1 Kolinito 7 - Tokelauan New Testament

Nā Fehili e Uiga ki te Fakaipoipo

¹ I te taimi nei, ko au ka tautala atu e uiga ki nā mea na tākua e koutou i te koutou tuhi. E lea koutou, “E lelei te hē fakaipoipo o he tamāloa.”

² Kae ona ko te lahi o nā fakaohoohoga ke fai ai nā āmioga mātagā, e tatau ai nā tamāloa tau tokatahi ke i ei hana ia lava āvaga, ma fafine tau tokatahi ke i ei hana ia lava tāne.

³ E tatau te tamāloa ke fai tona tiute ko ia ko te tāne, ma tatau te fafine ke fai tona tiute ko ia ko te āvaga, ma e tatau ki lāua ke fakamalie e tētahi ia manakoga o tētahi.

⁴ E hē ko te āvaga te pule ki tona lava tino, kae ko tana tāne; e vēnā foki oi hē ko te tāne te pule ki tona lava tino, kae ko tana āvaga.

⁵ Nahe tetekea e tētahi tētahi, vaganā ai e mālilie muamua koulua ke fai vēnā mo he vāitaimi, kae ke mafai ai ke fakafano houlua taimi i te tatalo; oi kua toe kāmata ai nā hokotaga fakaulugālī. I te auala tēnei, ka hē mafai ai koutou ke fakaohoohogia e Hātani ona kua hē ia te koutou te loto onohai.

⁶ E hē ko he fakatonuga tēnei, kae ko he fakatagaga mai ia te au ke fai ai te mea tēnei e koutou pe kāfai ko te mea ia e fofou koutou ki ei.

⁷ Ko te meamoni lava, e hili atu toku fofou ko koutou ke vē ko au; kae e tofu lava te tino ma te meaalofa fakapitoa mai te Atua, ko tētahi tino ko tēnei tana meaalofa, ko tētahi ko tēnā tana meaalofa.

⁸ Mo koutou ko hēki fakaipoipo ma koutou kua oti autou tāne, e hili atu mo koutou kāfai koutou e nonofo nā ko koutou e vē ko au.

⁹ Kae kāfai e hē lava te koutou loto onohai, e tatau la koutou ke fakaipoipo — e hili atu te fakaipoipo i lo te mu i te nauloto.

¹⁰ Mo nā tino kua fakaipoipo, ko tēnei taku fakatonuga, e hē āku kae a te Aliki: ko te āvaga e hē tatau ke tīaki e ia tana tāne;

¹¹ kae kāfai e fai e ia te mea tēnei, e tatau ke nofo ai loa vēia tautahi auā ka hēai, kua tatau loa la ke toe fakalelei ma tana tāne; ma ko te tāne e hē tatau ke tatala e ia tana fakaipoipoga.

¹² Mo iētahi tino, ko au (ko au kae hē ko te Aliki) e lea atu vēnei: kāfai he tamāloa Kelihiano e nonofo ma he fafine e hē he Kelihiano kae kua malie te fafine ke nonofo pea ki lāua, e hē tatau ke ia tatalagia te lā fakaipoipoga.

¹³ Ma kāfai he fafine Kelihiano e fakaipoipo ki he tamāloa e hē he Kelihiano ma kua malie te tamāloa ke nonofo pea ki lāua, e hē tatau ke ia tatalagia te lā fakaipoipoga.

¹⁴ Auā ko te tāne e hē he Kelihiano e talia i mua o te Atua kāfai e fakatahi ki lāua ma tana āvaga, ma ko te āvaga e hē he Kelihiano e talia i mua o te Atua kāfai e fakatahi ki lāua ma tana tāne Kelihiano. Kāfai e hē fai vēneia, ko te lā fānau ka vē ni fānau e a ni tino fakapaupau, kae e talia ki lātou i mua o te Atua.

¹⁵ Kae kāfai te tino e hē he Kelihiano e fofou ke tīaki tona hoa Kelihiano, tuku vē ke fai. I nā mea vēnei, kua haoloto te hoa Kelihiano, pe ko te tāne pe ko te āvaga, ke fai te mea e fofou ia ki ei. Auā kua kalaga atu te Atua ko koutou ke ola i te fīlēmū.

¹⁶ Ko koe te āvaga Kelihiano, e vēhea ona kē iloa e mafai e koe oi fakahao tau tāne? Ko koe te tāne Kelihiano, e vēhea ona kē iloa e mafai e koe oi fakahao tau āvaga?

Ola i te Ōlaga kua Filifilia e te Atua mo Koutou

¹⁷ Tuku vē ki te tino lava ia, ke ola i te ōlaga nae i ei ai i te taimi na filifilia ma kalagagia ai e te Atua ke kavea mo ia. Ko te mea tēnei e fakatonu lava e au ki nā Ekalehia uma.

¹⁸ Kāfai na kalagagia koe e te Atua ka kua uma ai te pelitome o koe, ia koe nahe taumafai ke kave kehe nā māila o te pelitome; kāfai na kalagagia koe e te Atua ka ko hēki pelitome ai koe, nahe taumafai ke pelitome koe.

¹⁹ Pe kua pelitome he tino pe hēai, e hēai lele he mea e i ei; ko te mea e fakatāua ko te uhitaki ki nā fakatonuga a te Atua.

²⁰ E tatau ke ola pea lava te tino i te ōlaga nae i ei ai i te taimi na kalagagia ai ia e te Atua.

