1 Kolinito 13 - Tokelauan New Testament

Ko te Alofa

¹ Kāfai au e tautala i gagana a tagata ola ma agelu kae e hē ia te au te alofa, ko taku lāuga e hēai he mea e kehe ai ma te pakē o he lali pe ko te tatagi o he logo.

² Kāfai e ia te au te mana e folafola ai te fekau mai te Atua; kāfai au e mālamalama i nā mealilo uma ma te poto; kāfai e ia te au te fakatuatua e mafai ai ke fakagaoi ia mauga — kae e hē ia te au te alofa, e hēai hoku aogā.

³ Kāfai e fōki e au aku mea uma mā iētahi tino, ma tuku atu e au toku tino ke huhunu — kae hē ia te au te alofa, e hēai he aogā o tēnei mea mo au.

⁴ Ko te alofa e onohai ma agalelei; e hē fuā pe fakamaualuga pe fāfia;

⁵ ko te alofa e hē āmio kino pe fakapito pe fakafiufiu; ko te alofa e hē ia mātaua nā mea hehē a iētahi tino e fai;

⁶ ko te alofa e hē fiafia ki te kino, kae fiafia ki te meamoni.

⁷ Ko te alofa e hē fiu gōfie; ma e hē uma lele tona fakatuatua, tona fakamoemoe, ma tona onohai.

⁸ Ko te alofa e fakavavau. E i ei te mana e folafola ai te fekau mai te Atua, kae e hē tūmau; e i ei te mana e tautatala ai i nā gagana kehekehe, kae e fano e uma; e i ei te mālamalama, kae e fano e mavae.

⁹ Auā ko te mālamalama o ki tātou, ma te mana e ki tātou folafola ai te fekau mai te Atua, e hē kātoatoa;

¹⁰ kae kāfai tē e kātoatoa te lelei e hau, oi ka kave kehea loa te mea e hē kātoatoa.

¹¹ Ka koi tamaiti au, ko taku tautala, ko oku lagona, ma oku manatu nae e o he tamaiti; nei ko au kua matua, kua hē toe kō fakaaogāgia oku uiga fakatamaiti.

¹² Ko te mea e kitea e ki tātou i te taimi nei e vē he ata nenefu ki loto o he fakaata; kae i he taimi mulimuli oi ki tātou kitea lelei ai i te fakafehagai ma ia. Ko te mea kua iloa e au i te taimi nei e hē kātoatoa; kae ka kātoatoa mulimuli — e kātoatoa e vē ko te kātoatoa o te iloa o te Atua e uiga ki a te au.

¹³ Ko nā mea la iēnei e tolu, ko te fakatuatua, ko te fakamoemoe ma te alofa; kae ko te mea e hili i nā mea iēnei, ko te alofa.