Yohanes 8 - En Taar Weru a nunuwu' é Tontemboan

Si esa wéwéné kinaumaan mengaéma' in sina

¹ Taan si Yesus mangé an Tolaina in Zaitun.

² Asi woondona mai, tutuw imamoondopé' keli, si Yesus maréng angé ka'i am Balé Le'nas, wo keli en tou sé imai ai Sia. Wo Sia lumukut en sumusui ai séra.

³ An tutuw i Yesus masusui, imayo sé makailek wutul in Torat wo sé tou Farisi. Iwali éra mai si esa wéwéné si kinaumaan mengaéma' in sina.

⁴ Wo itulung éra si wéwéné itu an uner é tou keli wo icua éra a si Yesus, “Guru, si wéwéné anio' kinaumaan an tutuw sia mengaéma' in sina.

⁵ An ukum Torat pinerénta i Musa ai cita e mangkil im batu akar imaté sé wéwéné tanu siitu. Tambisa sa iciit si Guru andumoro' in anio'?”

⁶ Icua éra in taniitu e mangepé' a si Yesus, wosama' séra ro'na makéré alasan e méé kaséaan ai Sia. Taan si Yesus asalo icumuru wo mapatic in tuturu' ing kama-Na an tana'.

⁷ An tutuw i Yesus pemué-muéian éra, Sia tumulung wo icua-Na ai séra, “Si séike' si an uner iow si ra'ica wana kamesé-meséaan, aweso taré siao eng kumataré mangkil im batu a si wéwéné anio'.”

⁸ Wo Sia kumuru sumawel wo mapatic an tana'.

⁹ An tutuw éra luminga sapa sé aicua-Na itu, séra tumo'tol asé matu'a keli maesa-esa tumela'u in tampa itu. Wo tumela'uio' si Yesus oka in esa wo si wéwéné itu si makatulung an dior-Na.

¹⁰ Wo si Yesus tumulung wo mamuéi a si wéwéné itu, “Inang, mawisao réén waya séra? Ra'ica réén wana e imukum si inang?”

¹¹ Isowat i wéwéné itu a si Yesus, “Ra'ica wana karu', é Tuang.” Wo icua i Yesus ai sia, “Si inang ka'i ra'ica ukumen-Ku. Maréngo taré wo tumo'tol intarépé' nomoo ka'i mengaéma' ing kamesé-meséaan.”

Si Yesus itu sendot ing kayo'baan

¹² Kekawus in itu, icua i Yesus sumawel a sé tou keli in tana'i, “Yakuo en sendot ing kayo'baan. Si séi eng kumiit Yaku, sia itu ra'io menonou ang kariréimbengan, taan sia menonou an sendot si méma' isia menonou akar ing kauré-uré.”

¹³ Wo icua é tou Farisi a si Yesus, “Ico mengasairi andumoro' in owak-Mu in esa, wo ra'ica wana tou walina e mamuali sairi eng kumeter ing kasairian-Mu itu. Anaé, eng kasairian-Mu itu ra'ica wutul.”

¹⁴ Isowat i Yesus ai séra, “Mandé ka'i ra'ica wana tou walina e mamuali sairi eng kumeter ing kasairian-Ku anio', eng kasairian-Ku itu wutul. Ampa'paan kailekan-Ku am bisa owo Aku mai wo am bisa en angéan-Ku. Taan ra'ica kailekan iow am bisa owo Aku mai wo am bisa en angéan-Ku.

¹⁵ Yaku akimen iow kumiit ing kanaramen é tou. Taan Aku mandé esake' en tou ra'ica wana en akimen-Ku.

¹⁶ Taan sa Aku makim, em pakaakim-Ku wutul. Ampa'paan ra'ica Yaku in esa e makim, taan Aku makim mewali-wali wo si Amang-Ku si mutusai Yaku.

¹⁷ An atoran-atoran ang kitap Torat aipatic in tana'i: Sa ruao tou e méé kasairian meputé andumoro' in esa perkara, eng kasairian itu wutul.

¹⁸ Wo si mamuali sairi andumoro' in owak-Ku awéan rua, Yaku wo si Amang si mutusai Yaku.”

¹⁹ Wo icua éra ai Sia, “Am bisa réén si Amang-Mu?” Isowat i Yesus ai séra, “Kamu ra'ica makatuus Yaku, wo ka'i ra'ica makatuus si Amang-Ku. Sa kamu makatuus Yaku, tantu katuusan ka'i miow si Amang-Ku.”

²⁰ E nunuwu' anio' aicua i Yesus tutuw Sia masusui an diit im piti-piti pengapumpunan in doit raragés am Balé Le'nas. Taan ra'- ica wana mandé esake' tou en tumangka' Sia, ampa'paan ra'ipé' an témpona.

