Yohanes 5 - En Taar Weru a nunuwu' é Tontemboan

Sinama' i Yesus si esa tou késo' ang kolam Betesda

¹ Kumawus in itu, si Yesus mangé an Yerusalem, ampa'paan en endo wangko' é tou Yahudi ra'io ka'i uré.

² An Yerusalem awéan esa kolam a nunuwu' é Ibrani patuulen ‘Betesda’. Eng kolam itu an diit im papalen wangko' ang kota si ningaranan ‘Papalen Domba’. An li'cir ing kolam itu awéan lima lésar sé niatepan.

³ An lésar itu keli tou sumakit makawé'kél, awéan sé wola, sé kénto' wo sé késo'. Séra mengento-ento' in dano méro' ang kolam itu.

⁴ Ampa'paan awéan en témpona sé malaékat i Amang Kasuruan tumumpa mai ang kolam itu wo en dano yéro' éra, wo si séike' mangé eng kumataré-taré muntep ang kolam itu an tutuw en dano maéro', sapake' en sakitna masama' oka.

⁵ Am bitu, awéan si esa tuama en sakitna teluo ngapulu' walu ngata'un eng kauré.

⁶ Sérén i Yesus si tou itu makawé'kél am bitu, wo kailekan-Na en sakit i tou itu uréo keli wo icua i Yesus a si tou itu, “Masalé' réén ko masama'?”

⁷ Isowat i tou sumakit itu, “Én é Tuang, taan ra'ica wana tou am bia'i en tumumpa yaku ang kolam an tutuw en dano maéro'. Wo an tutuwku masalé' woo tumumpa mio' ang kolam itu, rinioranke' é tou walina.”

⁸ Icua i Yesus ai sia, “Tumulungo, angkaieno en tepému wo maya'o.”

⁹ Asi témpo ituke', si tou itu makala'uso masama', wo angkaienna en tepé patekelan wo sia maya'. Eng kamamualian itu tumena asi endo Sabat, si endo ra'ica toro patawoi é tou Yahudi.

¹⁰ Ampa'paan in ituo, sé kikiiten é agama Yahudi kumua a si tou si makasama'pé' itu, “Si endo anio' endo Sabat. Sa kumiit in atoran é agama Yahudi, ico ra'ica toro mangkai in tepému.”

¹¹ Taan isowatna ai séra, “Si Tou isumama'o yaku en rumu'du', wosama' aku mangkai in tepéku wo maya'.”

¹² Wo sé kikiiten é agama Yahudi mamuéi a si tou itu, “Si séi réén si tou rumu'du' ico, angkaien en tepému wo maya'o?”

¹³ Taan ra'ica kailekan i tou si makasama'pé' itu si séi si tou isumama' sia, ampa'paan si Yesus ra'io kaséréanai an uner é tou keli am bitu.

¹⁴ Kekawus in itu si Yesus meta'up wo si tou itu am Balé Le'nas wo icua-Na ai sia, “Ta'néino mangé, ico imasama'o. Yentoo mio' mengaéma' ing kamesé-meséaan wosama' eng kawenduan si lébé uterai ra'ica pendamenmu sa.”

¹⁵ Wo si tou itu mangé a sé kikiiten é Yahudi, icuana sapaoka si Yesuso en sumama' isia.

¹⁶ Ampa'paan in itu, sé kikiiten é Yahudi rumaméji mokoi si Yesus, ampa'paan sinama'-Na si tou asi endo Sabat.

¹⁷ Taan icua i Yesus ai séra, “Si Amang-Ku menawo-nawoi akar intarépé', taniitu ka'i Aku menawo-nawoi.”

¹⁸ Sé nunuwu' itu méma' sé kikiiten é Yahudi lébé rumaméji e maté Sia, ra'icake' ampa'paan Sia ra'ica kumiit in atoran in endo Sabat, taan ka'i ampa'paan Sia icumua sa si Amang Kasuruan itu Amang-Na in esa, wo in taniitu pengapeputé-Na en owak-Na wo si Amang Kasuruan.

Pinangaku i Yesus sapaoka Sia itu Toyaang i Amang Kasuruan

¹⁹ Wo isowat i Yesus ai séra in tana'i, “En ulitna icua-Ku mangé ai camu, Yaku Toyaang i Amang Kasuruan ra'ica toro méma' in sapa-sapa sa asaloke' kumiit ing kasalé'an-Ku in esa. E niéma'-Ku asaloke' sapa sé sinéré-Ku niéma' i Amang-Ku. Ampa'paan sapa sé niéma' i Amang, siituo en émaan i Toyaang.

²⁰ Ampa'paan si Amang mengaupus Yaku Toyaang-Na wo ituru'-Na a Yaku pakasa sé niéma'-Na in esa. Wo ka'i ituru' oka i Amang-Ku a Yaku en tatawoi sé lébé wangko' mai wo sumama' si tou sumakit, akar kamu mangaya'ka'.

²¹ Si Amang tumou sumawel sé tou imaté wo émaan-Na séra menonou akar ing kauré-uré. Taniitu ka'i Aku Toyaang-Na, si séike' en icasalé'-Ku, émaan-Ku oka sia menonou akar ing kauré-uré.

²² Si Amang ra'ica makim sé tou, taan aisarakan-Na a Yaku Toyaang-Na.

²³ Niéma' i Amang taniitu wosama' pakasa en tou sumiri' si Toyaang-Na kaputé éra sumiri' si Amang. Si séike' si ra'ica sumiri' si Toyaang-Na, sia ka'i ra'ica sumiri' si Amang si mutusai si Toyaang.

