1 Tehalonia 1 - Tokelauan New Testament

¹ Mai ia Paulo, Hila ma Timoteo — Ki nā tino o te Ekalehia i Tehalonika, iē kua kavea ma tagata o te Atua te Tamana, ma te Aliki ko Iehu Keliho: Ke ia te koutou te alofa tūnoa ma te fīlēmū.

Te Ōlaga ma te Fakatuatua o nā Tino i Tehalonika

² E fakafetai pea lava ki mātou ki te Atua mo koutou uma, ma ki mātou tākua pea lava koutou ia mātou tatalo.

³ Auā e manatua e ki mātou i mua o to tātou Atua ma te Tamana, autou gāluega lelei e fai ona ko te koutou talitonu ma te koutou alolofa, ma te tūlaga mautū e i ei te koutou fakatuatua ki te Aliki ko Iehu Keliho.

⁴ Te kau uho, e iloa e ki mātou ko te Atua e alofa ki a te koutou, ma kua ia filifilia koutou ke fai ma ona tagata.

⁵ Auā ko te Tala Lelei e hēki ki mātou kavatua ki a te koutou i nā kupu oioti, kae na kavatu foki i te mana o te Agaga Paia, ma te kātoatoa o te mautinoa ki te moni o te fekau. E iloa e koutou te ōlaga nae ola ai ki mātou ka koi māfuta fakatahi ai ki tātou, e mo te lelei o koutou.

⁶ Ko koutou na mulimuli ki nā fakatakitakiga a ki mātou ma te Aliki; ma e ui na puapuagā lahi ai koutou, kae na talia e koutou te fekau i te fiafia e maua mai i te Agaga Paia.

⁷ Kua kavea ai la koutou ma fakatakitakiga ki nā tino uma kua talitonu, i Maketonia ma Akaia.

⁸ Auā, e hē gata kua halalau te fekau e uiga ki te Aliki mai ia te koutou ke pa ki Maketonia ma Akaia kātoa, kae kua vēnā foki oi halalau te tala ki te lalolagi kātoa, e uiga ki te koutou fakatuatua ki te Atua. E hēai lele la he mea e tatau ke toe lea atu ai ki mātou ki a te koutou.

⁹ E tākua e ki lātou uma te tali leleia o ki mātou e koutou i te oatuga o ki mātou, ma te liliu kehega o koutou mai nā tupua, kae kaukauna ki te Atua moni e ola pea lava,

¹⁰ ma fakatalitali ki tona Ataliki ke fanaifo mai te lagi — tona Ataliki ko Iehu, tē na fakatū e ia mai te oti, ma e ia laveakia ki tātou mai te tōkahā o te Atua e tuku e pa mai.