Yohanes 19 - En Taar Weru a nunuwu' é Tontemboan

¹ Kumawus in itu, ru'du' i Pilatus sé surarona e maali si Yesus in samboken.

² Wo émaan éra em panga-pangana rintek tutunéan mamuali esa mahkota wo ipaké éra an do'kos i Yesus. Wo pakéan éra ka'i Sia in juba pares.

³ Wo séra memaré-maréng rumuru mangé ai Sia wo kumua, “Siri', a si colano é tou Yahudi!” Kumawus in itu sepé-sepéén éra en amo-Na.

⁴ Wo si Pilatus kumesot sumawel wo icuana a sé tou Yahudi, “Séréno, icesotku si Tou anio' ai camu wosama' kailekan iow sapaoka Sia, mandé esake' eng kaséaan-Na ra'ica wana eng kinakéréanku.”

⁵ Wo si Yesus kumesot an untep in istana, wo Sia pakapakéané' i mahkota tutunéan wo in juba pares. Wo icua i Pilatus ai séra, “Séréno si Tou anio'!”

⁶ An tutuw i Yesus paileken é kikiiten é imam wo sé mengatéir im Balé Le'nas, wo yangko' éra, “Isalipo Sia! Isalipo Sia!” Icua i Pilatus ai séra, “Sa taniitu, indono Sia wo mangé isalip, ampa'paan ra'ica kinéréanku eng kaséaan-Na mandé wayake' in esa.”

⁷ Wo icua é tou Yahudi itu a si Pilatus, “Icami awéan ukum, sa kumiit in ukum itu, Sia musti ukumen im patén, ampa'paan Sia mawerot en owak-Na Toyaang i Amang Kasuruan.”

⁸ Tutuw i Pilatus luminga sapa em ipakua éra itu, makaaweso eng kaindé'anna.

⁹ Wo sia muntep sumawel an istana itu, wo kumua a si Yesus, “Am bisa owo réén Ko mai?” Taan ra'ica wana sapa-sapa en aisowat i Yesus ai sia.

¹⁰ Wo icua i Pilatus ai Sia, “Kéitu réén Ko ra'ica kiim rumoma' a yaku? Ra'ica réén kailekan-Mu, yaku awéan kawasa e mekar Ico wo ka'i awéan kawasa en sumalip Ico?”

¹¹ Isowat i Yesus, “Ico ra'ica makaanu kawasa sapa-sapa a Yaku sa eng kawasa itu ra'ica aiwéé mai ai co an dangka' owo. Ampa'paan in itu si tou sumarakan Yaku ai co, eng kamesé-meséaanna lébé uter wo eng kamesé-meséaanmu.”

¹² Kekawus i Pilatus luminga en aicua i Yesus itu, wo sia rumaméji maéré-éré lalan tumambisa e mekar si Yesus. Taan icua é tou Yahudi itu ang karapi in taangko', “Sa iwekar i tuang si Tou anio', si tuang ra'io ka'i kara-karapi i Kaisar. Wo si séike' si mawerot in owakna kolano, sia isumunduro si Kaisar.”

¹³ An tutuw i Pilatus luminga en aicua é tou itu, wo iru'du'na sé suraro e maali si Yesus icesot an istana itu. Wo si Pilatus lumukut am palukutan im pengadilan si patuulen Lanté Watu, a nunuwu' Ibrani patuulen Gabata.

¹⁴ Si endo itu, tumena asi endo matu'tul in endo wangko' Paska, wo jam duablaso wona' ing katoora yéndo. Wo icua i Pilatus a sé tou Yahudi itu, “Séréno mai, Si anioo si colano miow!”

¹⁵ Wo séra mengangko-ngangko' wo makua, “Paténo Sia! Paténo Sia! Salipo Sia!” Wo icua i Pilatus ai séra, “Musti réén isalipku si colano miow?” Isowat é kikiiten é imam, “Si colano ami wayake' si Kaisar!”

¹⁶ Wo isarakan i Pilatus si Yesus a sé suraro e mangé isalip. Wo si Yesus iwali é suraro e mangé isalip.

Si Yesus aisalip

¹⁷ Wuléngen-Na en salip wo mangé an tampa si makangaran tampa Ru'i in Do'kos, a nunuwu' Ibrani Golgota.

¹⁸ Asi tampa ituo Sia aisalip éra. Awéan ka'i rua tou walina sé aisalip mewali-wali wo si Yesus, si esa ang ka'biri si esa ang kakan, si Yesus an uner éra.

¹⁹ Iru'du' ka'i i Pilatus im pakuan angé esa papang ang kayu salip, si pinatican in tana'i: “Si Yesus, tou Nazaret, Kolano é tou Yahudi.”

