i ei he tino e ia taui atua te kino i te kino, kae taumafai i taimi uma ke fai nā mea lelei e tētahi ki tētahi, ma vēnā ki tagata uma.

¹⁶ Koutou ke loto fiafia i taimi uma,

¹⁷ tatalo i taimi uma,

¹⁸ ma ke maua i te loto fakafetai i nā mea uma e pa koutou ki ei. Ko tēnei te mea e fofou ki ei te Atua mai ia te koutou, i te koutou ōlaga māfuta fakatahi ma Keliho Iehu.

¹⁹ Nahe koutou tāofiofia te Agaga Paia;

²⁰ nahe koutou inoino ki nā fekau mai te Atua e kui mai i nā tino kua ia tōfia.

²¹ Tuku ia mea uma ki te tofotofoga: tāofi nā mea e lelei,

²² kae kalo kehe mai nā mea kino uma.

²³ Ke fakapaiagia kātoatoa koutou e te Atua e o ia te fīlēmū, ma tauhi ki outou tagata kātoatoa — i te itū ki te agaga, te loto, ma te tino — ke aunoa ma he hehē, kāfai e afio mai to tātou Aliki ko Iehu Keliho.

²⁴ Ko tē e ia kalagagia koutou e fakamāoni, ma ka ia faia te mea tēnei.

²⁵ Tatalo foki mo ki mātou, te kau uho.

²⁶ Fakafeiloaki atu e koutou ki nā tino uma kua talitonu ki te Aliki, i te kihi o te fīlēmū.

²⁷ Ko au e ole atu ki a te koutou i te igoa o te Aliki, ke faitau te tuhi tēnei ki nā tino uma kua talitonu ki a te ia.

²⁸ Ke ia te koutou te alofa tūnoa o to tātou Aliki ko Iehu Keliho.