Yohanes 2 - En Taar Weru a nunuwu' é Tontemboan

Em pésta kawéng ang Kana

¹ Asi endo katelu awéan pésta kawéng ang Kana an sangkum ing Galilea. Wo si inang i Yesus mai am bitu.

² Si Yesus wo sé murit-Na nienot ka'i mai am pésta kawéng itu.

³ Em pésta ra'ipé' icumawus taan en anggor maka'puo. Wo icua i inang i Yesus ai Sia, “Séra kinaka'puano in anggor.”

⁴ Icua i Yesus a si inang-Na, “Kéitu réén si inang rumu'du' in taniitu a Yaku? Ra'ipé' an témpona ituru'-Ku si séi Aku.”

⁵ Taan icua i inang-Na a sé tou sé mengaselewir am pésta itu, “Émaano mangé sapa si aicua i Yesus ai camu.”

⁶ Am bitu awéan enem tampayang papumpunan in dano sé ipatu'tul ing kaperluan pengawu'as iciit ing kanaramen é tou Yahudi. Esa wo i esa tampayang itu papumpunan in dano wona' sangaatus liter.

⁷ Icua i Yesus a sé maselewir itu, “Wutano mio' in dano sé tampayang itu.” Wo pumpunan éra in dano sé tampayang itu akar i mawuta.

⁸ Wo icua i Yesus ai séra, “Kumawus in itu isaapo mio' rano pira asi tampayang itu wo paalino mangé a si kikiiten am pésta anio'.”

⁹ Wo epé'an i kikiiten am pésta itu en dano si mamualio anggor, taan ra'ica kailekanna am bisa eng kinéréan é mengaselewir in anggor itu. Wayake' sé mengaselewir sé sumaap in dano itu e makailek. Wo towan i kikiiten am pésta itu si tuama kumawéng itu mai ai sia,

¹⁰ wo icuana ai sia, “Eng kanaramen é tou mengaselewir in anggor sé loor eng kataré, wo sa kelio en anggor nielep é sakéi, selewiro éra en anggor sé ra'ica loor. Taan ayéma' i poow en anggor loor akar asi oras anio'.”

¹¹ Niéma' i Yesus eng kakaya'kaan-Na kataré itu ang Kana an sangkum ing Galilea. Am bitu aituru'-Na eng kawangko'-Na, ampa'paan in ituo sé murit-Na mercaya ai Sia.

¹² Kumawus in itu si Yesus mangé ang Kapernaum mewali-wali wo si inang-Na, tua-tuari-Na tuama wo sé murit-Na. Séra mento' am bitu wayake' im pira ngando.

Si Yesus musér sé tou mawangkér am Balé Le'nas

¹³ An tutuw i matawio en endo wangko' Paska é tou, si Yesus mangé an Yerusalem.

¹⁴ Ang kintal im Balé Le'nas, kaséréan-Na awéan tou sé mawangkér sapi, domba, wo mombo. Wo awéan ka'i sé tou makalukut an somoi i méja-méja pengasawelan in doit am bitu.

¹⁵ Wo si Yesus méma' in sambok an tali owo wo yusér-Na waya sé tou, sé domba wo sé sapi éra, icesot waya ang kintal im Balé Le'nas. Iwali-walintuang-Na ka'i e méja pengasawelan in doit, akar en doit éra imerar ra'io metu'tul.

¹⁶ Wo icua i Yesus a sé mawangkér sé mombo, “Paalin wo icesot waya sé mombo wo en lalandangan. Tioo émaan iow em Balé i Amang-Ku mamuali pawangkéran.”

¹⁷ Wo sé murit i Yesus makata'néi sapaoka ang Kitap Le'nas awéan en aipatic in tana'i, “En upus-Ku asi Walé i Amang Kasuruan wangko' keli, tanuoka api maembung an até-Ku.”

¹⁸ Wo Sia sunduren é kikiiten agama é Yahudi, “Ang karapi ing kawasa i séi réén Ico méma' in tanu siitu? Sa Ico awéan kawasa asi Amang Kasuruan owo, émaano mai eng kakaya'kaan tanu tuus ai cami.”

¹⁹ Isowat i Yesus ai séra, “Sa tongkaren iow em Balé Le'nas anio', wangunen-Ku oka sumawel asi teluke' ngando.”

²⁰ Wo icua é makakawasa Yahudi ai Sia, “Em Balé Le'nas anio' winangun é tou epat ngapulu' enem ngata'un eng kauréna, wo ro'na réén wangunen-Mu sumawel asi teluke' ngando?”

²¹ Taan em Balé Le'nas em peangé-angén i Yesus, siituo en owak-Na in esa.

²² Ampa'paano in itu, an tutuw i Yesus tinou sumawel an uner é tou imaté, kata'néiano é murit-Na sapaoka en itu sumangkumo aicuana-Na. Wo percayan érao ka'i sapa sé aipatic ang Kitap Le'nas wo e nunuwu' sé aicuao i Yesus.

Pakasa en até é tou kailekan i Yesus

²³ Wo ang karoro'an i Yesus an Yerusalem ang kauréke' in endo wangko' Paska, keli tou maéman ai Sia ampa'paan séra isuméréo in tuu-tuus kakaya'kaan sé niéma'-Na.

²⁴ Taan sé tou itu ra'ica percayan i Yesus, ampa'paan kailekan-Na waya en até é tou.

²⁵ Wo ra'io sangali esaan tou ka'i eng kumua ai Sia andumoro' in tou, ampa'paan kailekan-Na en até é tou.