1 Ioane 3 - Tokelauan New Testament

Ko nā Fānau a te Atua

¹ Kikila ki te lahi lele o te alofa o te Tamana ki a te ki tātou! Ko te lahi o tona alofa kua takua ai ki tātou ni fānau e a te Atua — ma e moni lava te mea tēnei. Ko te mea ia e hē iloa ai e te lalolagi ki tātou, ona e hē ki lātou iloa te Atua.

² Te kau uho pele, ko ki tātou ni fānau e a te Atua i te taimi nei, kae ko hēki manino pe vēhea te tūlaga ka pa ki tātou ki ei. Kae e ki tātou iloa, kāfai ia Keliho e haele mai, ko ki tātou ka vē lava ko ia; auā ka ki tātou kiteagia ia i te tūlaga tonu lava e i ei ai ia.

³ Ko nā tino uma e i ei to lātou fakamoemoe ia Keliho, ka fakamamā pea lava ki lātou e ki lātou, e vē foki lava ko Keliho e mamā.

⁴ Ko ai lava he tino e agahala, kua hala ia ona kua ia holia te tūlāfono a te Atua, auā ko te agahala ko he holi tūlāfono tēnā.

⁵ E iloa e koutou ko Keliho na hau ke kave kehe nā agahala, ma e hēai lele hana agahala.

⁶ Ma e hēai la he tino e ola i te māfutaga ma Keliho kae fai pea e ia te agahala; kae ko ai lava e ia faia pea lava te agahala, ko hēki ia kiteagia lele pe ia iloagia ia Keliho.

⁷ Taku fānau, ia koutou lele nā fakahehēa e he tino! Ko ai lava e fai e ia te mea e tonu, ko ia tēnā e āmiotonu, e vē lava ko Keliho e āmiotonu.

⁸ Ko ai lava e ia faia pea lava te agahala, ko ia tēnā e o te Tiāpolo, auā ko te Tiāpolo na agahala mai lava i te kāmataga. Ko tēnei tonu lava te mea na hula mai ai te Ataliki o te Atua, ke fakahēaogā nā gāluega a te Tiāpolo.

⁹ Ko nā fānau a te Atua e hē ki lātou faia pea lava te agahala, auā ko te natula o te Atua ei loto ia te ki lātou; ma e ona ko te Atua ko to lātou Tamana, e hē mafai ai ki lātou ke agahala pea lava.

¹⁰ Ko tēnei la te mea e kehekehe ai nā fānau a te Atua ma nā fānau a te Tiāpolo: ko nā tino uma e hē ki lātou faia te mea e hako pe hē alolofa ki iētahi tino, e hē ni fānau e a te Atua ki lātou.

Ke Alofa Tētahi ki Tētahi

¹¹ Ko te fekau na fakalogo koutou ki ei mai te kāmataga ko tēnei: e tatau ki tātou ke alofa tētahi ki tētahi.

¹² Ki tātou nahe vē ko Kaino; na tāmate e ia tona uho ko Apelu ona ko ia ko he fānau e a te Tino Kino. He ā te na tāmate ai e Kaino tona uho? Auā nae kino nā mea nae ia faia, kae lelei nā mea nae fai e tona uho.

¹³ Ko te mea ia te kau uho, koutou nahe fakatēkia kāfai te lalolagi e inoino atu ki a te koutou.

¹⁴ E iloa e ki tātou ko ki tātou kua olo kehe mai i te tūlaga nae vē ai ki tātou kua oti, ki te ola, auā ko ki tātou e alolofa ki o tātou uho Kelihiano. Ko ai lava la he tino e hē alofa, koi lalo lava ia o te pule a te oti.

¹⁵ Ko ai lava he tino e inoino ki hētahi tino, he tāmate tino tēnā, ma kua iloa e koutou e hēai he tāmate tino e ia te ia te ola e fakavavau.

¹⁶ Ko tēnei te mea e iloa ai e ki tātou te mea e takua ko te alofa: Ko Keliho na fōki tona ola mo ki tātou. Ko ki tātou foki la, e tatau ke fōki o tātou ola mo iētahi uho Kelihiano!

¹⁷ Kae kāfai he tino maukoloa e ia kitea he uho pe he tuafafine e fofou ki he fehoahoani, kae hē ia te ia he loto alofa ki ei, e vēhea oi lea te tino tēnā ko ia e alofa ki te Atua?

¹⁸ Taku fānau, ki tātou nahe alolofa i ni kupu ma ni tala, kae ia tātou gāluega e fai ma te alofa moni.

Lototoa i mua o te Atua

¹⁹ Ko nā mea la iēnā ka iloa ai ko ki tātou e i te meamoni, ma e lagona e o tātou loto te toka mālie i mua o te Atua.

²⁰ Kae e tuha foki lava pe hē toka lelei o tātou loto, ko te Atua e hili lele atu tona mālohi i lo o tātou loto, ma e ia iloa ia mea uma lele.

²¹ Te kau uho pele, kāfai e lagona e o tātou loto te toka lelei i mua o te Atua, ka maua e ki tātou te loto mākeke ke fakatafapili ai ki a te ia.

²² E maua e ki tātou mai ia te ia, ho he mea e gogō atu ki tātou ki ei, auā ko ki tātou e uhitaki ki nā mea e fakatonu mai e ia, ma e fai e ki tātou nā mea e fiafia ia ki ei.

²³ Ko te Atua e fofou ko ki tātou ke talitonu ki tona Ataliki ko Iehu Keliho, ma ke alofa tētahi ki tētahi. Ko tēnei foki lava te mea na fakatonu mai e Keliho ke fai e ki tātou.

²⁴ Ko nā tino e uhitaki ki nā mea kua fakatonu mai e te Atua, e tūmau te tahi o ki lātou i te māfutaga ma te Atua, ma ko te Atua e tūmau te tahi o ia i te māfutaga ma ki lātou. Ma e ona ko te Agaga kua fōki mai e te Atua ki a te ki tātou, kua iloa ai e ki tātou ko te Atua e tūmau te tahi o ia ma ki tātou, e ala i te Agaga kua ia fōki maia ki a ki tātou.