1 Kolinito 2 - Tokelauan New Testament

Ko te Fekau e uiga ki te Keliho na Fakahātaulo

¹ Oku uho, i toku fanatuga ki a te koutou ke folafola atu te meamoni lilo a te Atua, e hēki kō fakaaogāgia ni kupu loloa pe he mālamalama lahi.

² Auā ka koi i ei au ma koutou, na tonu i toku māfaufau ke tuku iētahi mea kae ke akoako atu oioti e uiga ki a Iehu Keliho, kae maihe lava tona mate i luga o te hātaulo.

³ Ma i te kāmataga, ko au nae vāivai ma tete i te mataku,

⁴ ma i aku akoakoga ma te tālakiga o te fekau, nae hē kō fakaaogā ni kupu loloto i te poto fakatetagata, kae na tuku lava e au ki te Agaga o te Atua ke fakaali tona mana.

⁵ Ko te koutou fakatuatua la, e hē fakalagolago ki te poto fakatetagata, kae e fakalagolago ki te mana o te Atua.

Ko te Poto o te Atua

⁶ Kae e folafola e au he fekau e uiga ki te poto, ki nā tino kua mautū i te fakateagaga. E hē ko te poto o te lalolagi nei, pe o nā mālohiaga e pūleagia te lalolagi — nā mālohiaga e fano e uma te lātou pule.

⁷ Ko te poto e folafola e ki mātou ko te poto lilo o te Atua tē e mumuni mai tagata, kae kua uma te ia filifilia ke maua ai e ki tātou ni vīkiga, ka ko hēki faia te lalolagi.

⁸ E hēai he tupu o tēnei lalolagi na iloagia te poto tēnei. Ka na he mea na ki lātou iloa, e vēnei ake e hēki ki lātou fakahātauloa te Aliki mamalu.

⁹ Kae vē oi lea mai te tuhituhiga paia, “Ko te mea e hēai lele he tino na kua ia kitea pe lagona, ma e hēki i ei lele he tino na manatu e ono tutupu, ko te mea ia kua hāunia e te Atua mo ki lātou e alolofa ki a te ia.”

¹⁰ Auā kua fakailoa mai e te Atua tana mealilo ki a te ki mātou e ala i tona Agaga. Ko te Agaga e hākilikili ki nā mea uma, ke pa lava ki te lolotoga o fuafuaga a te Atua.

¹¹ Nā ko o tātou lava agaga i loto o ki tātou, te iloagia nā mea uma e uiga ki a te ki tātou; e vēnā foki lava ona iloa oioti e te Agaga o te Atua, nā mea uma e uiga ki te Atua.

¹² E hē ko te agaga o te lalolagi te kua ki mātou maua; kae ko te Agaga na uga mai e te Atua, kae ke mālamalama ai ki mātou i nā mea uma kua fōki mai e te Atua mo ki tātou.

¹³ Ko te mea ia, ko ki mātou e hē tautatala i ni kupu na akoako e te poto fakatetagata, kae tautatala i nā kupu na akoako e te Agaga, i nā taimi e fakamālamalama ai e ki mātou nā meamoni fakateagaga, ki nā tino kua ia te ki lātou te Agaga.

¹⁴ Ko ai lava e hē ia te ia te Agaga, e hē ia maua foki nā meaalofa e fōki mai e te Agaga o te Atua. Ko nā tino vēnei e matuā hē mālamalama lava; ki a te ki lātou e hēai he uiga, auā ko te tāua o nā mea iēnei e mafai oioti ke fuafua i te kikila fakateagaga.

¹⁵ Kae ko ai lava e ia te ia te Agaga, e ia mafaia oi fakamahino ia mea uma, kae e hēai la he tino e mafai e ia ke fakamahino te tino tēnā.

¹⁶ E vē oi lea mai te tuhituhiga paia, “Ko ai te ia iloa te māfaufau o te Aliki? Ko ai te ia mafaia oi kavatu ki ei ni fautuaga?” Kae ko ki tātou, kua ia te ki tātou te māfaufau o Keliho.