²¹ Nae he pologa nei koe i te taimi na kalaga atu ai te Atua ki a te koe? Nahe kē popole la ki te itū tēnā; kae kāfai e maua e koe he avanoa ke fakahaoloto ai koe, fakaaogā.

²² Auā ko he pologa na kalagagia e te Aliki, ko he tino tēnā e haoloto i te Aliki; e vēnā foki la he tino e haoloto na kalagagia e te Aliki, e kavea ia ma pologa a Keliho.

²³ Ko koutou na fakatau e te Atua i he tau; nahe kavea la koutou ma pologa a tagata.

²⁴ Oku uho, pe ko he ā lava te tūlaga nae i ei ai koutou tau tokatahi i te taimi na kalaga atu ai te Atua ki a te koutou, ke tūmau ai pea koutou, i te māfutaga fakatahi ma te Atua.

Nā tino e Hēki Fakaipoipo

²⁵ E vē la ko te mea na tuhi mai ai koutou e uiga ki nā tino e hēki fakaipoipo: E hē ia te au he fakatonuga mai te Aliki, kae e kavatu hoku lagona, ma e mafai ke talitonu mai koutou ki a te au, ona kua fakaalia te alofa tūnoa o te Aliki ki a te au.

²⁶ Ona ko nā fakafītāuli e i ei i te taimi nei, e manatu ai au, e lelei atu mo he tino ke tūmau i te mea e i ei ai nei.

²⁷ Kua fakaipoipo koe? Nahe kē tiakia la tau āvaga. Ko hēki fakaipoipo koe? Nahe kē fakaipoipo la.

²⁸ Kae kāfai koe e fakaipoipo, e hē ko he agahala te mea tēnā; ma kāfai he teine ko hēki fakaipoipo e fakaipoipo, e hē ko he agahala tana mea tēnā e fai. Kae e hili atu toku fofou ke kō puipuia koutou ke nahe maua i nā fakafītāuli ka feagai ma nā tino e fakaipoipo.

²⁹ Ko te uiga o taku tala, oku uho, ko tēnei: kua hē lava he taimi e totoe; ma e kāmata atu nei ko nā tino kua uma te fakaipoipo e tatau ke ola e vē lava ni tino e hēki fakaipoipo;

³⁰ ko nā tino e faitatagi, e vē lava ni tino e hē fakanoanoa; ko ki lātou e faikakata, e vē lava ni tino e hē fiafia; ko ki lātou e fakatau ni mea, e vē lava ni tino e hēai ni a lātou mea;

³¹ ko ki lātou e fakatāuagia ia mea o te lalolagi, e vē lava ni tino e hē tuahā moni ki ei. Auā ko te lalolagi tēnei, e vē ko te taimi nei, ka hē mataloa oi teka kehe atu.

³² Ko au e hē fofou ko koutou ke popole. Ko te tino e hēki fakaipoipo e fano tona māfaufau ki te gāluega a te Aliki, auā e taumafai ke fai e ia te mea e fiafia ai te Aliki.

³³ Kae ko te tino kua fakaipoipo, e fano tona māfaufau ki nā mea o te lalolagi, auā e taumafai ke fai e ia nā mea e fiafia ai tana āvaga,

³⁴ ma e fetoho tona māfaufau ki nā itū e lua. Ko he fafine e hēki fakaipoipo pe he taupou, e fano tona māfaufau ki te gāluega a te Aliki, auā e fofou ke ofo atu ia mo te Atua i te tino vēnā ma te agaga; ka ko he fafine kua fakaipoipo e fano tona māfaufau ki nā mea o te lalolagi, auā e fofou ke fai e ia nā mea e fiafia ai tana tāne.

³⁵ Ko au e lea atu vēnei mo te koutou lelei. Ko au e hē taumafai ke tāofiofi koutou i nā mea e fofou koutou ke koutou faia. Kae ko au e fofou ke fai e koutou te mea e hako ma tonu, ma ke ofo atu outou tagata kātoatoa ki te gāluega a te Aliki e aunoa ma he fakafehili.

³⁶ I te tūlaga o he toka lua kua uma te fakamau ke fakaipoipo ka kua toe hui o lā māfaufau: kāfai e manatu te tamāloa e hē hako ona uiga e fai ki te teine, ma kāfai kua lahi tona nauloto ki ei ma kua lagona ai e ia ko ki lāua e tatau ke fakaipoipo, tuku ke fai te mea e fofou ki ei: E hē he agahala te mea tēnā.

³⁷ Kae kāfai he tamāloa e hēki fakamālohia kae kua tonu i tona loto ke nahe fakaipoipo, ma kāfai e ia mafai oi pūlea kātoatoa ki ona lagona ma kua tonu i tona lava māfaufau te mea e tatau ke fai — oi e hili atu mo ia kāfai e hē fakaipoipo ki te teine.

³⁸ Ko te mea ia, e lelei kāfai te tamāloa e fakaipoipo kae e hili atu la te lelei mo te tamāloa e hē fakaipoipo.

³⁹ Ko te fafine kua fakaipoipo e hē haoloto lele pe kāfai koi ola pea lava tana tāne; kae kāfai e oti tana tāne, oi fakataga ai ia ke toe fakaipoipo ki ho he tamāloa e fofou ia ki ei, ma ko te tamāloa e tatau ko he tino Kelihiano.

⁴⁰ Kae e hili atu tona fiafia kāfai e nofo vē pea i te mea e i ei ai. Ko tēnā toku manatu, ma e manatu au e ia te au te Agaga o te Atua.