1 Ioane 2 - Tokelauan New Testament

Ko Keliho to Tātou Fehoahoani

¹ Ko au kua tuhi atu ki a te koutou taku fānau, kae ke nahe faia ai e koutou te agahala; kae kāfai he tino e agahala, e i ei te tino e fautua ki te Tamana mo ki tātou — ko Iehu Keliho, tē e āmiotonu.

² Ma ko Keliho ko te tāulaga ia e kave kehea ai a tātou agahala, ma e hē nā ko a tātou agahala oioti, kae e vēnā foki ia agahala a tagata uma o te lalolagi.

³ Kāfai ki tātou e uhitaki ki nā mea e fakatonu mai e te Atua, oi ka mautinoa ai e iloa e ki tātou te Atua.

⁴ Ko te tino e lea e ia iloa te Atua, kae e hē uhitaki ki te mea e fakatonu mai e te Atua, ko te tino tēnā e talapepelo ma e hē i loto ia te ia te meamoni.

⁵ Kae kāfai he tino e uhitaki ki tana kupu, ko te meamoni lava, ko te tino tēnā kua kātoatoa te lelei o tona alofa ki te Atua. Ko te mea tēnei e mautinoa ai ko ki tātou e i ei i te māfutaga ma te Atua:

⁶ ko te tino la e lea ko ia e tūmau i te māfutaga ma te Atua, e tatau ke fakatakitaki ki nā mea nae fai e Iehu Keliho.

Ko te Fakatonuga Fou

⁷ Te kau uho pele, ko te fakatonuga e tuhi atu ai au ki a te koutou e hē ko he fakatonuga fou; ko te fakatonuga lava tēnei e fokotahi na fōki atu ki a te koutou i te kāmataga. Ko te fakatonuga tuai ko te fekau ia kua uma te fakalogo o koutou ki ei.

⁸ Kae ko te fakatonuga e tuhi atu ai au i te taimi nei, ko he fakatonuga fou, auā ko tona fakamāoniga e kitea e ala ia Keliho ma vēnā foki ia te koutou. Auā ko te pōuliuli e gaholo e matafi kehe, ma ko te mālamalama moni kua huhulu mai.

⁹ Ko te tino e lea ko ia e i te mālamalama kae e ita ki tona uho a Kelihiano, koi i te pōuliuli lava ia.

¹⁰ Ko te tino e alofa ki tona uho Kelihiano e ola i te mālamalama, ma e hē ia faia he mea ke pakū ai hētahi tino ki te agahala.

¹¹ Kae ko te tino e ita ki tona uho Kelihiano e ola i te pōuliuli; e havali i te pōuliuli ma e hē ia iloa te mea e fano ia ki ei, auā kua fakatauahogia ia e te pōuliuli.

¹² Ko au e tuhi atu ki a te koutou taku fānau, auā ko autou agahala kua fakamāgalo e ala ia Keliho.

¹³ Ko au e tuhi atu ki a te koutou nā tamana, auā e iloa e koutou tē nae i ei mai lava i te kāmataga. Ko au e tuhi atu ki a te koutou te tupulaga, auā kua fakatōkilalo e koutou te Tino Kino.

¹⁴ Ko au e tuhi atu ki a te koutou taku fānau, auā e iloa e koutou te Tamana. Ko au e tuhi atu ki a te koutou nā tamana, auā e iloa e koutou tē nae i ei mai lava i te kāmataga. Ko au e tuhi atu ki a te koutou te tupulaga, auā ko koutou e mākekeke; ko te kupu a te Atua e ola i loto ia te koutou, ma kua fakatōkilalo e koutou te Tino Kino.

¹⁵ Koutou nahe alolofa ki te lalolagi pe ko nā mea o te lalolagi. Kāfai koutou e alolofa ki te lalolagi, ko koutou la e hē alolofa ki te Tamana.

¹⁶ Ko nā mea uma o te lalolagi — te nanau ki te tino, nanau ki nā mea e kitea e nā mata, te fāfia i nā mea o te ōlaga — e hēai he mea o nā mea iēnei e hau mai te Tamana; e hau uma lele mai te lalolagi.

¹⁷ Ko te lalolagi ma nā mea uma e nanau ki ei te tagata, e fano e mou kehe atu; kae ko te tino e ia faia te finagalo o te Atua, e ola pea lava ke pa ki te fakavavau.

Ko te Fili o Keliho

¹⁸ Taku fānau, ko te ikuga kua pili mai! Na fakailoa atu ki a te koutou ko te Fili o Keliho e hau; kae nei e tokalahi lele nā fili o Keliho kua huhula mai, ma ko te mea ia kua iloa ai e ki tātou ko te ikuga kua pili mai.

¹⁹ Ko nā tino iēnei na oatu mai ia te ki tātou, kae e hē ni tino e o ki tātou; anei ake ni tino e o ki tātou, e vēnei ake koi nonofo fakatahi ma ki tātou. Kae na olo kehe kae ke manino ai e hēai he tino o ki lātou e hau mai ia te ki tātou.

²⁰ Kae ko koutou kua uma te fakaukugia e Keliho te Tokatahi Paia fakatahi ma te Agaga, ma e iloa uma e koutou te meamoni.

²¹ Ko au la e tuhi atu ki a te koutou, e hē ona e hē koutou iloa te meamoni; kae ona e koutou iloa, ma e iloa foki e koutou e hēai lele he tala pepelo e mafai ke hau i te meamoni.

²² Ko ai la te tino e tala pepelo? Ko ho he tino e lea ko Iehu e hē ko te Mehia. Ko te tino e lea vēnei, ko ia tēnā ko te Fili o Keliho — e hē ia taliagia te Tamana ma te Ataliki.

²³ Auā ko te tino e hē ia taliagia te Ataliki e hē ia te ia foki te Tamana; ko te tino e ia taliagia te Ataliki e ia te ia foki te Tamana.

²⁴ Ke mautinoa la e teu pea i outou loto te fekau na fakalogo koutou ki ei mai te kāmataga. Kāfai koutou e tauhi ki te fekau tēnā, ko koutou foki la ka ola pea lava i te hokotaga ma te Ataliki ma te Tamana.

²⁵ Ma ko tēnei te mea na folafola mai e Keliho lava ia mo ki tātou — ko te ola e hē gata.

²⁶ Ko au e tuhi atu vēnei ki a te koutou e uiga ki nā tino e taumafai ke fakahehē koutou.

²⁷ Kae e vē la ki a te koutou, kua liligi atu e Keliho tona Agaga ki luga o koutou. Kāfai lava la e tūmau pea tona Agaga i luga o koutou, e hē manakomia foki e koutou he tino ke akoakoa koutou. Auā e akoako koutou e tona Agaga i nā mea uma, ma ko te mea e akoako e ia e moni, kae e hē pepelo. Uhitaki la ki akoakoga a te Agaga, ma ke tūmau ai pea lava koutou i te māfutaga ma Keliho.

²⁸ Taku fānau, koutou ke tūmau pea i te māfutaga ma Keliho, kae ke fakatumulia ai ki tātou i te loto mākeke kae hē ko te matamumuli ma te fia mumuni ia te ia, i te Aho e haele mai ai.

²⁹ E iloa e koutou ko Keliho e āmiotonu; e tatau la ke koutou iloa ko nā tino uma e faia te mea e tonu, ni fānau ki lātou e a te Atua.