²⁴ En ulitna icua-Ku mangé ai camu, si séike' mangé en luminga i nunuwu'-Ku wo mercaya a si Amang Kasuruan si mutusai Yaku, kéréanna oka eng katouan akar ing kauré-uré. Wo sia ra'ica ukumen. Sia aicawekaro am papaté wo tumerima ing katouan akar ing kauré-uré.

²⁵ En ulitna icua-Ku mangé ai camu, awéan oka en témpona wo an témponao, sapaoka sé imatéo, luminga oka in suara i Toyaang i Amang Kasuruan, siituo en suara-Ku. Wo sé tou luminga in suara-Ku menonou oka.

²⁶ Ampa'paan si Amang-Ku palemboian ing katouan, niéma'-Na ka'i si Toyaang-Na mamuali palemboian ing katouan.

²⁷ Wo si Amang-Ku ka'i mééo ing kawasa a Yaku e makim ampa'paan Yaku Toyaang i Tou.

²⁸ Tioo kamu mangaya'ka' in aicua-Ku anio', ampa'paan maai oka en témpona pakasa en tou sé aicuburo luminga oka in suara-Ku,

²⁹ wo tumou sumawel. Sé tou iméma'o ing kalooran touen oka sumawel en tumerima ing katouan akar ing kauré-uré. Taan sé tou iméma'o ing kaléwo-léwo'an touen sumawel in ukumen.”

³⁰ Icua ka'i i Yesus, “Yaku ra'ica toro méma' sapa-sapa sa asalo kumiit ing kasalé'an-Ku in esa. Yaku mengaakim kumiit in sapa en lininga-Ku asi Amang-Ku owo. Wo Yaku maakim ra'ica marapit ampa'paan ra'ica kumiit ing kasalé'an-Ku in esa taan kumiit ing kasalé'an i Amang si mutusai Yaku.

³¹ Sa Aku méé kasairian sapaoka Aku ayutus i Amang Kasuruan, weroten réén iow eng kasairian-Ku itu ra'ica wutul.

³² Taan si Amang Kasuruan e méé kasairian andumoro' Yaku, kailekan-Ku sapaoka eng kasairian-Na andumoro' Yaku itu wutul.

³³ Ayutuso miow sé tou a si Yohanes Mabaptis e mamuéi andumoro' Yaku, wo sia mééo ing kasairian andumoro' Yaku wo sapa sé aicuana itu wutul.

³⁴ En ulitna Yaku ra'ica mamangén ang kasairian é tou, taan asalo ita'néi-Ku mangé ai camu andumoro' si aicua i Yohanes e maéman a Yaku wosama' kamu lowiren oka i Amang Kasuruan.

³⁵ Si Yohanes itu kaputé in sosoloan maembung wo masendot. Wo kamu arui tumerima in sendotna itu, taan en itu ang karoro'anke'.

³⁶ Taan eng kasairian-Ku en lébé wangko' mai wo ing kasairian i Yohanes. Eng kasairian-Ku sapaoka en tawoien-Ku an uner iow intarépé', siituo en tawoien si aiwéé i Amang a Yaku. Sé tawoien pengaémaan-Ku itu méé tuus sapaoka Yakuo si ayutusai i Amang.

³⁷ Wo si Amang-Ku si mutusai Yaku, Siao in esa e iméé ing kasairian sa si séi Aku en ulitna. Kamu ra'ipé' kawisa luminga Sia maroma' ai camu wo ra'ipé' sumangkum ka'i suméré in amo-Na,

³⁸ wo en taar-Na ra'ica aiwéé miow an dékén, ampa'paan ra'ica percayan iow Aku si ayutus-Na mai.

³⁹ Eng Kitap Le'nas pengati'tiren iow in sumama-sama' ampa'paan paweroten iow ang karapi imaéma' in taniitu kamu makéré oka ing katouan akar ing kauré-uré uré. Wo an untep ing Kitap Le'nas itu awéan aipatic andumoro' si séi Aku en ulitna,

⁴⁰ taan ra'ica kiim iow mai a Yaku e makéré ing katouan akar ing kauré-uré.

⁴¹ Yaku ra'ica maperlu in siriin é tou.

⁴² Taan kailekan-Ku andumoro' sé an até miow, kamu uli-ulit ra'ica mengaupus si Amang Kasuruan.

⁴³ Yaku mai ang karapi i ngaran i Amang-Ku, taan ra'ica kiim iow tumerima Yaku. Taan sa tou walina e mai ang karapi i ngaranna in esa, icasalé' miow tumerima sia.

⁴⁴ Kamu maéré-éréke' i rarayo asé kakélé miow, wo ra'ica rumaméji mangéré i rarayo asi Amang Kasuruan si wayake' in esa. Sa taniitu, tambisa réén ro'na percayan iow Aku?

⁴⁵ Tioo mawerot sapaoka tudun-Ku oka kamu an dior i Amang asi endo pengaakiman. Si tumudu icamu itu si nabi Musa, mandé ka'i siao si pengaarapen iow.

⁴⁶ Taan sa wutu-wutul percayan iow sapa en aipatic i Musa, tantu percayan iow ka'i Aku, ampa'paan siao e matic andumoro' Yaku.

⁴⁷ Taan en ulitna ra'ica pinercaya miow sapa sé aipatico i Musa, anaé tambisa réén percayan iow sapa sé ipakua-Ku?”