Si Yesus ra'ica asi cayo'baan anio' owo

²¹ Icua ka'i i Yesus a sé kikiiten é agama Yahudi, “Ra'io uré ka'i itela'u-Kuo kamu, wo Yaku paéré-érén oka miow. Taan kamu maté oka ang karapi in da'ica wana kaampungan ang kamesé-meséaan iow. Kamu ra'ica icaangé an tampa angéan-Ku.”

²² Kelinga in itu, sé kikiiten é agama Yahudi kumua, “Sia masalé'o réén wona' maté in owak? Ampa'paano in itu Sia kumua en tampa si angéan-Na kamu ra'ica icaangé.”

²³ Wo icua i Yesus ai séra, “Kamu anio' a mio'na owo, taan Aku an dangka' owo. Kamu asi cayo'baan anio' owo, taan Aku ra'ica.

²⁴ Ampa'paano in itu icua-Ku, kamu maté oka ang karapi in da'ica wana kaampungan ang kamesé-meséan iow. Ampa'paan sa ra'ica percayan iow Yakuo Sia, kamu maté oka ang karapi in da'ica wana kaampungan ang kamesé-meséaan iow.”

²⁵ Wuéien éra ai Sia, “Si séi réén Ko?” Isowat i Yesus, “Si séi Yaku en ulitna, aicua-Kuo ai camu tumo'tolke' mai indior.

²⁶ Keliané' sé icasalé'-Ku icua andumoro' icamu wo ing kameséaan iow, taan ra'ica kiim-Ku kumua in itu. En icua-Ku asaloke' sapa sé lininga-Ku asi Amang Kasuruan. Ampa'paan Sia si mutusai Yaku itu wutul.”

²⁷ Sé tou iluminga in itu, ra'ica kailekan éra sapa sé ipapaar i Yesus andumoro' si Amang Kasuruan Amang-Na.

²⁸ Ampa'paan in itu, icua i Yesus ai séra, “An tutuw airangka' miow Aku Toyaang i Tou ang kayu salip, kakailekan oka miow Yakuo Sia si ipakua-Ku ai camu itu. Wo kakailekan iow oka ka'i Yaku ra'ica maéma' in sapa-sapa kumiit ing kasalé'an-Ku in esa, taan Yaku asaloke' kumua sapa sé aisusui i Amang-Ku.

²⁹ Wo Sia si mutusai Yaku, mewali-wali wo Yaku. Ra'ica kawisa wo iwaya-Na Yaku in esa, ampa'paan sapa sé pengéma-ngémaan-Ku maarui in até-Na.”

³⁰ Kekawus i Yesus kumua waya in itu, keliano tou sé maéman ai Sia.

En sususuien wutul iméma' icita icawekar ang kamesé-meséaan

³¹ Wo icua i Yesus a sé tou Yahudi sé maémano ai Sia. “Sa kamu menonou kumiit in sususuien-Ku, kamu uli-ulit murit-Ku,

³² wo kakailekan oka miow en sususuien wutul, wo en sususuien wutul itu e iméma' icamu anio' ra'io ka'i ang kakawasaan tanu ata.”

³³ Isowat éra ai Sia, “Kami anio' taranak i Abraham wo kami ra'ipé' kawisa mamuali ata i séike' mangé. Tumambisa réén Ko makua kami anio' ra'io ka'i mamuali ata?”

³⁴ Icua i Yesus ai séra, “En ulitna icua-Ku mangé ai camu, si esa wo si esa tou sé mengaéma' ing kamesé-meséaan, sia itu mamuali ata ing kamesé-meséaan.

³⁵ Wo si esa tou ata ra'ica kawisa mento' am balé i tuangna akar ing kauré-uré, taan si toyaang mento' oka akar ing kauré-uré.

³⁶ Anaé, sa kamu émaan i Toyaang i Amang Kasuruan ra'io ang kakawasaan ing kamesé-meséaan, kamu anio' wutu-wutul ra'io ang kakawasaan ing kamesé-meséaan.

³⁷ Kailekan-Ku sa kamu anio' taranak i Abraham, taan kamu rumaméji e maté Yaku ampa'paan kamu ra'ica kiim tumerima in sususuien-Ku.

³⁸ Sapa en sinéré-Ku asi Amang-Ku, siituo en isusui-Ku ai camu. Taan kamu asaloke' mengéma-ngéma' in sapa si aisusui i amangmu.”

³⁹ Isowat éra ai Sia, “Kami taranak i Abraham.” Icua i Yesus ai séra, “Sa kamu anio' wutul taranak i Abraham, tantuo em pengaémaan iow loor kaputé i Abraham.

