1 Kolinito 15 - Tokelauan New Testament

Ko te Toetū o Keliho

¹ I te taimi nei, e fia fakamanatu atu e au ki a te koutou oku uho, te Tala Lelei kua uma te folafola atu e au ki a te koutou, tēia kua talia e koutou ma kua mautū ai te koutou fakatuatua.

² Ko tēnā te Tala Lelei, te fekau kua folafola atu e au ki a te koutou. Ko koutou e fakaola e te Tala Lelei pe kāfai koutou e pipiki mau ki ei — vaganā ai la e hēai he uiga o te koutou talitonu.

³ Na kō tuku atua ki a te koutou te mea na kō maua, ko te mea ia e pito hili te tāua; ko Keliho na oti mo a tātou agahala, e vē oi tūhia i nā Tuhituhiga Paia;

⁴ na tanu, ma toe fakatū mai ai i te oti i te tolu o aho, e vē ona tūhia i nā Tuhituhiga Paia;

⁵ na fakakitea ia ki a Petelu vēnā ma te kau apohitolo e toka hefululua.

⁶ Oi fakakitea ai i te taimi lava e tahi ki nā tino e lima helau ma ona tupu nae mulimuli ki a te ia, ko te tokalahi o ki lātou iēnei koi ola mai, e ui kua oti iētahi.

⁷ Oi fakakitea ai ki a Iakopo, ma mulimuli ake, oi fakakitea ai ki te kau apohitolo uma.

⁸ Kae mulimuli ai oi fakakitea mai ia ki a te au — e ui lava ko au e vē he tino na fānau mai i he taimi hehē.

⁹ Auā ko au te pito fakatauva i nā apohitolo uma — e hē aogā foki au ke takua he apohitolo, auā ko au nae fakahāuā ki te Ekalehia a te Atua.

¹⁰ Kae ko te alofa tūnoa o te Atua kua kavea ai au ke vēnei, ma ko tona alofa tūnoa ki a te au e hēki māumau. Kua hili atu toku galue mālohi i lo hētahi o te kau apohitolo, e ui lava e hē ona ko he mea na kō faia, kae ko te alofa tūnoa o te Atua e galue ma au.

¹¹ Ko te mea ia, pe na fanatu ia te au pe na hau ia te ki lātou, ko te mea tēnei e folafola e ki mātou uma, ma ko tēnei te mea e talitonu koutou ki ei.

Ko te Toetutū o ki Tātou

¹² Kāfai e folafola e ki mātou ko Keliho kua toe fakatū mai i te oti, e vēhea la oi lea iētahi o koutou ko nā tino kua oti ka hē toetutū mai te oti?

¹³ Kae kāfai e hēai he toetū, ko tona uiga ko Keliho e hēki toe fakatū mai i te oti;

¹⁴ ma kāfai ia Keliho e hēki toe fakatū mai i te oti, ko tona uiga e hē aogā ta mātou tālakiga ma e hēai he mea e talitonu koutou ki ei.

¹⁵ Kae hili atu ai la, ka kavea ki mātou ma tagata faitala pepelo e uiga ki te Atua, auā ki mātou na lea na ia fakatūa ia Keliho mai te oti — ma kāfai e hako ko nā tino oti e hē toe fakatutūa mai te oti, ko tona uiga e hēki fakatūa e ia ia Keliho mai te oti.

¹⁶ Auā kāfai nā tino oti e hē fakatutūa, e hēki fakatūa foki la ia Keliho.

¹⁷ Ma kāfai ia Keliho e hēki fakatūa, tona uiga ko te koutou fakatuatua e māumau ma ko koutou koi nonofo lava i te agahala.

¹⁸ Ko tona uiga foki ko nā tino kua oti ka nae mulimuli ki a Keliho, kua malaia.

¹⁹ Kāfai ko to tātou fakamoemoe ki a Keliho e lelei oioti mo te ōlaga tēnei, ko tona uiga ka hili atu te fakaalofa o te tūlaga e i ei ki tātou i lo iētahi tino uma i te lalolagi.

²⁰ Kae ko te meamoni, ko Keliho kua toe fakatū mai te oti, ko te tino muamua ia kua pa ki he mea vēnei, ke fai ma fakamāoniga ki a te ki lātou kua momoe atu, ko ki lātou ka toe fakatutū mai te oti.

