1 Kolinito 14 - Tokelauan New Testament

Ko Iētahi Meaalofa mai te Agaga

¹ Ko te alofa la te tatau ke tauhiniō koutou ki ei. Ke naunau outou loto ki nā meaalofa fakateagaga, kae maihe lava te meaalofa tau ki te folafolaga o te fekau mai te Atua.

² Ko nā tino e tautatala i nā gagana kehekehe, e hē tautatala ki iētahi tino kae e tautatala ki te Atua, auā e hēai he tino e mālamalama ia te ki lātou. E tautatala i nā meamoni fakalilolilo i te mana o te Agaga.

³ Kae ko nā tino e ki lātou folafola te fekau mai te Atua, e tautatala ki tagata ma kavatu ki ei te fehoahoani, te fakamālohi, ma te fakamāfanafana.

⁴ Ko nā tino e tautatala i nā gagana kehekehe, e fehoahoani oioti ki a te ki lātou lava, ka ko nā tino e ki lātou folafola te fekau mai te Atua, e fehoahoani ki te Ekalehia kātoa.

⁵ Ko au e fofou ko koutou uma ke tautatala i nā gagana kehekehe; kae e hili atu toku fofou ke ia te koutou te meaalofa ko te folafolaga o te fekau mai te Atua. Auā ko te tino e ia folafola te fekau mai te Atua, e hili atu tona tāua i lo he tino e tautala i nā gagana kehekehe — vaganā e i ei he tino i te taimi tēnā, e ia mafaia oi fakamatala nā mea e tautala ai, kae ke mālamalama ai te Ekalehia kātoa.

⁶ Te kau uho, kāfai au e fanatu ma tautala i nā gagana kehekehe ki a te koutou, he ā nei te aogā o au ki a te koutou? E hēai lele he aogā, vaganā ai e kō kavatua ki a te koutou ni fakaaliga mai te Atua, pe ni itūkāigā mālamalama, pe ni fekau mai te Atua, pe ni akoakoga.

⁷ Mo he fakatakitakiga, ko nā lākau fai pehe e vē ko te fagufagu pe ko te kītala e hēai he ola — e vēhea oi iloa e he tino te fati o te pehe e ta, pe kāfai e hē manino lelei te tagi o nā nota?

⁸ Ma kāfai te tino e ia ilia te pu e logo ai te taua e hē ia fakamaninoa te tagi o te pu, ko ai te ka hāuni mo te taua?

⁹ E vēnā foki lava oi hē mālamalama he tino i te mea e lea ai koe, kāfai e hē manino te fekau e tautala ai koe i nā gagana kehekehe. Ko au kupu ka mou ki te ea!

¹⁰ E lahi lele ia gagana kehekehe i te lalolagi, ma e hēai he gagana fokotahi e aunoa ma hona uiga.

¹¹ Kae kāfai au e hē mālamalama i te gagana e fakaaogā, ko nā tino e tautatala ai ka kavea e vē ni tagata nukukehe i taku kikila, ma ka kavea au e vē he tagata nukukehe i te lātou kikila.

¹² Ona ko koutou e naunau ke koutou maua nā meaalofa mai te Agaga, e tatau ai koutou ke taumafai ke fakaaogā lahi atu nā meaalofa e fehoahoani ki te atiakega o te Ekalehia.

¹³ Ko te tino la e tautala i nā gagana kehekehe, e tatau ke tatalo mo te mana ke fakamatala ai nā kupu e tautala ai.

¹⁴ Auā kāfai au e tatalo i he gagana kehe, ko toku agaga e tatalo ka ko toku māfaufau e hē i ei.

¹⁵ He ā la te tatau ke kō faia? Ka tatalo au i toku agaga ma tatalo foki au i toku māfaufau; ka pehe au i toku agaga, ma ka pehe foki au i toku māfaufau.

¹⁶ Kāfai koe e fakafetai ki te Atua i te agaga oioti, e vēhea ona lea he tino kehe e i ei fakatahi i te māfutaga, “Amene” ki te fakaikuga o tau tatalo fakafetai, kāfai e hē mālamalama i au kupu e tautala ai koe?

¹⁷ E tuha lava pe he ā te lelei o tau tatalo fakafetai ki te Atua, kae e hēai lele he fehoahoani e maua e iētahi tino.

¹⁸ E fakafetai au ki te Atua ona e hili atu toku tautala ho i nā gagana kehekehe, i lo ho he tino o koutou.

¹⁹ Kae i nā faigālotu, e hili atu toku tautala i ni kupu e lima e mafai ke mālamalama ai, kae ke akoako ai iētahi tino, i lo toku tautala i ni kupu e hefulu afe i he gagana kehe.

²⁰ Te kau uho, koutou nahe vē ni tamaiti i outou manatunatuga; koutou ke vē ni pepe e tuha ai ma nā mea e kino, kae ke vē ni tino mātutua e tuha ai ma nā manatunatuga o koutou.

