1 Kolinito 12 - Tokelauan New Testament

Ko nā Meaalofa mai te Agaga Paia

¹ E tuha ai ma te mea na tuhi mai ai koutou e uiga kinā meaalofa mai te Agaga Paia. Te kau uho, ko au e fofou ke iloa e koutou te meamoni e uiga kinā mea iēnei.

² E vē ona koutou iloa i te taimi ka koi fakapaupau ai koutou, ko koutou nae fakahehē i nā itū e lahi, e ala i te koutou ifo ki nā tupua e hēai ni ola.

³ Ko te mea ia, ko au e fofou ke koutou iloa e hēai he tino e takitakia e te Agaga o te Atua e mafai ke “fetū e ia ia Iehu!” ma e hēai he tino e ia mafai oi folafola “Ko Iehu ko te Aliki,” pe kāfai e hē takitakiagia e te Agaga Paia.

⁴ E i ei nā itūkāigā meaalofa fakateagaga kehekehe, kae ko te Agaga lava e fokotahi te maua mai ai.

⁵ E i ei nā itūkāigā auala kehekehe e tautua ai, kae ko te Aliki lava e fokotahi te tautua ki ei.

⁶ E i ei nā itūkāigā mālamalama kehekehe e fakatino ai nā tautuaga, kae ko te Atua lava e fokotahi te maua ai te mālamalama e tagata uma, mo a lātou gāluega e tautua ai.

⁷ Ko te fakatahi mai o te Agaga, i hētahi itū, e kitea e ala i tagata tau tokatahi, mo te lelei o tagata uma.

⁸ E fōki e te Agaga ki tētahi tino te iloa ke tautala ai i te poto, kae ki tētahi tino e fōki ki ei e te Agaga lava e fokotahi te iloa ke tautala ai i te atamai.

⁹ Ko te Agaga foki lava tēnei e tahi te ia fōkia te fakatuatua ki tētahi tino, kae ki tētahi e ia fōkia ki ei te mana ke fakamālōlō ai nā tauale.

¹⁰ E fōki e te Agaga ki tētahi tino te mana ke fai ai nā vāvega; ki tētahi te folafolaga o te fekau a te Atua; ma ki tētahi te mālamalama e ia iloa ai te kehekehega o nā meaalofa e kaumai e te Agaga, ma nā meaalofa e hē mai ia te ia. Ki tētahi tino e fōki ki ei te poto ke tautala ai i nā gagana kehekehe, ma ki tētahi, e fōki ki ei te poto ke fakamatala ai nā mea e tautatala ai.

¹¹ Kae ko te Agaga lava e fokotahi te ia faia nā mea uma iēnei; i tana lava filifiliga, e ia fōki ai nā meaalofa kehekehe ki tagata tau tokatahi.

E Fokotahi te Tino kae Lahi ona Vāega

¹² Ko te tino o Keliho e lahi ona vāega, e vē foki lava ko te tino o ho hētahi.

¹³ E vēnā foki la ki tātou uma, pe ko ki tātou ni tagata Iutaia pe ni tagata nukukehe, pe ni pologa pe ni tagata haoloto, ko ki tātou uma kua papatiho e te Agaga e fokotahi ki loto o te tino e fokotahi, ma kua tuku e te Atua te Agaga tēnei e fokotahi ki loto o nā loto o ki tātou uma lele.

¹⁴ Auā ko te tino o te tagata e hē fokotahi kae lahi ona itūtino.

¹⁵ Kāfai te vae e lea, “Ona ko au e hē ko he lima, oi ko au e hē o te tino,” e hē mafai ke hē kavea ai te tapuvae ko he itūtino e o te tino.

¹⁶ Ma kāfai te taliga e lea, “Ona ko au e hē ko he mata, oi ko au e hē o te tino,” e hē mafai ke hē kavea ai te taliga ko he itūtino e o te tino.

¹⁷ Kāfai te tino kātoa kua nā ko he mata, e vēhea la ona lagona e ia? Ma kāfai kua nā ko he taliga, e vēhea la ona hogitia e ia?

¹⁸ Kae ko te mea e i ei, nā tuku lava e Atua nā itūtino kehekehe o te tino ki te mea na fofou ia ki ei.

¹⁹ E hē mafai ke i ei he tino kāfai e fokotahi oioti lava tona itūtino!

²⁰ Kae ko te mea e i ei, e lahi nā itūtino kae fokotahi te tino.

²¹ Ko te mea ia, e hē mafai te mata ke lea ki te lima, “E hē ko manakomia koe!” E hē mafai foki te ulu ke lea ki te vae, “E hē ko manakomia koe!”

²² Ko te meamoni, e hē mafai ki tātou ke ola e aunoa ma nā itūtino o te tino e vē e hili te vāivai i te tātou kikila;

²³ ma ko nā itūtino e manatu ki tātou e hē tāua lahi ko nā itūtino ia e lahi atu to tātou taimi e fano ki ei i te tauhiga fakalelei; kae ko nā itūtino e mātagā i te kikila, e fai ki ei nā tauhiga fakapitoa ma te fakaaloalo;

²⁴ ni faiga e hē manakomia e nā itūtino e hili atu te mānanaia. Ko te Atua lava te na ia tuku fakatahia te tino i he faiga ke ātili lahi ai ni vīkiga mo nā itūtino e tatau ke maua e ki lātou.

²⁵ E hē tatau la ke i ei he fevaevaeakiga i te tino, kae ko nā itūtino kehekehe uma o ia, e tatau ke tutuha te loto tuahā o tētahi ki tētahi.

²⁶ Kāfai he itūtino e fokotahi o te tino e āfāina, ko iētahi itūtino uma o te tino e āfāina fakatahi ma ia; kāfai he itūtino e vīkia, ko iētahi itūtino uma e vīkia fakatahi ma ia.

²⁷ Ko koutou uma ko te tino o Keliho, ma ko koutou tau tokatahi ni itūtino e o ia.

²⁸ Kua tōfia e te Atua i loto o te Ekalehia: muamua ko nā apohitolo, lua ko nā pelofeta, ma tona tolu ko nā faiakoga; oi hohoko ai nā tino fai vāvega, hohoko ai ki lātou kua tuku ki ei te mana ke fakamālōlō ai nā tauale pe ke fehoahoani ai ki iētahi tino pe ke fakatonu ai ki lātou, pe ke tautatala ai i nā gagana kehekehe.

²⁹ E hē ko ki lātou uma ni apohitolo pe ni pelofeta pe ni faiakoga. E hē ko tagata uma e ia te ki lātou te mana ke fai ai ni vāvega

³⁰ pe fakamālōlō ai ni tauale pe tautatala ai i ni gagana kehekehe pe fakamatala ai ni mea kua uma te tautatala ai.

³¹ Ko te mea ia, ke naunau outou loto ki nā meaalofa e hili atu te tāua. Ko te mea e hili te lelei, ka fakahino atu e au i te auala tēnei.