1 Kolinito 11 - Tokelauan New Testament

¹ Fakatakitaki mai la ki a te au, e vē oi fakatakitaki au ki a Keliho.

Tūlāfono mo nā Tāpuakiga

² Ko au e fakamālō atu ki a te koutou auā e koutou manatua pea lava au ma tauhi ki aku akoakoga na tuku atu ki a te koutou.

³ Kae ko au e fofou ke koutou manatua ko te ulu o ho he tino ko Keliho, ko te ulu o he fafine ko tana tāne, ma ko te ulu o Keliho ko te Atua.

⁴ Ko te mea ia, ho he tamāloa e tatalo pe ia folafolagia te fekau a te Atua i he tāpuakiga kae tatao tona ulu, kua ia takuvaleagia tona ulu, ko Keliho tēnā.

⁵ Ma ho he fafine e tatalo pe ia folafolagia te fekau a te Atua i he tāpuakiga kae hē tataoa tona ulu, kua takuvalea e ia tona ulu, ko tana tāne tēnā; e hēai he mea e kehe ai ia ma he fafine kua tafi tula tona ulu.

⁶ Kāfai he fafine e hē tataoa tona ulu, e tatau la ke tipi tona laulu. Ona ko he mea e takuvalea ai kāfai he fafine e tafi tula tona ulu pe tipi tona laulu, e tatau ai la ke tatao tona ulu.

⁷ Ko te tamāloa e hē tatau ke tatao tona ulu, ona ko ia te kitea ai ia fōliga ma te mamalu o te Atua. Kae ko te fafine e kitea ai te mamalu o te tamāloa;

⁸ auā ko te tagata e hēki gaohia mai te fafine, kae ko te fafine mai te tagata.

⁹ E hēki gaohia foki te tagata ona ko te fafine, kae ko te fafine na gaohia ona ko te tagata.

¹⁰ Ona la ko te kau agelu, e tatau ai te fafine ke tatao tona ulu, ke iloa ai ko ia ei lalo o te pule a tana tāne.

¹¹ Kae i to tātou ōlaga i te Aliki, ko te fafine e hē tūtokatahi mai te tagata, e hē tūtokatahi foki te tagata mai te fafine.

¹² Auā e vē ona gaohia te fafine mai te tagata, e vēnā foki ona fānau mai te tagata i te fafine; ma ko te Atua te na ia faia ia mea uma.

¹³ Fuafua ake la e koutou; e tūlaga tatau ke tatalo he fafine ki te Atua i loto o he tāpuakiga kae hē tataoa tona ulu?

¹⁴ E hē ko te natula o mea lava te akoako atu ko te laulu loloa o he tagata e takuvalea ai lava ia,

¹⁵ kae ki te fafine, ko he mea tēnā e fāfia ai? Auā ko tona laulu e fōki ki ei ke fakaaogā e vē he pulupulu.

¹⁶ Kae kāfai he tino e fakafehiligia e ia te mea tēnei, oi oti lava te mea e lea atu ai au, e hēai ni a tātou tū māhani i nā mea tau tāpuakiga, ma e vēnā foki iētahi Ekalehia a te Atua.

Ko te Kaiga a te Aliki

¹⁷ Kae i nā fakatonuga iēnei i lalo, ko au e hē fakamālō atu ki a koutou, auā ko autou māfutaga tau tāpuakiga, e hē ke lelei ātili ai kae ke kino ātili ai.

¹⁸ Ko te mea muamua, kua fakalogo au kāfai e fai autou māfutaga ko koutou e fevaevaeaki; ma ko au e talitonu e hako he vāega o nā mea iēnei kua fakalogo au ki ei.

¹⁹ (E hē taumate e i ei ni fekehekeheakiga ia te koutou, kae ke iloa ai pe ko ai o koutou e hako.)

²⁰ Kāfai koutou e māfuta fakatahi, e hē ko te Kaiga a te Aliki te kakai ai koutou.

²¹ Auā kāfai koutou e kakai, e kai tāfakavave te tino lava ia, ma mākokona ai iētahi kae konanā iētahi.

²² E hēai nei ni fale mo koutou lava ke kakai ma inu ai koutou? Pe ko koutou e inoino ki te Ekalehia a te Atua, ma fofou koutou ke fakamahiahi nā tino mātitiva? Ka vēhea atu nei au? Ka fakamālō atu nei au ki a te koutou? Hēai! E hē faia e au he mea vēnā!

²³ Auā ko nā akoakoga na kō kavatua ki a te koutou, na tuku mai e te Aliki ki a te au: i te pō na fakalata ai te Aliki ko Iehu, na tago ai ki he falaoa,

²⁴ kua fakafetai ki te Atua, oi tavaevae ai ma lea vē atu, “Ko toku tino tēnei, kua hāunia mo koutou. Fai te mea tēnei e koutou, ke fai ma fakamanatuga ki a te au.”

²⁵ Na vēnā foki i te kua uma o te kakai, kua tago ki te ipu ma vē atu tana kupu, “Ko te ipu tēnei o te feagaiga fou a te Atua, kua fakamau fakailoga i toku toto. Ho he taimi e inu ai koutou ki ei, ke fai tēnā ma fakamanatuga ki a te au.”

²⁶ Ko te uiga o te mea tēnei, ho he taimi lava e kakai ai koutou ki te falaoa ma inu ki te ipu, e folafola e koutou te maliu o te Aliki ke pa ki te taimi e toe afio mai ai.

²⁷ Kae ko ai lava e kai ki te falaoa a te Aliki ma inu ki tana ipu i he faiga e takuvalea ai ia, kua agahala ia ona ko tana mea kino kua fai ki te tino ma te toto o te Aliki.

²⁸ Ko te mea ia, e tatau ke muamua iloilo ifo e te tino tona lava loto, oi kua kai ai ki te falaoa ma inu ki te ipu.

²⁹ Auā kāfai e hē talia e koe te uiga o te tino o te Aliki i te taimi e kai ai koe ki te falaoa ma inu i te ipu, kua kē tuku atua lava koe ki te fakamahinoga.

³⁰ Ko te mea ia e fai vāivai ma tauaale ai te tokalahi o koutou, ma feoti ai iētahi.

³¹ Anei e ki tātou mafaia oi hukehuke ifo muamua ki o tātou loto, ko ki tātou e hē kavea ki te fakamahinoga a te Atua.

³² Kae ko ki tātou e fakamahino ma fakahala e te Aliki, kae ke nahe fakahalagia fakatahi ai ki tātou ma te lalolagi.

³³ Ko te mea ia, te kau uho, kāfai koutou e maopoopo ke kakai i te Kaiga a te Aliki, fakatali ke maopoopo fakatahi uma mai.

³⁴ Ma kāfai he tino o koutou e fia kaia, e tatau ke kai i te fale, kae ke nahe lavea ai ia i te fakamahinoga a te Atua ka koi maopoopo koutou. Ko iētahi mea, ka fakatonu atu koutou e au kāfai au e pa atu.