1 Petelu 2 - Tokelauan New Testament

Ko te Fatu e Ola pea lava ma te Mālō Paia

¹ Ko te mea ia, kave kehe loa nā uiga kino uma; nahe toe talapepelo, pe fakagutugutulua, pe fuā pe fai tala fakakino.

² Ke vē koutou ni pepe fātoā fānanau mai, e fia inu pea lava ki te huhu mamā fakateagaga, kae ke tutupu ake ai koutou ma fakaolagia ona ko koutou e inu ki ei.

³ E vēia oi lea mai te tuhituhiga paia, “Kua uma te tomi o koutou ki te agalelei o te Aliki”

⁴ Ōmamai ki te Aliki, te fatu e ola pea lava na tīaki e tagata e hēai he aogā, kae na filifilia e te Atua e tāua lahi lele.

⁵ Ōmamai ko koutou foki ni fatu e ola pea lava, ke fakaaogā koutou i te fauga o te mālumalu fakateagaga, te mea ka tautua ai koutou e vē ni ohitāulaga paia, ke ofo atu nā tāulaga e fiafia ki ei te Atua e ala ia Iehu Keliho.

⁶ Auā e lea mai te tuhituhiga paia, “Kikila, na kō filifilia he fatu e tāua lahi, ma e fai e au ma fatu tulimanu i loto o Hiona; ma ko ai lava e talitonu ki ei ka hē mā lele ia.”

⁷ Ko te fatu tēnei e tāua lahi lele mo koutou kua talitonu, kae mo ki lātou e hē talitonu: “Ko te fatu na tīaki e nā faufale e hē aogā na iku ake ko te fatu ia e pito hili ona tāua.”

⁸ E lea mai foki tētahi tuhituhiga paia, “Ko te fatu tēnei ka tū inoino ai ia tagata, te papa ka hīhīga ki lātou ki luga.” Na tū inoino ki lātou auā e hēki talitonu ki lātou ki te kupu, ma ko fuafuaga lava a te Atua ke vēnei te mea e pa ki lātou ki ei.

⁹ Kae ko koutou ko nā tino filifilia o te Atua, ko nā ohitāulaga a te Tupu, ko nā tino o te mālō paia, ko nā tōtino o te Atua na filifilia ke fakailoa ki tagata ia gāluega ofoofogia a te Atua, tē na kalagagia koutou ka koi i te pōuliuli ai koutou, ke ōmamai ki te gali o tona mālamalama.

¹⁰ Nae i ei te taimi ko koutou nae hē ni tagata e o te Atua, kae nei ko koutou kua kavea ma tagata o te Atua; nae i ei te taimi nae hē koutou iloa ai te agalelei o te Atua, kae nei kua koutou maua tona agalelei.

Ola e vē ni Pologa e a te Atua

¹¹ Ko au e vēnei atu ki a te koutou te kau uho pele, koutou iēnā e nonofo e vē ni tino kehe ma ni tino e fakaaunukua i te lalolagi tēnei! Koutou nahe mulimuli ki tuinanauga o te tino, iē e fakahaga tau pea lava ki nā mea uma e lelei i loto ia te koutou.

¹² E tatau ke lelei autou āmio i te kikila a nā tino fakapaupau. Kāfai la ka faitiogia koutou e ki lātou ma lea e koutou faia nā āmioga kino, ka mafai ke ki lātou kitea autou gāluega lelei ma viviki ake ai ki te Atua i te Aho e haele mai ai.

¹³ Ko te Aliki e fofou ko koutou ke uhitaki ki nā pūlega uma fakatetagata: ki te Tupu o Loma, tē e pūlea ia tagata uma,

¹⁴ ma ki nā kōvana kua ia tōfia ke ki lātou fakahalagia nā tino āmiokino ma fakamālō ki nā tino e faia nā mea e hako.

¹⁵ Auā ko te mea e fofou ki ei te Atua, ke koutou fakaumagia nā tala e hēai he uiga a nā tino vālelea, e ala i autou gāluega lelei e fai.

¹⁶ Ko koutou ni tino e ola haoloto, kae nahe fakaaogā te haolotoga kua ia te koutou ke mumuni ai ho he mea kino; kae ola ko koutou ni pologa e a te Atua.

¹⁷ Āva ki ho he tino, alolofa ki outou uho a Kelihiano, mātataku i te Atua ma āva ki te Tupu o Loma.

Nā Fakatakitakiga e Maua i nā Puapuagā o Keliho

¹⁸ Koutou nā kaukauna, e tatau ke talia e koutou te pule a outou matai ma āva ki ei, e hē nā ki a te ki lātou e alolofa ma fai lelei atu ki a te koutou, kae ke vēnā foki ki a te ki lātou e fakahāuā atu.

¹⁹ Ka fakamanuiagia koutou e te Atua pe kāfai koutou e onohai i nā tīgā e hē tatau ke pa koutou ki ei, ona e iloa e koutou te mea e fofou ia ki ei.

²⁰ Auā he ā te aogā kāfai koutou e onohai i te kini e tatau mo koutou ona ko nā mea hehē a koutou nae fai? Kae kāfai koutou e onohai i nā puapuagā e tuha lava pe nae koutou faia nā mea e lelei, ka koutou mauagia te fakamanuiaga mai te Atua ona ko te mea tēnā.

²¹ Ko tēnei te mea na kalagagia ai koutou e te Atua, auā ko Keliho lava ia na puapuagā mo koutou, ma ia tukua mo koutou he fakatakitakiga, kae ke mulimuli ai koutou ki nā mea nae ia faia.

²² E hēki i ei hana agahala, ma e hēki fakalogo lele he tino ki he kupu pepelo e hau mai tona gutu.

²³ Na utu e tagata i nā kupu mātagā, kae e hēki tali ki ei i ni kupu mātagā; na puapuagā lahi, kae e hēki ia fakamatakua ki lātou, kae na tuku tahi lava tona fakamoemoe ki te Atua, te Fakamahino āmiotonu.

²⁴ Ko Keliho lava ia te na taukaveagia a tātou agahala i tona tino ki te hātaulo, kae ke haoloto ai ki tātou mai te agahala, ma ola ke fai te mea e tonu. E ala i ona manuka kua mālōlō ai koutou.

²⁵ Auā ko koutou nae vē ni māmoe na gagalo, kae nei kua toe kaumai koutou ke mulimuli ki te Leoleomāmoe, tē e kikilagia ma puipuia nā mea uma e lelei i loto ia te koutou.