1 Petelu 3 - Tokelauan New Testament

Fafine ma a lātou Tāne

¹ E vēnā foki koutou fafine kua fai kāiga, e tatau koutou ke i lalo o te pule a autou tāne. E tuha lava la pe i ei ni tino o ki lātou e hē talitonu ki te kupu a te Atua, kae ka kavea te koutou uhitaki ma mea e liliu ai ki lātou ma talitonu. E hē tau faia e koutou he kupu ki ei,

² auā ka kitea e ki lātou te fakamāoni o koutou i nā tāpuakiga ki te Atua ma te lelei o autou āmio.

³ Nahe teuteua outou tino ke aulelei i te kikila atu i fafo, e vē ko te teuteuga o te lāulu, pe ko nā mea aulo e teuteu ai te tino, pe ko nā kofu e kokofu ai.

⁴ Kae ko te aulelei o koutou, e tatau ko nā mea e moni i loto lava o koutou, te aulelei e hē teka lele o te agaga agamalū ma fīlēmū. Ko tēnei te mea e hili atu te tāua i te kikila a te Atua.

⁵ Auā ko nā fafine i nā aho anamua nae tautua ki te Atua ma tuku tahi ki ei to lātou fakamoemoe, nae teuteu o lātou tino ke aulelei e ala i te tuku e ki lātou o ki lātou ki lalo o te pule a o lātou tāne.

⁶ Nae vēnā ia Hala; nae uhitaki ki a Apelaamo ma nae ia takua ia Apelaamo ko tona matai. Ko koutou i te taimi nei ni afafine e o ia, pe kāfai e koutou faia nā mea e lelei ma hē mātataku i he mea e fokotahi.

⁷ E vēnā foki koutou tāne; e tatau ke fai fakalelei e koutou autou āvaga i te koutou māfutaga, auā e hē tutuha to lātou mālolohi ma koutou. Fakaaloalo ki ei, auā ka maua foki e ki lātou fakatahi ma koutou te ola e ala i te alofa tūnoa o te Atua. Fai te mea tēnei kae ke nahe i ei ai he mea e fokotahi e fai ma fakalavelave i autou tatalo.

Puapuagā ona ko te faia o te mea e Hako

⁸ Ko te toe mea e lea atu ai au: ko koutou uma lele e tatau ke tutuha outou manatu ma outou lagona; alofa tētahi ki tētahi e vē ni tuagane ma ni tuafafine, ma ke agalelei ma loto maulalo tētahi ki tētahi.

⁹ Nahe tauia te kino i te kino pe ko te fetū e te fetū; kae ke taui atu i te gogō o koutou ki te Atua ke fakamanuia ki lātou, auā ko nā gāluega vēnei na kalagagia ai koutou, ma ko te auala foki lava tēnei ka maua ai e koutou nā fakamanuiaga mai te Atua.

¹⁰ E vē oi tūhia i te tuhituhiga paia, “Ko ai lava e fia ola i he ōlaga fiafia ma fia kikila ki nā aho o te tamaokāiga, e tatau ke nahe tautala i ni mea kino ma ia faia ni tala pepelo.

¹¹ E tatau ke liliu kehe mai te kino, ma fai nā mea e lelei; e tatau ke hakili ki te fīlēmū ma tona loto kātoa.

¹² Auā e kikila ma puipui e te Aliki nā tino e āmiotonu ma fakalogo ki a lātou tatalo; kae e teteke ki nā tino e faia nā mea e kino.”

Nā Mea e Tatau ke Fai i nā Taimi o te Puapuagā

¹³ Ko ai te ka ia faia he mea ke āfāina ai koutou, kāfai koutou e naunau ke koutou faia te mea e hako?

¹⁴ Kae e tuha foki lava pe puapuagā koutou ona e fai e koutou te mea e hako, ka maua e koutou nā fakamanuiaga. Koutou nahe mātataku i he tino e fokotahi, koutou foki nahe popole.

¹⁵ Kae ifo atu ma outou loto kātoa ki a Keliho ko ia te Aliki. Nonofo hāuni i taimi uma ke tali atu ki ho he tino e lea atu ke fakamālamalama ake ki a te ki lātou te fakamoemoe kua ia te koutou.

¹⁶ Tali atu ki ei ma te āva ma te fakaaloalo ma te lotofuatia e mamā. I te faiga tēnā, ka lagona ai te māhiahi e nā tino e faia nā tala ke fakakino ai nā uiga lelei o koutou nā tino kua mulimuli ki a Keliho.

¹⁷ Auā e hili atu te puapuagā o koutou ona e koutou faia nā mea lelei, pe kāfai ko te finagalo ia o te Atua, i lo te puapuagā ona ko nā mea kino e koutou faia.

¹⁸ Auā ko Keliho na mate fakafokotahi oioti lava mo nā agahala, he tino āmiotonu na fai ma hui o nā tino hē āmiotonu, kae ke takitakia ai koutou ki te Atua. Na tāmate i tona tino tagata, kae na fakaola i te fakateagaga,

¹⁹ ma i tona itū fakateagaga, na fano oi tālaki atu ki nā agaga e haihaitia i te falepuipui.

²⁰ Ko nā agaga iēnei e hēki uhitaki ki te Atua i te taimi ka koi fakatalitali ai ia ma te onohai mo ki lātou, i nā aho nae fau ai te vaka e Noa. E hē tokalahi nā tino nae i luga o te vaka — e toka valu oioti — na fakaola ki lātou e te Atua e ala i te vai.

²¹ Ko he fakailoga tēnā e fakatatau ki te papatihoga, tēia kua fakaola ai nei koutou. E hē ko te fakamamā kehega o nā kelekele mai te tino, kae ko te takutinoga e fai ki te Atua mai te lotofuatia e mamā, te fakaola ai koutou e ala i te toetū o Iehu Keliho,

²² tēia kua fano ki te lagi ma e i te itū taumatau o te Atua, ma e pule ia i agelu uma, taupulega ma mālohiaga uma i te lagi.