Yohanes 9 - En Taar Weru a nunuwu' é Tontemboan

Si Yesus sumama' si tou wola

¹ An tutuw i Yesus imawaya', kaséréan-Na si esa tou eng ketounake' mai wola.

² Wo sé murit-Na mamuéi ai Sia, “Guru, kéitu réén si tou anio' ketounake' mai wolao? Sapa réén en anio', ampa'paan ing kamesé-meséaanna kuma'pa ing kamesé-meséaan é matu'ana?”

³ Isowat i Yesus, “Sia wola taniitu, ra'ica ampa'paan ing kamesé-meséaanna kuma'pa ing kamesé-meséaan é matu'ana. Taan sia wola wosama' ro'na sérén é tou eng kawasa i Amang Kasuruan matawoi ai sia.

⁴ Ang karoro'an in endopé' musti émaanta en tawoien si aiwéé i Amang Kasuruan si mutusai Yaku. Sa imawengio, ra'io ka'i wana esaan tou e ro'na tumawoi.

⁵ Ang kauré-Ku ang kayo'baané', Yakuo en sendot ing kayo'baan.”

⁶ Kumawus i Yesus kumua in taniitu, Sia rumura' an tana' wo ipekemu-Na en dura' itu wo en tana'. Wo icisu-Na mangé am beren i tou wola itu.

⁷ Wo icua-Na a si tou wola itu, “Mangéo, minamo ko ang kolam Siloam.” (Siloam itu eng kaangéanna, ayutus). Kelinga i tou wola itu sia mangé minamo ang kolam itu. Wo tutuwna maréng angé am baléna, sia ro'nao maséré.

⁸ Taan sé katana'na wo sé tou walina sé makakeli-keli mengaséré isia indior mangile-ngilek, séra membum-buéien, “Ra'ica réén sia si tou si meluku-lukutke' wo mangile-ngilek?”

⁹ Awéan sé mengakua, “Wutul si anioo sia.” Taan awéané' ka'i sé mengakua, “Ra'ica, sia tanuoka si tou wola itu.” Taan si tou eng ketounake' mai wola itu kumua, “Wutul, yakuo si tou indior si asalo mangile-ngilek.”

¹⁰ Wo icua éra ai sia, “Tumambisa réén akar ko ro'nao maséré intarépé'?”

¹¹ Isowatna, “Si Tou makangaran Yesus itu, aipekemu-Na en dura' wo en tana' mamuali lepo wo icisu-Na am berenku, wo iru'du'-Na aku mangé ang kolam Siloam e minamo. Wo aku mangé minamo, wo intarépé' aku ro'nao maséré.”

¹² Wo wuéien éra ka'i ai sia, “Am bisa réén Sia intarépé'?” Isowat i tou itu, “Ra'io kailekanku.”

Sinelidik é tou Farisi si tou ketounake' mai wola

¹³ Wo si tou si ketounake' mai wola itu, iwali éra a sé tou Farisi.

¹⁴ An tutuw i Yesus icumemu in dura' wo en tana' en sumama' im beren i tou wola, asi endo itu endo Sabat, si endo sé tou Yahudi ra'ica toro tumawoi.

¹⁵ Ampa'paan in ituo, sé tou Farisi imamuéi ka'i a si tou ketounake' mai wola itu, “Tambisa réén em berenmu akar ro'nao maséré?” Isowatna, “Awéan Tou eng kumisu in lepo am berenku. Kumawus in itu, yaku minamo, wo intarépé' aku ro'nao maséré.”

¹⁶ Wo icua é piraan tou Farisi walina, “Si tou mengaéma' in itu, ra'ica asi Amang Kasuruan owo, ampa'paan sia ra'ica makiit in atoran in endo Sabat.” Taan icua é tou walina, “Si tou anio' ra'ica tou iméma' ing kamesé-meséaan. Ampa'paan sé tou iméma' ing kamesé-meséaan ra'ica kaémaan éra en tuus kakaya'kaan tanu siitu.” Wo iséra wo iséra ra'io mengkakiitan.

¹⁷ Wo sé tou Farisi mamuéi ka'i a si tou itu, “Ico si tou wola si niéma'-Nao ro'na maséré, tambisa réén sa iciit ico andumoro' i Tou itu?” Isowatna ai séra, “Sia itu nabi.”

¹⁸ Taan sé kikiiten é tou Yahudi kasake' ra'ica mercaya sa si tou itu indior wola wo intarépé' ro'nao maséré. Ampa'paan in ituo, towan éra sé matu'ana,

¹⁹ wo wuéien éra a sé matu'ana, “Si anio' réén si toyaang iow, si ipakua miow ketounake' mai wola? Tumambisa réén akar sia intarépé' ro'nao maséré?”

