1 Kolinito 6 - Tokelauan New Testament

Ko te Mōlia e he Kelihiano hētahi Kelihiano

¹ Kāfai he tino o koutou e i ei he mea e hē lelei ai ma hētahi uho Kelihiano, e kave nei e koe tau tagi ki mua o nā fakamahino fakapaupau? Pe kave e koe ki mua o tagata o te Atua ke ki lātou faia he tonu?

² E hē koutou iloa ko tagata o te Atua te ki lātou fakamahinoagia te lalolagi? Kāfai la ka fakamahino e koutou te lalolagi, e hē mafai nei la e koutou oi fakamahino nā tamā mea?

³ E hē koutou iloa ko nā agelu e fakamahino e ki tātou? Ma kāfai la e vēnā, ko tona uiga e mafai e ki tātou oi fakamahino ho he mea i tēnei ōlaga.

⁴ Kāfai nā mea vēnei e tutupu, ka kave nei lava e koutou ke fai ki ei he fakaikuga a nā tino e hē i loto o te Ekalehia?

⁵ Koutou te hē mamā! E tatau lava ke i ei he tino o koutou e mālamalama, ma ia mafaia oi fai he fakaikuga i he mea e kehekehe ai ni uho Kelihiano.

⁶ Ka ko te mea e i ei, e kave e tētahi Kelihiano tētahi uho Kelihiano ki te fakamahinoga, ma tuku atu ai ki he fakamahino e hē talitonu ki te Atua, ke ia faia te fakaikuga.

⁷ Ko nā tagi a koutou ki te fakamahinoga e mōlia ai e tētahi te tētahi, kua iloa ai lava ko koutou kua matuā faiaina lava. Na hē hili atu nei mo koutou te tuku vē pea ke fai e tagata nā mea hehē ki a te koutou? Na hē hili atu nei te tuku vē ke kaihohoa e lātou autou mea?

⁸ Kae ko koutou, kua fai lava e tētahi nā mea hehē ki tētahi, ma kaihohoa lava e tētahi ia mea a tētahi, ke pa lava ki nā mea a iētahi uho Kelihiano!

⁹ E hē koutou iloa ko nā tino āmio kino, e hē mafai ke fai mo ki lātou te Mālō o te Atua? Ia koutou la i na fakahehēa; ko nā tino fai āmio mātagā, pe ifo ki tupua, pe mulilua, pe ko nā tamāloa e nanau ki nā tino o iētahi tamāloa,

¹⁰ pe ko nā tino kaihohoa, pe manatu fakapito, pe ko nā tino konanā, pe faitala fakakino, pe ko nā tino fāomea — e hēai ni tino vēnei e fai mo ki lātou te Mālō o te Atua.

¹¹ Ko iētahi o koutou nae vēnei. Kae ko koutou kua uma te fakamamāgia mai te agahala; ko koutou kua uma te ofo atu mo te Atua; kua uma te fakalelei o te koutou va ma te Atua e te Aliki ko Iehu Keliho ma te Agaga o to tātou Atua.

Fakaaogā outou Tino ke maua ai he Vīkiga mo te Atua

¹² E mafai ke lea vē he tino, “E taga ke fai e au ho he mea.” Io; kae e hē ko mea uma e lelei mo koe. E mafai ke lea au e taga ke fai e au ho he mea, kae e hē kō fakataga ho he mea e fokotahi ke ia faia au ma ana pologa.

¹³ E mafai ke lea vē he tino, “Ko nā meakai e mo te manava, ma ko te manava e mo nā meakai.” Io; kae e fakaumatia e te Atua nā mea uma iēnei e lua. Ko te tino o te tagata e hē fakaaogā mo nā āmioga mātagā, kae e fakaaogā ke tautua ai ki te Aliki; ma e fōki mai e Aliki nā mea e tauhi ai te tino.

¹⁴ Ko te Atua na ia fakatūa te Aliki mai te oti, ma ka ia fakatutūa foki ki tātou i tona mana.

¹⁵ E hē koutou iloa ko outou tino ni itūtino e o te tino o Keliho? Ka kave nei la e au he itūtino o te tino o Keliho oi fai ma itūtino o te tino o he fafine talitāne? E matuā hē mafai lava.

¹⁶ E hē koutou iloa ko te tino e ia tuku fakatahia tona tino ma te tino o he fafine talitāne, kua kavea ia ma tino e tahi ma te fafine? E vē oi tūhia, “Ko nā tino e toka lua ka kavea ma tino e tahi.”

¹⁷ Kae ko ai lava e ia tuku fakatahia tona tino ma te Aliki, ka tahi ki lāua ma te Aliki i te fakateagaga.

¹⁸ Kalo kehe ma nā āmioga mātagā. Ko ho hētahi agahala a he tamāloa e fai e hē āfāina ai tona tino; kae ko te tamāloa e faia nā āmioga mātagā, kua agahala ia ki tona lava tino.

¹⁹ E hē koutou iloa ko outou tino ko te mālumalu ia o te Agaga Paia, e nofo i loto ia te koutou, ma na fōki atu e te Atua ki a te koutou? Ko koutou e hē a koutou kae e a te Atua;

²⁰ na ia fakataua koutou i he tau. Ko te mea ia, fakaaogā outou tino ke maua ai he vīkiga mo te Atua.