⁴⁰ Aicua-Kuo ai camu en sususuien wutul sé lininga-Ku asi Amang Kasuruan, taan intarépé' kamu rumaméji maté Yaku. Si Abraham ra'ica kawisa méma' in tanu siitu.

⁴¹ Kamu mengaéma' sapa sé niéma' i amang iow in esa.” Isowat éra, “Icami anio' ra'ica toyaang aitou ampa'paan in sina. Si Amang ami wayake' in esa, Siao si Amang Kasuruan.”

⁴² Icua i Yesus ai séra, “Sa si Amang Kasuruan itu Amang iow, tantu kamu maupus oka Yaku, ampa'paan Yaku mai asi Amang Kasuruan owo wo intarépé' Aku am bia'i. Ra'ica kasalé'an-Ku in esa e mai, taan Sia e mutusai Yaku.

⁴³ Kéitu réén ra'ica kaangéan iow sé ipakua-Ku? Ampa'paan ra'ica kiim iow luminga in sususuien-Ku.

⁴⁴ Si kikiiten é sétango si amang iow, wo icasalé' miow mengaéma' sapa si casalé' i amang iow. Tumo'tolai indior akar intarépé' sia mapaté sé tou, wo ra'ica kiimna mengaéma' in sususuien wutul, ampa'paan en sususuien wutul ra'ica an aténa. Casalé'na mengatowo ampa'paan in ituo em peri aselina. Sia kotowo wo palemboian waya in towo.

⁴⁵ Taan Aku mengakua in sususuien wutul ai camu, ampa'paan in itu Aku ra'ica papercayan iow.

⁴⁶ Ra'ica wana an uner iow e ro'na méé tuus sapaoka Yaku iméma'o ing kamesé-meséaan. Anaé, sa Aku makua in sususuien wutul, kéitu réén Aku ra'ica percayan iow?

⁴⁷ Sé tou asi Amang Kasuruan owo mengalinga sapa sé ipakua-Na. Taan ra'ica pengalingan iow sapa sé ipakua-Na ampa'paan kamu ra'ica ai Sia owo.”

Ra'ipé' itumou si Abraham awéano si Yesus

⁴⁸ Wo isowat é kikiiten é agama Yahudi a si Yesus, “Wutul em pakua ami anio', Ico tou Samaria wo rinasuko i sétang.”

⁴⁹ Isowat i Yesus ai séra, “Yaku ra'ica rinasuk i sétang, Yaku mengasiri' si Amang-Ku, taan Aku ra'ica pengasiriin iow.

⁵⁰ Yaku ra'ica maéré-éré in siriin é tou. Taan awéan si Esa si masalé' Yaku in siriin. Siao ka'i e mamuali akim.

⁵¹ En ulitna icua-Ku mangé ai camu, si séike' e makiit in aicua-Ku sia ra'ica maté akar ing kauré-uré.”

⁵² Wo icua é kikiiten é agama Yahudi ai Sia, “Intarépé' kailekan ami sa Ico anio' rinasuk i sétang! Si Abraham imatéo wo sé nabi ka'i imatéo, taan pakua-Mu si séike' e makiit i nunuwu'-Mu, sia ra'ica maté akar ing kauré-uré.

⁵³ Tambisa réén Ko kumua in taniitu? Ico réén en lébé wangko' mai wo si apo' ami Abraham? Sia imatéo, wo sé nabi ka'i matéo. Sa kumiit Ico si séi réén Ko?”

⁵⁴ Isowat i Yesus ai séra, “Sa Yaku asaloke' rumayo in owak-Ku in esa, en darayoan kaputé in itu ra'ica wana eng kaangéanna. Si marayo Yaku si Amang-Kuo in esa, si pengaakun iow Amang Kasuruan.

⁵⁵ Taan Sia ra'ica katuusan iow, Yaku makatuus Sia. Sa woo Aku kumua Sia ra'ica katuusan-Ku, Yaku tou kotowo kaputé miow. Taan Aku makatuus Sia, wo le'tek an Taar-Na.

⁵⁶ Si apo' miow Abraham arui keli ampa'paan sérénna oka en endo-Ku ang kayo'baan. Wo sinérénao en endo itu wo sia masalé-salé'.”

⁵⁷ Wo icua é kikiiten é agama Yahudi itu ai Sia, “En umur-Mu ra'ipé' lima ngapulu' ngata'un. Sinéré-Muo réén si Abraham?”

⁵⁸ Isowat i Yesus ai séra, “En ulitna icua-Ku mangé ai camu, tutuw i Abraham ra'ipé' itumou, Yaku anio' awéano.”

⁵⁹ An tutuw é tou Yahudi luminga en aicua i Yesus itu, séra mitong watu e mangkil Sia, taan si Yesus ra'io ka'i kaséréanai wo itela'u-Na em Balé Le'nas.