1 Kolinito 16 - Tokelauan New Testament

Fehoahoani Tupe mo Tagata Mātitiva o te Atua

¹ E vē la ki te mea na tuhi mai ai koutou ki he tupe ke hakili ke fehoahoani ki tagata o te Atua i Iutea: e tatau ke koutou faia te mea na fakatonu e au ki nā Ekalehia i Kalatia ke fai.

² I nā Aho Hā takitahi uma, e tatau ke tuku kehe e koutou tau tokatahi he tupe, e fua lava ki te tupe a te tino e maua, ma fakaputu, kae ke nahe toe tau aoa ai ni tupe kāfai au e pa atu.

³ Ma kāfai au e pa atu, ka uga e au nā tino kua koutou filifilia ma he tuhi fakamāonia, ke kave tautou meaalofa ki Ieluhalema.

⁴ Kāfai e i ei he kikilaga ko au e tatau ke fano, oi kua olo fakatahi ai ki mātou.

Nā Fuafuaga a Paulo

⁵ Ko au ka fanatu oi āhiāhi atu ki a te koutou kāfai e uma taku malaga ki Maketonia — auā ko au e tatau ke kui atu muamua i loto o Maketonia.

⁶ Hōvē pe i na nonofo ki tātou mo he vāitaimi, pe ko te tau mālūlū kātoa, kae ke mafai ke fehoahoani mai koutou ki a te au oi fakaauau taku malaga, pe ko fea lava hētahi mea ka fano au ki ei.

⁷ Ko au e hē fofou ke māfuta ma koutou mo hina taimi pukupuku; ko au e fofou ke mataloa he taimi e māfuta ai au ma koutou, kāfai e finagalo ki ei te Aliki.

⁸ Ko au ka nofo i kinei i Efeho ke pa ki te aho Penitekoho.

⁹ E i ei te avanoa tāua i kinei ke fai ai ni aku gāluega aogā, e ui lava e tokalahi nā tino e teteke mai ki a te au.

¹⁰ Kāfai ia Timoteo e fanatu ki kinā, kikila lelei ifo ki ei ke nahe i ei he mea e fakapopolegia ai, auā ko he tino e galue mo te Aliki, e vē foki lava ko au.

¹¹ Nahe tino lele e faikino ki ei, kae e tatau ke fehoahoani koutou ki ei oi fakaauau tana malaga i te fīlēmū, kae ke toe fōki mai ai ki a te au; auā ko au e fakatalitali atu ke toe ōmamai ma iētahi uho Kelihiano.

¹² Kae e vē la ki to tātou uho ko Apolo, e lahi nā taimi nae fakamālohi ai au ki ei ma iētahi uho Kelihiano, ke āhiāhi atu ki a te koutou, kae e hē talitonu ko te taimi tēnei e tatau ke fanatu ai ia. Kae kāfai loa e maua he avanoa, oi kua fanatu ai.

Ko nā toe Kupu

¹³ Koutou ke mataala, tūmau i te fakatuatua, loto tetele ma fakamākekeke.

¹⁴ Fai autou gāluega uma i te alofa.

¹⁵ E iloa e koutou ia Hetefana ma tona kāiga; ko ki lātou nā tino muamua na liliu ma Kelihiano i Akaia, ma kua ofo atu ki lātou ke tautua ki tagata o te Atua. Ko au e fakamālohi atu ki a te koutou te kau uho,

¹⁶ koutou ke mulimuli ki te takitakiga a nā tino vēnei, ma ho hētahi tino e gālulue fakatahi ki lātou.

¹⁷ Ko au na fiafia lele i te ōmamaiga o Hetefana, Fotunatu ma Akaiku, auā ko to lātou i kineiga, kua e vē ai lava ko koutou foki ei kinei,

¹⁸ ma kua ki lātou fakafiafiagia au, e vē foki lava ona ki lātou fakafiafiagia koutou. Ko nā tino vēnei e tatau ke amanakia lelei e koutou.

¹⁹ E momoli atu nā fakamanuiaga mai nā Ekalehia i te itūmālō o Ahia mo koutou; ko Akula ma Pihila ma te Ekalehia e fai a lātou māfutaga i to lā fale, e momoli atu a lātou fakamanuiaga lahi i te igoa o te Aliki.

²⁰ E momoli atu nā fakamanuiaga mai te kau uho Kelihiano uma i kinei. Fakafeiloaki tētahi e tētahi i te kihi o te fīlēmū.

²¹ I toku lima e tuhi ai e au te mea tēnei: Fakamanuiaga mai ia Paulo.

²² Ko te tino e hē alofa ki te Aliki — ke fakamālaiagia ia! Marana tha — To mātou Aliki, haele mai!

²³ Ke ia te koutou te alofa tūnoa o te Aliki ko Iehu.

²⁴ Ko toku alofa e ia te koutou uma e ala ia Keliho Iehu. Amene.