²¹ I nā Tuhituhiga Paia, kua tūhia ai vē, “E ala i nā tino e tautatala i nā gagana kehekehe ma laugutu o tagata nukukehe, ka tautala ai au ki oku tagata, kua vāgana ai te Aliki. Kae ui i tēnei, e hē fia fakalogo mai lava oku tagata ki a te au.”

²² Ko te mea ia, ko te meaalofa ko te tautala i gagana kehekehe, ko he fakamāoniga tēnā mo tagata e hē talitonu, kae e hē mo tagata e talitonu; ma ko te meaalofa ko te folafola o te fekau a te Atua, ko he fakamāoniga tēnā mo tagata e talitonu, kae e hē mo tagata e hē talitonu.

²³ Kāfai la te Ekalehia kātoa e maopoopo fakatahi ma kāmata oi tautatala ia tagata tau tokatahi i nā gagana kehekehe — ma kāfai ni tino kehe pe ni tino hē talitonu e ōmamai ki loto, e i na hē lea nei ko koutou e vālelea?

²⁴ Kae kāfai e folafola e ki lātou te fekau a te Atua kae ōmamai ni tino kehe ki loto, ka mautinoa lelei e ki lātou a lātou agahala, e ala i nā mea kua fakalogo ki ei. Ka fakamahino ki lātou i nā mea uma lele e fakalogo ki lātou ki ei,

²⁵ ka kaumai ki fafo mai o lātou loto o lātou manatunatuga lilo, ma ka fakapakukū ki o lātou tulivae ma ifo ki te Atua ma ta lātou takutinoga, “E moni lava ko te Atua e i kinei fakatahi ma koutou!”

Ko nā Tāpuakiga e Tatau ke Fakatūlaga Tonu

²⁶ Ko tēnei te uiga o taku lea atu, te kau uho. Kāfai koutou e māfuta mo autou tāpuakiga, e pehe tētahi, e akoako tētahi, e fakamatala e tētahi he fakaaliga mai te Atua, e folafola e tētahi he fekau i nā gagana kehekehe, ma tētahi la e fakamatala e ia te uiga o nā kupu e tautatala ai. Ko nā mea uma e tatau ke fai mo te atiakega o te Ekalehia.

²⁷ Kāfai he tino e tautala i nā gagana kehekehe, e tatau ke i ei ni tino e toka lua pe toka tolu kae hē hili atu ki luga, ke tautatala fakaholo takitahi, ma i ei he tino e ia fakamatalagia te uiga o nā kupu e tautatala ai.

²⁸ Kae kāfai e hēai he tino ke ia fakamatalagia, e tatau la te tino e tautala i nā gagana kehekehe ke nahe piha, ma ke tautala oioti ki a te ia lava ma te Atua.

²⁹ E tatau ke tautatala he toka lua pe he toka tolu kua fōki ki ei te fekau a te Atua, kae fuafua tatau e iētahi tino nā mea e lea ai ki lātou.

³⁰ Kae kāfai he tino i loto o he tāpuakiga e ia maua he fekau mai te Atua, e tatau ke tāofi loa lava te tino e tautala.

³¹ E mafai e koutou uma oi folafola te fekau a te Atua fakaholo tau tokatahi, kae ke iloa uma ai e koutou ma fakamākekeke ai.

³² Ko te meaalofa ko te folafolaga o te fekau a te Atua, e tatau ke i lalo o te kikilaga a te tino e ia folafolagia,

³³ auā e hē fofou te Atua ko ki tātou ke i he tūlaga fakahētonu, kae ke maua i te fealofani ma te fīlēmū. E vē ko te tūlaga e i ei nā Ekalehia uma a tagata o te Atua,

³⁴ e tatau ia fafine ke nonofo fīlēmū nahe kīkī i nā tāpuakiga. E fakahā ki lātou oi tautatala; e vē oi lea mai te Tūlāfono Iutaia, e hē tatau ke kavea ki lātou ma takitaki.

³⁵ Kāfai e fia mālamalama ki lātou i he mea, e tatau ke fehili ki a lātou tāne i te fale. Ko he mea mātagā he fafine ke tautala i loto o he māfutaga a te Ekalehia.

³⁶ Ko te kupu a te Atua e hēki kui mai ia te koutou, ma e hē nā ko koutou oioti nā tino na kaumai ki ei.

³⁷ Kāfai he tino e manatu ko ia ko he pelofeta, pe kua ia te ia he meaalofa fakateagaga, e tatau ke ia hāfia ko te mea e tuhi atu ai au, he fakatonuga e a te Aliki.

³⁸ Kae kāfai e hē talia e ia te mea tēnei, e hē tatau foki la ke talia e koutou te tino tēnā.

³⁹ Ko te mea ia te kau uho, ke naunau outou loto ki te folafolaga o te fekau a te Atua, kae nahe fakahā te tautala i nā gagana kehekehe.

⁴⁰ Ko nā mea uma e tatau ke fai i he auala e talafeagai ma tūlaga tonu.