1 Petelu 4 - Tokelauan New Testament

Ōlaga kua Hūia

¹ Ona ko Keliho na maua i nā puapuagā o te tino, e tatau foki la koutou ke fakamākeke ma taumafai ke vē foki koutou ko ia; auā ko ai lava e puapuagā i te tino, e hē toe faia e ia te agahala.

² E kāmata atu nei la, ko te koutou ola koi totoe i te lalolagi nei, e tatau ke pūlea e nā mea e finagalo ki ei te Atua, kae hē ko nā manakoga fakatetagata.

³ Kua lava nā taimi nae mulimuli ai koutou i nā taimi kua teka, ki nā mea e fiafia ki ei nā tino fakapaupau. Nae fai e koutou nā āmio mātagā, nā manakoga fakatetagata, te konā, āmio hē pūlea, fai pātī ma nā uiga holi tūlāfono ko te ifo ki tupua.

⁴ Ko tagata fakapaupau i te taimi nei, e ofo auā ko koutou kua hē toe ola i he ōlaga hē taupulea e vē ko ki lātou, ma ko te mea ia kua fai ai e ki lātou nā tala tau fakakino ki a te koutou.

⁵ Kae ka tali atu ki lātou ki te Atua mo a lātou mea uma na fai. Kua hāuni te Atua ke fakamahino ia tagata ola vēnā tagata kua feoti.

⁶ Ko te mea ia na folafola ai foki te Tala Lelei ki nā tino kua feoti, e ui lava kua fakamahinogia ki lātou i te fakatetagata e vē oi fakamahinoagia ia tagata uma, ko o lātou agaga ka ola e vē oi ola te Atua.

Fakaaogā lelei nā Meaalofa a te Atua

⁷ Kua pili mai te ikuga o mea uma. E tatau ai la koutou ke pūlea ma mataala, kae ke mafai koutou ke tatalo.

⁸ Kae fakahilihili ai, ke tūmau pea lava te alofa o tētahi ki tētahi, auā ko te alofa e kave kehea ai te lahi o agahala.

⁹ Talia iētahi tino ki loto o nā fale o koutou e aunoa ma he mūimui.

¹⁰ Kua tuku atu e te Atua ki a te koutou tau tokatahi nā meaalofa kehekehe ke koutou kikilagia, fakaaogā lelei la ke tautua ai ki iētahi tino.

¹¹ Kāfai ko tau meaalofa ko te poto oi tautala, folafola te fekau a te Atua. Kāfai ko tau meaalofa ko te fehoahoani ki iētahi tino, tautua la ki iētahi tino i te mālohi e fōki atu e te Atua. Kae e tatau nā mea uma iēnei ke fai i he auala e maua ai he vīkiga mo te Atua e ala ia Iehu Keliho, tē e o ia te mamalu ma te mālohi ke pa lava ki te hēgata.

Ko nā Puapuagā ona ko Koutou ni Kelihiano

¹² Te kau uho pele, koutou nahe fakatēkia lele i nā tofotofoga tīgā ma te ogohia e maua ai koutou ma fōliga ai e vē ko he mea kehe lele te kua pa ki ei koutou.

¹³ Kae fiafia ona ko te avanoa ke puapuagā ai foki koutou e vē oi puapuagā ia Keliho, kae ke fakatumulia ai koutou i te fiafia kāfai tona mamalu e fakaalia.

¹⁴ Amutia koutou kāfai koutou e tauemua e tagata ona ko koutou e mulimuli ki a Keliho; ko te uiga o te mea tēnei ko te Agaga mamalu, te Agaga o te Atua, e fakatahi ma koutou.

¹⁵ Kae nahe i ei lele he tino o koutou e puapuagā ona kua tāmate tino, pe kua kaihohoa, pe kua holi tūlāfono, pe kua tautala tauanoa ki nā mea a iētahi tino.

¹⁶ Kae kāfai koutou e puapuagā ona ko koutou ni Kelihiano, nahe kavea te mea tēnā ma mea ke māhiahi ai koutou, kae fakafetai ki te Atua ko koutou e taukave e koutou te igoa o Keliho.

¹⁷ Auā kua pa mai te taimi ka kāmata ai te fakamahinoga, ma ko nā tino moni o te Atua ko ki lātou iēnā te ka muamua oi fakamahino. Kāfai e kāmata ia te ki tātou, he ā nei te ikuga o nā tino e hē talitonu ki te Tala Lelei mai te Atua?

¹⁸ E vē oi lea mai te tuhituhiga paia, “E faigatā lele nā tino lelei ke fakaolagia; he ā nei la te ka pa ki ei nā tino agahala ma hē talitonu ki te Atua?”

¹⁹ Ko te mea ia, ko nā tino e puapuagā ona ko te mea ia kua finagalo ki ei te Atua, ka ki lātou faia te mea e hako ma tuku kātoatoa atu ki lātou ki te pule a tē na faia ia mea uma, ma e tauhi pea lava ki ana folafolaga.