Yohanes 21 - En Taar Weru a nunuwu' é Tontemboan

Si Yesus mapaturu' in owak asé pitu murit-Na

¹ Wo si Yesus mapaturu' in owak ka'i a sé murit-Na an tembir in lour Tiberias. Tana'io eng kinamamualian itu:

² Asi sangando, si Simon Petrus, Tomas si pengatuulen Didimus, si Natanael tou Kana ang Galilea, sé rua toyaang i Zebedeus, wo sé rua murit walina, séra im baya imali'us an tembir in lour itu.

³ Icua i Simon Petrus ai séra, “Icasalé'ku maangé en tumangka' sera'.” Icua éra ai sia, “Icami ka'i masalé' maangé wo ico.” Wo séra mangé, sumaké an londéi, taan asi wengi itu ra'ica wana sera' eng kinatangkaan éra.

⁴ An tutuw imatawio imando, si Yesus tumulung an tembir in lour itu. Taan ra'ica kailekan é murit sa Sia ituo si Yesus.

⁵ Wo wuéien i Yesus ai séra, “É kara-karapi, awéano réén sera' eng kinatangkaan iow?” Isowat éra, “Ra'ipé' wana.”

⁶ Wo icua i Yesus ai séra, “Ilomboo mio' en lolombo' miow ang kakan in londéi anio', kamu makéré oka sera'.” Wo ilombo' éra en lolombo' itu, wo ra'io kawéso'an éra en lolombo' itu ampa'paan kelian en sera' an untepna.

⁷ Wo si murit si caupus i Yesus, kumua a si Petrus, “Siao si Tuang!” Kelinga i Petrus Sia itu si Tuang, sia kumarai ampa'paan sia meke'da', wo sia lumo'tic kuméngkéng angé an tembir in lour.

⁸ Sé murit walina ka'i mai ang karapi in londéi teké' wo pewali-walian éra i mawéso' en lolombo' si mawuta-wuta in sera' itu wo wésoon éra ang katanaan. Eng katayang éra wo ing katanaan wayake' wona' in sangaatus meter.

⁹ An tutuw éra in tumana'o, sérén éra awéan waa in api, wo am bawona awéan sera' wo roti.

¹⁰ Icua i Yesus ai séra, “Paalianai piraan sera' sé pakatangkaané' miow itu.”

¹¹ Si Simon Petrus sumaké an londéi, wo wésoonna ang katanaan en lolombo' si mawuta-wuta é sera' wangke-wangker, eng kakelina sangaatus lima ngapulu' telu. Mandé ka'i in taniitu en lolombo' itu ra'ica imakésé'.

¹² Wo cua i Yesus ai séra, “Mayoo wo sumokolo.” Ra'ica wana asé murit itu em brani mamuéi a si Yesus, “Si séi réén Ko?” Ampa'paan kailekan éra Sia itu si Apo' Yesus.

¹³ Wo si Yesus rumuru, indon-Na e roti wo iwéé-Na ai séra. Taniitu ka'i mai wo sé sera' itu.

¹⁴ Siituo ang kumatelu si Yesus mapaturu' in owak a sé murit-Na kekawus Sia tumou sumawel an uner é tou imaté.

Paliarano sé domba-Ku

¹⁵ Makasokol ako, wuéien i Yesus a si Simon Petrus, “Simon, toyaang i Yohanes, icaupusmu réén Aku lumébé mai wo iséra anio'?” Isowat i Petrus, “Wutul é Tuang, kailekan-Mu sapaoka aku mengaupus Ico.” Icua i Yesus ai sia, “Paliarano mio' sé domba-Ku.”

¹⁶ Wuéien ka'i i Yesus ing karua a si Petrus, “Simon, toyaang i Yohanes, icaupusmu réén Aku?” Isowat i Petrus, “Wutul é Tuang, kailekan-Mu sapaoka aku mengaupus Ico.” Icua ka'i Yesus ai sia, “Paliarano mio' sé domba-Ku.”

¹⁷ Wuéien ka'i i Yesus ing katelu a si Petrus, “Simon, toyaang i Yohanes, icaupusmu réén Aku?” Wo en até i Petrus mawendu, ampa'paan akar i makatelu si Yesus mamuéi ai sia, “Icaupusmu réén Aku?” Wo isowatna a si Yesus, “Tuang, em baya-waya kailekan-Mu, kailekan-Mu sapaoka aku mengaupus Ico.” Icua ka'i i Yesus a si Petrus, “Paliarano mio' sé domba-Ku.

¹⁸ En ulitna icua-Ku mangé ai co, an tutuw ko wo'basé', ico in esa mengawa'kes im pinggangmu wo ico mawaya' am bisake' si casalé'mu. Taan sa ko matu'ao, wéému oka eng kamamu wa'kesen é tou walina wo iwali éra oka an tampa si ra'ica icasalé'mu.”

¹⁹ Icua i Yesus in taniitu, en tumuru' mulur tambisa si Petrus maté, wo irumayo wo sumiri' si Amang Kasuruan. Kekawus i Yesus kumua in taniitu, icua-Na a si Petrus, “Kumiito mai Aku.”

Si murit icaupus i Yesus

²⁰ An tutuw i Petrus maréng in somoi, sérénna si murit icaupus i Yesus makiit iséra. Si murit itu si ilumukut an duru i Yesus icuman mewali-wali an tutuw i Yesus ra'ipé' mate wo ka'i si mamuéi a si Yesus, “Tuang, si séi réén en sumarakan Ico?”

²¹ An tutuw sérén i Petrus si murit itu, icuana a si Yesus, “Tuang, sapa réén e mamuali asi tou itu?”

²² Isowat i Yesus ai sia, “Sa icasalé'-Ku sia menonouke' melala'us akar Aku maai sumawel, en itu ra'ica urusanmu. Taan ko kumiito mai Yaku.”

²³ Ampa'paano i nunuwu' i Yesus itu, akar icaseraro en abar a sé poo-poow itu sapaoka si murit itu ra'ica maté. En ulitna si Yesus ra'ica icumua sapaoka si murit itu ra'ica maté, taan aicua-Na, “Sa icasalé'-Ku sia imenonouke' melala'us akar Aku maai sumawel, en itu ra'ica urusanmu.”

E nuwu' ing kumusi'

²⁴ Si murit ituo si méé ing kasairian wo imatic andumoro' im pakasa in anio'. Wo kailekanta sapaoka eng kasairianna itu wutul.

²⁵ Wo keliané' ka'i en andumoro' im balina sé niéma' i Yesus. Taan sa pakasa e niéma' i Yesus itu ipatic maesa-esa, pawerotenku ra'ica kawooan ing kayo'baan e mamuat pakasa eng kitap si musti ipatic itu.