1 Kolinito 1 - Tokelauan New Testament

¹ Mai ia Paulo, tē na kalagagia e tuha ai ma te finagalo o te Atua ke kavea ma apohitolo a Keliho Iehu, ma to tātou uho ko Hohetene —

² Ki te Ekalehia a te Atua i Kolinito, ki a te koutou uma kua kalagagia e te Atua ke kavea ma ona tagata, i te māfutaga ma Keliho Iehu, fakatahi ai ma nā tino uma lele, pe ko fea lava te mea e tāpuaki ai ki to tātou Aliki ko Iehu Keliho, te Aliki o ki lātou vēnā ma ki tātou.

³ Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.

Fakamanuiaga e maua ia Keliho

⁴ E fakafetai pea lava au ki te Atua mo koutou, ona ko tona alofa tūnoa kua maua e koutou e ala ia Keliho Iehu.

⁵ Auā ko te māfutaga a koutou ma Keliho kua maua ai e koutou te tamaokāiga i ho he mea, e aofia ai nā kupu e tautatala ai koutou ma te mālamalama lautele.

⁶ Ko te fekau e uiga ki a Keliho kua mautū lelei ia te koutou,

⁷ ma e hēki i ei lele he meaalofa fakateagaga e fokotahi ko hēki koutou maua, ka koi fakatalitali koutou ke fakailoa mai e te Atua to tātou Aliki ko Iehu Keliho.

⁸ Ka tauhia pea lava koutou e ia ke pa ki te ikuga, kae ke nahe i ei lele he mea e hehē ai koutou, i te Aho o to tātou Aliki ko Iehu Keliho.

⁹ Ko te Atua e fakamāoni, te Atua na kalaga atu ki a te koutou ke māfuta fakatahi ma tona Ataliki ko Iehu Keliho, to tātou Aliki.

Ko nā Fevaevaeakiga i loto o te Ekalehia

¹⁰ I te igoa o to tātou Aliki ko Iehu Keliho, e lea atu ai au ki a te koutou oku uho, ma toku loto naunau, ko koutou ke tahi i nā mea e tautatala ai koutou, kae ke nahe i ei ai ni fevaevaeakiga ia te koutou. Ke tahi kātoatoa koutou, tahi te manatu ma tahi te fakamoemoe.

¹¹ Auā e i ei nā tino o te kāiga o Koloe, kua ki lātou taku hako maia ki a te au, ko koutou oku uho, e tauaimiha.

¹² Ko te uiga o taku lea atu: Ko koutou tau tokatahi, e kehekehe nā mea e tautatala ai koutou. E lea tētahi, “Ko au e mulimuli ki a Paulo”; ko tētahi, “Ko au e mulimuli ki a Apolo”; ko tētahi, “Ko au e mulimuli ki a Kepa”; ma tētahi, “Ko au e mulimuli ki a Keliho.”

¹³ Ko Keliho kua uma te tavaevae ki ni vāega! Ko Paulo nei te na mate i luga o te hātaulo mo koutou? Na papatiho nei koutou i te igoa o Paulo?

¹⁴ Ko au e fakafetai ki te Atua e hēai he tino o koutou na kō papatihoa, vaganā ai ia Kilihipo ma Kaio.

¹⁵ E hēai la he tino e mafai ke lea ko koutou na papatiho i toku igoa.

¹⁶ (Io, na papatiho foki e au ia Hetefana ma nā tino o tona kāiga; kae e hē kō manatua pe i ei hētahi tino na kō papatihoa.)

¹⁷ E hēki uga maia au e Keliho ke papatiho. Na uga mai au e ia ke folafola te Tala Lelei, ma ke folafola e aunoa ma te fakaaogāgia o te gagana a te poto fakatetagata, kae ke mautinoa ai ko te mate o Keliho i luga o te hātaulo, e hē mafai ke uma tona mālohi.

Ko Keliho te Mana ma te Poto o te Atua

¹⁸ Auā ko te fekau e uiga ki te mate o Keliho i luga o te hātaulo, e hēai hona uiga ki a te ki lātou e tuku e fakaumatia; kae mo ki tātou e tuku e fakaolagia; ko te mana tēnā o te Atua.

¹⁹ E lea mai te tuhituhiga paia, “Ka fakahēaogā e au te poto o tagata popoto ma kave kehea te mālamalama o tagata mālamalama.”

²⁰ Ko te mea ia, he ā te pa ki ei ia tagata popoto? pe ko tagata mālamalama? pe ko tagata popoto fai manatu o tēnei lalolagi? Kua fakaalia e te Atua ko te poto o te lalolagi ko te valea tēnā.

²¹ Auā ko te poto o te Atua na ia faia ai ke nahe iloa ia e tagata i ho lātou lava poto. Kae e ala i te fekau e folafola e ki mātou, tēia e lea nā tino e “valea,” na tonu ai i te Atua ke fakaola ki lātou e talitonu.

²² Ko tagata Iutaia e fofou ki ni vāvega ke fai ma fakamāoniga, ka ko tagata Eleni e hakilikili ki te poto.

²³ Kae ko ki mātou, e ki mātou tālakia ko Keliho na fakahātaulo. He fekau tēnei e feita ki ei ia tagata Iutaia ma lea ia tagata nukukehe e valea;

²⁴ kae mo ki lātou kua kalagagia e te Atua, nā tino Iutaia fakatahi ma nā tino nukukehe, ko te fekau tēnei ko Keliho. Ko ia ko te mana o te Atua ma te poto o te Atua

²⁵ Auā ko te mea e fōliga ko te valea o te Atua, ko te poto tēnā e hili lele atu i lo te poto o te tagata, ko te mea foki e fōliga ko te vāivai o te Atua, ko te mālohi tēnā e hili lele atu i lo te mālohi o te tagata.

²⁶ Ko te mea ia oku uho, māfaufau pe nae ni tino vēhea koutou i te taimi na kalaga atu ai te Atua ki a te koutou. I te kikila fakatetagata, e hē tokalahi koutou nae popoto, e hē tokalahi nae i ni tūlaga maualuluga, ma nae hē tokalahi na tupuga mai i ni kāiga aliki.

²⁷ Na filifili lava e te Atua te mea e talitonu te lalolagi e valea, kae ke takuvalea ai nā tino popoto, ma na filifili e ia te mea e talitonu te lalolagi e vāivai, kae ke takuvalea ai nā tino e i ni tūlaga mālolohi.

²⁸ Na filifili e ia te mea e fakatauva ma inoino ki ei te lalolagi ma manatu ai e hēai hona uiga, kae ke fakahēaogā ai nā mea e manatu te lalolagi e tāua.

²⁹ Ko tona uiga, e hēai lele he tino e tatau ke fāfia i mua o te Atua.

³⁰ Kae kua kaumai koutou e te Atua ki te māfutaga ma Keliho Iehu, ma faia e te Atua ia Keliho ke kavea ma o tātou poto. Ona ko Keliho, kua mafai ai ke fakalelei to tātou va ma te Atua; kua fai ai ki tātou ma tagata o te Atua, ma kua maua ai e ki tātou te haolotoga.

³¹ Ko te mea ia, e vē oi lea mai te tuhituhiga paia, “Ko ai lava e fia fakaali hona fāfia, e tatau ke fāfia ki te mea kua faia e te Aliki.”