1 Tehalonia 4 - Tokelauan New Testament

Ōlaga e Fiafia ai te Atua

¹ Ko nā toe kupu la te kau uho, kua uma te iloa e koutou mai ia te ki mātou, te ōlaga e tatau ke ola ai koutou, kae ke fiafia ai te Atua. Ko te ōlaga tonu lava tēnā kua ola ai koutou. Ma i te taimi nei, ko ki mātou e fakatagi ma ole atu i te igoa o te Aliki ko Iehu, ke fakaatili oi hili atu iētahi mea e koutou faia.

² Auā kua iloa e koutou nā fakahinoga na tuku atu e ki mātou ki a te koutou e ala i te igoa o te Aliki ko Iehu.

³ Ko te Atua e fofou, ko koutou ke paia ma ke hē ia te koutou lele nā tuinanauga kino ki te tino.

⁴ Koutou taulelea tau tokatahi uma, e tatau ke iloa oi ola fakatahi ma tana āvaga, i he auala e paia ma mamalu,

⁵ e hē i ni manakoga fakatetino, e vē ko tagata fakapaupau e hē ki lātou iloagia te Atua.

⁶ E tuha ai la ma te matākupu tēnei, nahe i ei lele he tino e faikino pe fakavalea e ia tona uho Kelihiano. Kua uma to mātou lea atu i te mea tēnei, ma ko ki mātou e matuā lapataki atu, ko te Aliki ka ia fakahalagia nā tino e faia nā uiga iēnei.

⁷ E hēki kalagagia ki tātou e te Atua ke ola i nā uiga kino fakatetino, kae ke ola i nā uiga e paia.

⁸ Ko te mea ia, ko ai lava e teteke ki te akoakoga tēnei, e hē ko te tagata te kua ia tetekea, kae ko te Atua tē e ia fōki atua ki a te koutou, tona Agaga Paia.

⁹ E hē tatau ki mātou ke tuhi atu e uiga ki te koutou alolofa ki outou uho Kelihiano. Kua uma lava te akoako atu o koutou e te Atua i te mea tēnei;

¹⁰ ma e moni lava ma fakamāoni, te koutou alolofa ki te kau uho uma lele i Maketonia. Oi ko ki mātou e talohaga atu ki a te koutou o mātou uho, ke haga fakaatili pea lava te koutou alolofa.

¹¹ Fai ma autou hini, te ola i he ōlaga e fīlēmū ma hē piha, ke nahe tautala tauanoa ki mea a iētahi tino, e vē lava oi lea atu ai ki mātou muamua.

¹² Kā koutou faia nā mea tēnei, ka fakaaloalo atu ai foki ki a te koutou nā tino e hē talitonu ki te Atua, ma ka hē toe fakalagolago ai foki koutou ki he tino, e tuha ai ma nā mea e manakomia e koutou.

Ko te Haele mai o te Aliki

¹³ Te kau uho, ko ki mātou e fofou ke iloa e koutou te meamoni e uiga ki nā tino kua oti, kae ke nahe fakanoanoa ai koutou e vē ni tino kua hēai he fakamoemoe.

¹⁴ Ko ki mātou e talitonu ko Iehu na oti oi toe tū mai ai, oi ko ki mātou la e talitonu ka toe kave lava e te Atua ma Iehu, nā tino na oti kae talitonu ki a te ia.

¹⁵ Ko te kupu e akoako atu ai nei koutou e ki mātou, e a te Aliki: ko ki tātou nā tino e ola i te aho e pa mai ai te Aliki, ka hē olo muamua ki tātou i lo nā tino kua oti

¹⁶ Ka tālili te pa mai o te fakatonuga, te leo o te agelu hili, te leo o te pu a te Atua, ma ko te Aliki lava ia ka fanaifo mai te lagi. Ko ki lātou uma na oti kae talitonu ki a Keliho, ka muamua oi toe tutū mai;

¹⁷ ma ko ki tātou la iē koi ola i te taimi tēnā, ka hikitia ake fakatahi ma ki lātou i loto o nā ao, ke feiloaki ma te Aliki i te vānimonimo. Oi ka fakatahi ai pea lava ki tātou ma te Aliki.

¹⁸ Ko te mea la ia e tatau ai koutou ke fakamākeke tētahi ki tētahi, i nā kupu iēnei.