²¹ Auā e vē ona maua te oti e ala i he tagata, e vēnā lava foki ona maua te toetū e ala i he tagata.

²² Auā e vē ona pa ia tagata uma ki te oti ona ko to lātou hokotaga ma Atamu, ka vēnā foki lava ona toe fakatutū ia tagata uma ki te ola ona ko te lātou māfutaga ma Keliho.

²³ Kae ko tagata tau tokatahi ka fakatutū i he fakahologa e tūlaga tatau: E muamua lava ia Keliho, ma i te taimi e toe haele mai ai, oi hohoko ai ki ei ia tagata o te Atua.

²⁴ Oi pa mai ai te gataaga; ka fakatōkilalogia e Keliho ia tupu fakateagaga uma, nā taupulega ma mālohiaga uma, ma ka tuku atu e ia te Mālō ki te Atua te Tamana.

²⁵ Auā ko Keliho e tatau ke pule pea ke pa ki te taimi e fakatōkilalo ai e te Atua ona fili uma, ma tuku atu ai ki lātou ki lalo o ona vae.

²⁶ Ko te fili mulimuli ka fakatōkilalo, ko te oti.

²⁷ Auā e lea mai te tuhituhiga paia, “Kua tuku e te Atua nā mea uma ki lalo o ona vae.” E manino lele la ko te fakakupuga, “mea uma” e hē aofia ai te Atua e ia tukua nā mea uma ki lalo o te pule a Keliho.

²⁸ Kae kāfai nā mea uma kua uma te tuku ki lalo o te pule a Keliho, oi ka tuku atu ai loa e te Ataliki ia ia lava ki lalo o te pule a te Atua, tē na ia tukuagia ia mea uma ki lalo o ia; ma ka pule ai te Atua ki nā mea uma.

²⁹ E vē la ki nā tino e ki lātou papatihoa nā tino kua oti. He ā te fofou ki lātou ke ki lātou maua? Kāfai e hako, e vē oi lea iētahi ko nā tino kua oti e hē toe fakatutūa ki te ola, he ā la te papatiho ai nā tino kua oti?

³⁰ Kae ko ki tātou la — he ā te tuku ai pea o tātou ola ke lamatia i taimi uma?

³¹ Te kau uho, ko toku ola e lamatia pea lava i aho uma! Ko toku mitamita ona ko koutou i te māfutaga ma Keliho Iehu to tātou Aliki, kua mafai ai au ke lea vēnei atu.

³² Kāfai au na tau ma “manu fekai” i Efeho ona ni manatu fakatetagata, he ā nei ta aku kua maua ai? Kae kāfai nā tino oti e hē toe fakatutūa ki te ola, oi ka vē ai la ko te fakakupuga māhani, “Keina tātou kakai ma inu, auā taeao, ko ki tātou ka feoti.”

³³ Ia koutou nahe fakahehēa lele. “Ko te fakapipiki ki nā tino kino e fakahēaogā ai te lelei o te āmio.”

³⁴ Toe tuku tonu lelei outou māfaufau, ma ke nahe toe faia e koutou te agahala. Auā e i ei nā tino o koutou e hē ki lātou iloa te Atua. Ko au e lea vēnei atu kae ke lagona ai e koutou te mā.

Ko te Tino o te Tagata kāfai e Toetū mai te Oti

³⁵ E ono fehili vē he tino, “E vēhea oi toe fakatutū nā tino mai te oti? Ni itūkāigā tino vēhea to ki lātou te ka i ei?”

³⁶ Ko koe te favalevalea! Kāfai e totō e koe he fatu lākau i te kelekele, e hē mafai ke ola ake heiloga kua mate.

³⁷ Ma ko te mea e totō e koe ko te fatu oioti, pe he fuāhaito pe hētahi lava fua, kae e hē ko te lākau kātoa tēia e ola ake mulimuli ma tupu ki luga.

³⁸ E fōki e te Atua ki te fatu tēnā te tino e fofou ia ki ei; e fōki ki nā fatu takitahi tona lava ia tino.

