1 Kolinito 4 - Tokelauan New Testament

Ko nā Apohitolo a Keliho

¹ E tatau ke ia te koutou te manatu ko ki mātou ni kaukauna e a Keliho, ni tino kua tōfia ke kikilāgia nā meamoni lilo a te Atua.

² E hē gata la i tēnā, e manakomia nā kaukauna vēnei, ke fakamāoni ki to lātou matai.

³ E hēai lele la hoku popole pe kāfai au e fakamahino e koutou pe i loto o he fale fakamahino o tagata. Ko te meamoni, e hē kō fakamahinoa foki au.

⁴ E hēai he mea e kō iloa e hehē ai au, kae e hē vēake ai la ko au e mamā. E nā ko te Aliki lava te ia fakamahinoa au.

⁵ E hē tatau la ke fai hautou fakamahinoga ki ho he tino ka ko hēki pa mai te taimi tatau. Ko te fakamahinoga e tatau ke fakatali ke pa ki te taimi e haele mai ai te Aliki; ka ia kaumaia ki te mea mālama nā mea nae mumuni i te pōuli, ma fakailoa ia fuafuaga lilo i nā māfaufau o tagata. Oi maua ai e ki lātou uma te vīkiga e tatau ai mai te Atua.

⁶ Ko nā mea uma iēnei oku uho, kua uma te fai e ki māua ma Apolo, ke fakafaigofie ai mo koutou. Kua kavea to mā toka lua ma fakatakitakiga, kae ke mālamalama ai koutou i te uiga o te fakakupuga e vē mai, “Fakamamalu nā tūlāfono moni.” Nahe i ei lele he tino o koutou e fiafia ki tētahi tino, kae inoino ki tētahi.

⁷ Na hei faia nei koutou ke hili atu i lo iētahi tino? E hēki fōkiatua nei e te Atua nā mea uma ki a te koutou? He ā la te fāfifia tauanoa ai koutou, e vē lele ko nā mea ia te koutou, e hē ni meaalofa?

⁸ Kua maua nei e koutou nā mea uma e manakomia e koutou? Kua maukoloa nei koutou? Kua fai nei koutou ma tupu, e ui lava ko ki māua e hē ni tupu? I hētahi itū, maimau ake ko koutou moni kua kavea ma tupu, kae ke kavea ai foki ki māua ma tupu fakatahi ma koutou.

⁹ Auā e fōliga kua tuku e te Atua ki mātou te kau apohitolo ki te tūlaga e pito maualalo, e vē ni tino kua fakahalagia ke feoti i mua o tagata, e vē he mataaga mo te lalolagi kātoa o te kau agelu ma o tagata ola uma.

¹⁰ Ona ko Keliho, e kavea ai ki mātou ma tagata vālelea; kae ko koutou e popoto i te māfutaga ma Keliho! Ko ki mātou e vāivai, kae ko koutou e mālolohi! Ko ki mātou e inohia, kae ko koutou e fakaaloalogia e tagata!

¹¹ Ke pa mai ki te taimi nei, ko ki mātou e fia kakai ma fia inu; e kokofu i nā kofu gāhaehae; e kini; e hēai ni mea e nonofo ai;

¹² ma e fakaaogā o mātou lima i nā gāluega fītā. Kāfai ki mātou e fetū e tagata, e fakamanuia e ki mātou; kāfai ki mātou e maua i nā hāuāga, e onohai ki mātou;

¹³ ka faikupu kino ia tagata ki a te ki mātou, e tali ki mātou ki ei i nā kupu alofa. Ke pa mai ki te taimi nei, ko ki mātou kua vē ni lāpihi i te kikila a tagata, e vē ko te pala o te kelekele!

¹⁴ Ko au e hē tuhi vēnei atu ke fakamahiahi koutou, kae ke fakatonu atu koutou nā fānau e pele ia te au.

¹⁵ Auā e ui lava e hē mafai taulia te tokalahi o nā takitaki o koutou i te ōlaga faka-Kelihiano, e fokotahi oioti lava te koutou tamana. Kua fai au ma outou tamana, i te māfutaga ma Keliho Iehu, ona na kō kaumaiagia te Tala Lelei ki a te koutou.

¹⁶ Ko au la e fautua mālohi atu ki a te koutou, ko koutou ke mulimuli ki aku fakatakitakiga.

¹⁷ Ko te mea ia ka uga atu ai e au ki a te koutou ia Timoteo, toku ataliki pele ma te fakamāoni i te ōlaga faka-Kelihiano. Ka ia fakamanatu atua ki a te koutou nā mea tāua e mulimuli au ki ei i te ōlaga fou fakatahi ma Keliho Iehu, e vē oi akoako atu e au ki nā Ekalehia uma i nā koga kehekehe.

¹⁸ Ko iētahi o koutou kua fia popoto, ona nae hē manatu koutou ko au e āhiāhi atu ki a te koutou.

¹⁹ Kae ko au ka fanatu i he taimi lata mai, pe kāfai e finagalo ki ei te Aliki. Ma ka iloa ai e au te meamoni, e hē gata i nā kupu a nā tino fia popoto, kae pe ia te ki lātou moni te mana o te Agaga Paia.

²⁰ Auā ko te Mālō o te Atua e kitea i ōlaga o tagata e ala ia lātou gāluega e fai, kae hē ia lātou kupu.

²¹ He ā te fofou koutou ki ei? Ke fanatu au ma te kini ki a te koutou, pe fanatu i te agaga o te alofa ma te agamalū?