1 Kolinito 3 - Tokelauan New Testament

Ko nā Kaukauna a te Atua

¹ Ko te meamoni, oku uho, e hēki kō mafaia oi tautala atu ki a te koutou e vē oi tautala au ki nā tino kua ia te ki lātou te Agaga; nae tautala atu au ki a te koutou, ko koutou ni tino e o te lalolagi, ni fānau e i loto o te talitonuga faka-Kelihiano.

² Nae fafaga koutou e au i te huāhuhu, kae hē i nā meakai mākeke, auā ko hēki lava hāuni koutou ki ei. Ke pa mai lava nei, ko hēki lava hāuni lava koutou,

³ auā ko koutou koi ola lava e vē oi ola ia tagata o tēnei lalolagi. Kāfai e i ei te lotokino ia te koutou ma tauaimiha, e hē ko te fakamāoniga nei tēnā ko koutou e o te lalolagi, ma e fai e koutou nā uiga māhani o tagata?

⁴ Kāfai e lea vē he tino o koutou, “Ko au e mulimuli ki a Paulo,” ka ko tētahi e lea vē, “Ko au e mulimuli ki a Apolo” — e hē ko nā uiga la iēnā o tagata o te lalolagi?

⁵ Kae ko ai nei ia Apolo? Ko ai foki ia Paulo? Ko ki mātou kua nā ni kaukauna na fakaaogā ke auala mai ai te koutou talitonu. Ko ki mātou e gālulue i nā gāluega na tōfia ai ki mātou tau tokatahi e te Aliki:

⁶ Na totō e au te fatu, na fakahūhū e Apolo, kae ko te Atua te na ia fakaola te lākau.

⁷ Ko te tino na ia totōa ma te tino na ia fakahūhūa e hē tāua. Kae ko te Atua te tāua, auā na fakaola e ia te lākau.

⁸ E hēai he mea e kehe ai te tino e ia totōa ma te tino e ia fakahūhūa; ka fōki e te Atua te taui o te tino e tuha ai ma tana gāluega kua fai.

⁹ Auā ko ki mātou ni tino e faigāluega fakatahi mo te Atua, ka ko koutou ko te fatoaga a te Atua. Ko koutou foki ko te fale o te Atua.

¹⁰ Ona ko te meaalofa na fōki mai e te Atua ki a te au, na fai ai e au te gāluega a he tino poto fau fale ma fakatū te fakavae, ma fau fakaopoopo ai e hētahi tino ki luga. Kae ko nā tino tau tokatahi e tatau ke fakaeteete i tana fau fakaopoopo e fai ki ei.

¹¹ Auā kua uma te fakatū e te Atua te fakavae e fokotahi, ko Iehu Keliho, ma e hēai he tahi fakavae e mafai ke toe fakatū.

¹² Ko iētahi tino ka ki lātou fakaaogā nā aulo pe ko nā hiliva pe ko nā fatu mānanaia, i te fauga ki luga mai te fakavae; ko iētahi ka ki lātou fakaaogā nā lākau pe ko nā mutia mamago, pe ko nā mutia loloa.

¹³ Ma ko te lelei o gāluega a tagata tau tokatahi, ka kitea i te Aho o Keliho. Auā i te Aho tēnā, ko te afi te ka iloa ai ia gāluega a tagata tau tokatahi; ko te afi te ka fuafua ai ma iloa, pe na lelei moni nā gāluega a ki tātou na fai.

¹⁴ Kāfai te mea na fau ki luga o te fakavae e hao mai te afi, ka maua e te faufale he taui.

¹⁵ Kae kāfai te gāluega e mu uma, ka lahi lele la te gau o te faufale e ui lava ka fakahaogia ia, e vē he tino na hao mai i loto o he afi.

¹⁶ E hē koutou iloa ko koutou ko te mālumalu o te Atua, ma ko te Agaga o te Atua e nofo i loto ia te koutou?

¹⁷ Ka fakaumatia e te Atua te tino e ia fakakinoa tona mālumalu. Auā ko te mālumalu o te Atua e paia, ma ko koutou ko tona mālumalu.

¹⁸ Ia koutou lele nahe fakahehēagia. Kāfai he tino o koutou e manatu ko ia e poto i nā mea o te lalolagi nei, e tatau i te tino tēnā ke kavea ma vale, kae ke poto moni ai ia.

¹⁹ Auā ko te poto o te lalolagi ko te valea tēnā i te Atua. E vē oi lea mai te tuhituhiga paia, “E kitea e te Atua te vālelea o te kau popoto i to lātou fai togafiti”;

²⁰ ma e lea mai foki tētahi tuhituhiga paia, “E iloa e te Aliki ko manatunatuga o te kau popoto e hēai he aogā.”

²¹ Ko te mea ia e hē tatau ai ke fāfia he tino i nā mea e mafai ke fai e tagata. Ko te meamoni, ko nā mea uma lele e a koutou:

²² pe ko Paulo, pe ko Apolo, pe ko Kepa, pe ko te lalolagi nei, pe ko te ola pe ko te oti, pe ko te taimi nei pe ko te lumanaki — ko nā mea uma iēnei e a koutou,

²³ ma ko koutou e a Keliho, ma ko Keliho e a te Atua.