³⁹ Ma ko te kanofi o nā mea uma e i ei te ola, e hē tutuha; ko nā tino ola e i ei tētahi o itūkāigā kanofi, ko nā manu vaefa e i ei tētahi, ko nā manulele e i ei tētahi, ma nā ika e i ei tētahi.

⁴⁰ Ma e i ei nā tino o nā mea uma i te vāteatea ma nā tino o nā mea uma i te lalolagi; ko te mānanaia o nā tino o nā mea i te vāteatea e kehekehe ma te mānanaia o nā tino o nā mea i te lalolagi.

⁴¹ Ko te la e kehe lava tona ia manaia, e kehe foki te manaia o te māhina, ma kehe te manaia o nā fetu; ma e pa foki lava ki nā fetu, e i ei nā itūkāigā mānanaia e kehekehe ai.

⁴² E vēnei la te mea ka pa ki ei kāfai nā tino oti e toe tutū mai i te oti. Kāfai te tino e tanu e fano e pala, kāfai e toe fakatū mai i te oti, e hē toe pala.

⁴³ Kāfai e tanu, e mātagā ma vāivai; kāfai e toe fakatū mai i te oti, ka mānaia ma mālohi.

⁴⁴ Kāfai e tanu, ko he tino fakatetagata tēnā; kāfai e toe fakatū mai i te oti, ka kavea ma tino fakateagaga. Kāfai e i ei he tino fakatetagata, e tatau foki ke i ei he tino fakateagaga.

⁴⁵ Auā e lea mai te tuhituhiga paia, “Ko te uluaki tagata, ia Atamu, na gaohia ma tagata ola”; ka ko te Atamu mulimuli, na kavea ma Agaga e puna mai ai te ola.

⁴⁶ E hē ko te fakateagaga te hau muamua, kae ko te fakatetagata, oi hau ai loa te fakateagaga.

⁴⁷ Ko te uluaki Atamu na gaohia i te kelekele, na hau mai te kelekele; ko te lua o Atamu na fanaifo mai te lagi.

⁴⁸ Ko ki lātou e ō te kelekele e vē ko te tino na gaohia i te kelekele; ko ki lātou e ō te lagi e vē ko te tino na fanaifo mai te lagi.

⁴⁹ E vē ona fōliga ki tātou ki te tino na gaohia i te kelekele, ke vēnā foki ona fōliga ki tātou ki tē na fanaifo mai te lagi.

⁵⁰ Ko te uiga o taku lea atu, te kau uho, ko te mea e gaohia i te kanofi ma te toto, e hēai hona inati i loto o te Mālō o te Atua, ma ko te mea e fano e pala, e hē mafai ke hē pala.

^51-52 Fakalogo ki te mealilo tēnei: ko ki tātou uma e hē feoti, kae kāfai te toe pu e ili, ko ki tātou uma ka hūia i he taimi vave lele, e vave e vē ko te kemo o te mata. Auā kāfai te pu e ili, ko nā tino kua oti ka toe fakatutū, ma hē toe oti lele, ma ka hūia uma ki tātou.

⁵³ Auā ko te mea e fano e pala e tatau ke hui ki he mea e hē mafai ke pala; ko te mea e fano e oti e tatau ke hui ki he mea e hē mafai ke oti.

⁵⁴ Kāfai la te mea tēnei e tupu, ma kua hūia te mea e fano e pala ki te mea e hē mafai ke pala, oi ka taunuku ai te kupu a te tuhituhiga paia e lea mai: “Ko te oti kua fakatōkilalo; ko te manumālō kua kātoatoa!”

⁵⁵ “Te Oti, tēfea tō manumālō? Te Oti, tēfea tō mālohi e fakaogohia ai?”

⁵⁶ Ko te mālohi o te oti e fakaogohia ai, e maua mai i te agahala; ko te mālohi o te agahala e maua mai i te Tūlāfono.

⁵⁷ Kae fakafetai ki te Atua, na ia tuku maia te manumālō e ala i to tātou Aliki ko Iehu Keliho!

⁵⁸ Ko te mea la ia, te kau uho pele, ke mau autou tutū ma ke nahe māluelue. Gālulue pea i autou gāluega mo te Aliki, auā tēnā kua koutou iloa e hēai he mea e koutou faia e tautua ai ki te gāluega a te Aliki, e hēai hona aogā.