²⁰ Wo isowat é matu'ana, “Eng kailekan ami sia toyaang ami, wo ketounake' mai wola.

²¹ Taan kéitu sia intarépé' ro'nao maséré, ra'ica kailekan ami, wo si séi e méma' isia ro'na maséré, ra'ica kailekan ami. Wuéieno mio' in esa ai sia, ampa'paan sia wangkoo wo ro'nao icuana in esa.”

²² Sé matu'ana icumua in taniitu, ampa'paan icaindé' éra sé kikiiten é tou Yahudi itu. Ampa'paan sé kikiiten é tou Yahudi imeesao, si séike' e mangaku si Yesus itu Mesias, séra itu ra'io toro muntep am balé paapo'an é agama Yahudi.

²³ Siituo e mangémai, sé matu'ana kumua, “Sia itu wangkoo, wuéieno mio' in esa ai sia.”

²⁴ Wo towan éra ing kumarua si tou si indior wola itu wo icua éra ai sia, “Musti icuamu im butul an dior i Amang Kasuruan. Kailekan ami si tou isumama' ico itu tou ang kamesé-meséaan.”

²⁵ Isowat i tou itu, “Ra'ica kailekanku sa Sia awéan kamesé-meséaan kuma'pa ra'ica. Taan eng kailekanku sapaoka indior aku wola taan intarépé' ro'nao maséré.”

²⁶ Wuéien éra ai sia, “Sapa réén e niéma'-Na ai co? Tumambisa réén Sia méma' akar em berenmu ro'nao mengaséré?”

²⁷ Isowat i tou itu ai séra, “Aicuakuo tarépé' ai camu, taan ra'- ica réén lininga miow? Kéitu réén kamu masalé'pé' luminga sumawel? Kamu ka'i masalé' mamuali murit-Na?”

²⁸ Ang karapi i maséro' icua éra ai sia, “Ico asalo makiit si Tou itu, taan icami makiit si Musa.

²⁹ Kailekan ami sapaoka si Amang Kasuruan irumoma'o a si Musa, taan andumoro' si Tou itu ra'ica kailekan ami am bisa owo Sia imai.”

³⁰ Isowat i tou itu ai séra, “Sia e méma' im berenku ro'na maséré, taan icaéranku ra'ica kailekan iow am bisa owo Sia mai!

³¹ Kailekanta sapaoka si Amang Kasuruan ra'ica luminga sé tou iméma' ing kamesé-meséaan, taan en lingan-Na si séike' mangé si uli-ulit mengasiri' Sia wo si mengaéma' ing kasalé'an-Na.

³² Tumotolke' mai eng kayo'baan niéma' ra'ipé' mako palingan sa awéano tou en sumama' im beren i tou ketounake' mai wola.

³³ Sa si Tou itu si sumama' yaku ra'ica asi Amang Kasuruan owo, ra'ica kawooan-Na méma' sé kakaya'kaan tanu siitu.”

³⁴ Isowat éra ai sia, “Ketoumuke' mai ico wutao ing kamesé-meséaan, wo icasalé'mu réén en sumusui icami?” Wo sia yusér éra kumesot am balé paapo'an.

Tioo em beren in atéta mawola

³⁵ Liningao i Yesus si tou wola itu ayuséro éra kumesot am balé paapo'an é agama Yahudi. Wo si Yesus meta'up wo si tou itu wo icua-Na ai sia, “Émanenmu si Toyaang i Tou?”

³⁶ Isowat i tou itu, “Si séi réén Sia, é Tuang? Pekiupusenku icua woo mai a yaku wosama' Sia percayanku.”

³⁷ Icua i Yesus a si tou itu, “Sia sinérémuo, wo ico ang karoro'- an i memaa-maar ang karapi-Na.”

³⁸ Icua i tou itu, “Émanenku, é Tuang!” Wo sia kumundu wo maapo' ai Sia.

³⁹ Wo icua i Yesus, “Yaku mai ang kayo'baan e makim, wosama' si séike' sé ra'ica maséré, ro'nao oka suméré, wo si séike' sé ro'na maséré, sia mawola oka.”

⁴⁰ Piraan asé tou Farisi am bitu, makalinga sé aipakua i Yesus itu wo icua éra ai Sia, “Sa iciit Ico, wola réén kami?”

⁴¹ Isowat i Yesus ai séra, “Sa woo kamu tou wola, kamu ra'ica wana kamesé-meséaan. Taan ampa'paan kamu mengakua kamu ro'na maséré, kamu awéané' kamesé-meséaan.”