1 Kolinito 9 - Tokelauan New Testament

Nā Aiātatau ma nā Tiute o he Apohitolo

¹ E hē ia te au nei te haolotoga? E hē ko au nei he apohitolo? E hēki kō kitea nei ia Iehu to tātou Aliki? E hē ko koutou nei kua vēnā ona ko taku gāluega mo te Aliki?

² Kāfai iētahi tino e manatu ko au e hē he apohitolo, ko te mea hili tēnā e koutou iloa. Ona ko te ōlaga o koutou i te māfutaga ma te Aliki, kua kavea ai koutou ma fakamāoniga ko au ko he apohitolo.

³ Kāfai au e fehiligia e tagata, ko tēnei taku tali atu ki ei:

⁴ E hē ia te au nei te aiātatau ke fōki mai ai haku meakai ma haku vai inu e tuha ai ma taku gāluega e fai?

⁵ E hē ia te au nei te aiātatau ke fakatakitaki ai ki nā mea nae fai e iētahi apohitolo ma nā uho o te Aliki ma Petelu, i toku fano ma kave haku āvaga Kelihiano i aku faigāmalaga?

⁶ Pe ko te mea ko ki māua oioti lava ma Panapa te tatau ke gālulue mo ni totogi ke tauhi ai lava ki māua?

⁷ Ko ai ni fitafita e totogi lava e ki lātou nā mea e ola ai ma nā mea e fakaaogā e ki lātou? Ko ai ni faifatoaga e hē kakai lele ki ni vine mai o lātou lava tōvine? Ko ai ni leoleomāmoe e hē ki lātou fakaaogā nā huāhuhu mai a lātou lava māmoe?

⁸ He pule nei e āku te lea atu ai au i nā mea iēnei? E hē tākua nei foki e te Tūlāfono te mea tēnei?

⁹ Auā e tūhia i te Tūlāfono a Mohe, “Nahe nonoagia te gutu o te povi kāfai e fakaaogā ke holi kehe ai te haito.” Ko te povi nei te popole ki ei te Atua?

¹⁰ E hē ko ki tātou nei te fakaaga ki ei tana kupu tēnei? Io, ko ki tātou, auā ko te tino e huagia te kelekele ma te tino e holiagia te haito, e gālulue ma te fakamoemoe e maua ni o lā vāega o te helehelega.

¹¹ Kāfai na ki mātou totōagia nā mea lelei fakateagaga ia te koutou, e hē fetaui nei kāfai e helehele e ki mātou ni mea ke tauhi ai ki mātou, mai ia te koutou?

¹² Kāfai e i iētahi tino te aiātatau ke tauhi ai ki lātou e koutou, ka hē hili atu nei la ta mātou aiātatau? E ui i tēia, e hēki ki mātou fakaaogā te aiātatau tēnei. Kae kua onohai ki mātou i nā mea uma, kae ke nahe kavea ma mea e tulave ai te Tala Lelei e uiga ki a Keliho.

¹³ E moni nei lava e hē koutou iloa ko nā tino e gālulue i te Mālumalu e maua a lātou meakai mai te Mālumalu, ma ko nā tino e faia nā tāulaga i te fata faitāulaga e maua to lātou vāega mai nā tāulaga?

¹⁴ Na vēnā foki lava ona fakatonu e te Aliki, ko ki lātou e tālakia te Tala Lelei e tatau ke maua he mea e ola ai mai te Tala Lelei.

¹⁵ Kae e hēki kō fakaaogāgia lele nā aiātatau iēnei, ma ko au foki e hē tuhi atu kae ke maua ai e au. E hili atu ai toku oti, i lo te kave kehea e he tino o te mea e fāfia ai au.

¹⁶ Auā kāfai e tālaki e au te Tala Lelei, e hēai la he mea ke fāfia tauanoa ai au. Ko au na fakatonugia ke faia te mea tēnei. Kae hāloa la au pe kāfai e hē kō tālakia te Tala Lelei!

¹⁷ Anei taku gāluega na fai i toku lava loto malie, e fakamoemoe au ko au e totogi; kae e kō faia ona ko he tiute kua tōfia ai au e te Atua.

¹⁸ He totogi a la to oku e maua? Ko te avanoa ke tālaki ai te Tala Lelei e aunoa ma he totogi, e aunoa ma hoku tagi ki aku aiātatau i taku galue mo te Tala Lelei.

¹⁹ Auā e ui lava ko au he tino e haoloto, e hē he pologa e a he tino; kae kua kō faia au ma pologa ki tagata uma, kae ke kō maua ai ni tino e tokalahi.

²⁰ Ka koi galue au mo nā tino Iutaia, ko au nae ola e vē he Iutaia kae ke maua ai e au ki lātou; ma e ui lava ko au e hē aofia i te Tūlāfono a Mohe, kae kāfai au e galue mo nā tino e aofia ai, ko au e ola e vē lava he tino e aofia ai, kae ke kō maua ai ki lātou.

²¹ E vēnā foki la kāfai au e galue mo tagata nukukehe, ko au e ola e vē he nukukehe i fafo o te Tūlāfono Iutaia, kae ke maua ai e au ia tagata nukukehe. E hē vē la ko au e hē uhitaki ki te tūlāfono a te Atua; ko au e i lalo o te tūlāfono a Keliho.

²² I te mea e i ei nā tino e vāivai to lātou fakatuatua, ko au foki e vāivai e vē ko ki lātou, kae ke kō maua ai ki lātou. Oi e fai la e au ho he mea e kō mafaia, kae ke mafai ai oi fakaola ni tino o ki lātou.

²³ E fai e au nā mea uma iēnei mo te tala lelei, kae ke i ei fakatahi ai au i nā fakamanuiaga e maua mai ai.

²⁴ E iloa e koutou e tokalahi nā tino fētutuli i he tūkuga, kae e fokotahi oioti te tino e maua e ia te fakailoga. Fētutuli la kae ke maua te fakailoga.

²⁵ Ko nā tino fētutuli tau tokatahi uma, e koleni fakamāoni ma e pūlea i mea uma, kae ke fakapale ki lātou i te pale e fano e pala. Kae e fai e ki mātou ke maua ai e ki mātou te pale e hē pala ke pa ki te fakavavau.

²⁶ Ko te mea ia e vili hako ai au ki te laina tini; ko te mea ia e vē ai au ko he tino fuhu e hē fakamāumaua ni ana tuki.

²⁷ E fakamākeke e au toku tino i te tatuki ma pūlea ki toku loto kātoa, nā ia au e fakahala ma tuli kehe ma te tākaloga, tēia kua uma toku kalaga ki iētahi tino ke ōmamai oi tākakalo ai.