1 Kolinito 5 - Tokelauan New Testament

Āmio Mātagā i loto o te Ekalehia

¹ Kua tākua mai e i ei nā tino o koutou e faia nā āmioga mātagā, ni āmio e pa ki tagata nukukehe e hē ki lātou faia. Ko te fakamatalaga kua maua e au, e i ei he tamāloa kua nonofo ma tona mātua fai, te āvaga a tona tamana.

² E vēhea ake la ona fāfifia koutou! E hē tatau nei koutou ke māhiahi? Ko te tino kua ia faia te tēnei mea, e tatau ke tuli kehe ma te koutou maopoopoga.

³ E ui lava ko au e hē fakatahi ma koutou i te tino, ka ko au e i kinā ma koutou i te agaga; ma kua kō faiagia te fakaikuga o te tamāloa na ia faia tēnei mea,

⁴ e vē lava au e i kinā fakatahi ma koutou. Kāfai koutou e maopoopo, ma i ei ai ma toku agaga fakatahi ma te mana o to tātou Aliki ko Iehu,

⁵ ke tukulima atu e koutou te tamāloa ki a Hātani ke ia fakaumatiagia ia i te fakatetino, kae ke hao ai tona agaga i te Aho o te Aliki.

⁶ E hē tatau koutou ke fāfifia. E hē koutou iloa ko te tamākīkī fefete e fefete ai te paluga kātoa?

⁷ E tatau ke koutou kave kehea te mea fakafefete tuai o te agahala, kae ke mamā kātoatoa ai koutou. Oi ka vē ai koutou he paluga fou e hēai he fefete i ei, e vē ona mautinoa e au ko koutou e vēnā. Auā ko Keliho, te tātou punuamāmoe o te Kaiga o te Pāheka, kua uma te ofo atu ma tāulaga.

⁸ Ke ki tātou fakamanatua la te Pāheka, i te falaoa e hēai he fefete, te falaoa o te fakamāoni ma te meamoni, kae hē ko te falaoa e i ei te fefete tuai o te agahala ma te āmio kino.

⁹ I taku tuhi na tuhi atu ki a te koutou, na lea atu au ki a koutou, ko koutou nahe fakapipiki ki nā tino e faia nā āmio mātagā.

¹⁰ Ko au e hē lea atu ko nā tino fakapaupau uma o te lalolagi e hē ni Kelihiano e fai āmio mātagā, pe manatu fakapito, pe kaihohoa, pe ifo ki tupua. Heiloga koutou ke olo kehe uma mai te lalolagi oi fātoā hē koutou maua ai ni tino vēnei.

¹¹ Ko te uiga o taku lea atu, ia koutou nahe fakapipiki ki he tino e lea vē ko ia ko he Kelihiano, kae fai āmio mātagā, pe manatu fakapito, pe ifo ki tupua, pe tau fakakino, pe konā, pe kaihohoa — nahe nonofo foki ki lalo ma kakai fakatahi ma he tino vēnei.

¹² Auā he ā nei taku fekau e fakamahino ai e au nā tino i fafo ma e hē i loto o te Ekalehia? E hē ko nā tino nei i loto o te Ekalehia te tatau ke koutou fakamahinoa?

¹³ E fakamahino e te Atua nā tino i fafo e vē oi lea mai te tuhituhiga paia, “Tuli kehe te tino kino mai te koutou maopoopoga.”