1 Ioane 5 - Tokelauan New Testament

Ko te Fakatuatua e Fakatōkilalo ai te Lalolagi

¹ Ko ai lava e talitonu ko Iehu ko te Mehia, ko he fānau tēnā e a te Atua; ma ko ai lava e alofa ki he tamana, e alofa foki ki tana fānau.

² Ko tēnei te mea e iloa ai ko ki tātou e alolofa ki nā fānau a te Atua: kāfai ki tātou e alolofa ki te Atua ma uhitaki ki ana fakatonuga.

³ Auā ko te alofa o ki tātou ki te Atua e kitea i to tātou uhitaki ki nā fakatonuga kua tuku mai ki a te ki tātou. Ma ko ana fakatonuga e hē faigatā mo ki tātou,

⁴ auā ho he fānau a te Atua e mafai e ia oi fakatōkilalo te lalolagi. Ma ko te manumālō e fakatōkilalo ai te lalolagi e maua e ki tātou e ala i to tātou fakatuatua.

⁵ Ko ai la te ia mafaia oi fakatōkilalo te lalolagi? E nā ko te tino lava e talitonu ko Iehu ko te Ataliki o te Atua.

Ko te Molimau e uiga ki a Iehu Keliho

⁶ Ko Iehu Keliho ko te tino ia na hau ma te vai mo tona papatihoga, ma te toto o tona mate. E hē nā ko te vai te na hau ma ia, kae ko te vai ma te toto. Ma ko te Agaga lava ia te molimau ki te moni o te mea tēnei, auā ko te Agaga ko te meamoni.

⁷ E toka tolu ia molimau:

⁸ ko te Agaga, ko te vai, ma te toto; ma ko te toka tolu tēnei e tutuha lava te lātou molimau.

⁹ E talia e ki tātou te molimau a tagata, kae ko te molimau a te Atua e hili atu lele te mālohi, ma kua molimau ia e uiga ki tona Ataliki.

¹⁰ Ko te tino la e talitonu ki te Ataliki o te Atua, kua i tona loto te molimau tēnei; kae ko te tino e hē talitonu ki te Atua, kua ia taku pepelogia te Atua, auā e hē talitonu ki te molimau a te Atua e uiga ki tona Ataliki.

¹¹ Ko tēnei te molimau: Kua fōki mai e te Atua ki a te ki tātou te ola e hē gata, ma ko te ola tēnei e maua e ala i tona Ataliki.

¹² Ko ai lava kua ia te ia te Ataliki, kua ia te ia te ola; ko ai lava e hē ia te ia te Ataliki o te Atua, e hē ia te ia te ola.

Ko te Ola e Hē Gata

¹³ Ko au e tuhi atu vēnei ki a te koutou kae ke koutou iloa kua maua e koutou te ola e hē gata — koutou iēnā kua talitonu ki te Ataliki o te Atua

¹⁴ Ma e ia te ki tātou te loto mautinoa i te hokotaga a ki tātou ma te Atua, kāfai ki tātou e gogō atu ki a te ia i ho he mea e tuha ai ma tona finagalo, e ia lagona mai ki tātou.

¹⁵ E ia lagona mai ki tātou i ho he taimi e gogō atu ai ki tātou ki a te ia. E iloa e ki tātou ko te mea tēnei e hako, ma ko ho he mea lava e gogō atu ai ki tātou ki a te ia, e fōki mai e ia.

¹⁶ Kāfai e kē kitea hō uho e ia faia he agahala e hē iku ai ia ki te oti, e tatau koe ke tatalo ki te Atua oi fōki ai e te Atua te ola ki tō uho. Ko te mea tēnei e fakaaga ki nā tino ko a lātou agahala e hē iku ai ki lātou ki te oti. Kae e i ei te agahala e iku ai te tino ki te oti, ma ko au e hē lea atu ko koutou ke tatalo ki te Atua e uiga ki te mea tēnā.

¹⁷ Ko nā mea hehē uma lele ko te agahala tēnā, kae e i ei te agahala e hē iku ki te oti.

¹⁸ E iloa e ki tātou e hēai ni fānau a te Atua e fai pea lava e ki lātou te agahala, auā e puipuia ki lātou e te Ataliki o te Atua, ma e hē mafai ke paki te lima o te Tino Kino ki a te ki lātou.

¹⁹ E iloa e ki tātou ko ki tātou e o te Atua e ui lava ko te lalolagi kātoa e i lalo o te pule a te Tino Kino.

²⁰ E iloa e ki tātou ko te Ataliki o te Atua kua hau ma kua ia fakailoa maia te Atua moni. Ko ki tātou e ola i te māfutaga ma te Atua moni — i te māfutaga ma tona Ataliki ko Iehu Keliho. Ko tēnei te Atua moni, ma ko tēnei te ola e hē gata.

²¹ Taku fānau, koutou ke tau mamao ma nā atua pepelo!