²⁰ Kelian tou Yahudi mabaca in aipatic ang kayu salip itu, ampa'paan en tampa sinalipan si Yesus itu tawike' ing kota Yerusalem. Wo sé aipatic itu maké i nunuwu' é Ibrani, Latin wo Yunani.

²¹ Wo icua é kikiiten é imam itu a si Pilatus, “Tioo ipatic ‘Kolano é tou Yahudi’, taan ipatico mio', ‘Si Tou anio' eng kumua: Yaku Kolano é tou Yahudi.’ ”

²² Taan isowat i Pilatus, “Sapa si aipatickuo, siituo em patic.”

²³ Kekawus i Yesus aisalip é suraro wo indon éra eng karai-Na, wéténgen éra mamuali epat ngawéténg, esa suraro makéré esa ngawéténg. Wo indon éra ka'i en juba-Na, en juba itu esake' tenunan tumo'tol an dangka' akar a mio'na, ra'ica wana em binilit.

²⁴ Ampa'paan in ituo séra mengkuanan a si esa wo sé walina, “Ra'ica toro pewéténgenta eng karai anio' mamuali piraan ngapokol, taan lébé loor taré lotréientao en tumantu si séi e makéré.” Wo in taniitu malekepo sapa sé aipatic ang Kitap Le'nas, “Winété-wéténg éra eng karai-Ku a si esa wo se walina, wo lotréien éra si séi e makéré in juba-Ku.” Siituo e niéma' é suraro itu.

²⁵ Wo an duru in salip i Yesus makatulung si inang-Na, wo si wéwéné poow i inang-Na, wo si Maria penanaan i Klopas, wo si Maria Magdalena.

²⁶ An tutuw i Yesus makaséré si inang-Na wo si murit icaupus-Na makatulung an duruna, kumuao Sia a si inang-Na, “Inang, si anioo si toyaangmu!”

²⁷ Wo icua-Na a si murit icaupus-Na itu, “Si anioo si inangmu!” Tumo'tolke' asi tempo' itu, si inang i Yesus tinerima i murit itu mento' am baléna.

Si Yesus maté

²⁸ Kailekan i Yesus niéma'-Nao em baya-waya si musti émaan-Na, ampa'paan in itu icua-Na “Maré'omo Aku!” Wo in taniitu sapa sé aipatic ang Kitap Le'nas imamualio.

²⁹ Am bitu awéan esa tampayang wuta in anggor esem. Itopok éra em bungang ing karang asi pangana in hisop, wo ito'to' éra an anggor esem wo iwéé éra mangé am ba'ba' i Yesus.

³⁰ Keepé'-Na in anggor esem itu, icua-Na, “Malekepo!” Wo icuru-Na en do'kos wo isarakan-Na e mu'kur-Na.

Em petic i Yesus tinopok

³¹ Asi endo itu, endo tumu'tul in endo Sabat. Ampa'paan in itu ra'ica icasalé' i kikiiten é tou Yahudi e mayat-mayat itu ipakawéréné' ang kayu salip asi endo Sabat, sapapé' si endo itu endo wangko'. Anaé, séra mekiupus a si Pilatus wosama' eng kécéi é tou aisalip itu lentuun wo itumpa e mayat éra.

³² Wo mai sé suraro. Lentuun éra eng kécéi é rua tou sé aisalip mewali-wali wo si Yesus.

³³ Taan mai asi Yesus, sérén éra Sia imatéo, anaé eng kécéi-Na ra'ica linentu' éra.

³⁴ Taan esaan asé suraro itu tumopok im petic i Yesus maké wengkow, wo makala'us kumesurai en enda' wo en dano.

³⁵ Si tou en suméré ing kamamualian itu in esa, en icumua sapa en sinerénao, wo sé ipakuana itu wutul. Wo kailekanna sapaoka sia makua im butul wosama' percayaan iow.

³⁶ En itu mamuali wosama' malekepo sapa sé aipatic ang Kitap Le'nas, “Ra'ica wana en du'i-Na sé lentuun oka.”

³⁷ Wo awéan ka'i e nats aipatic ang Kitap Le'nas, “Téintengen éra oka Sia si tinopoko éra.”

E mayat i Yesus aicubur

³⁸ Awéan esa tou makangaran Yusuf, tou Arimatea. (Sia mengakiit si Yesus, taan ang karapi imaene-enep ampa'paan icaindé'na sé kikiiten é agama Yahudi.) Sia mangé mekiupus a si Pilatus wosama' énanna e mindo i mayat i Yesus e mangéna cubur. Kekawus niénan i Pilatus, wo mangéna itumpa e mayat itu ang kayu salip.

³⁹ Wo mai ka'i am bitu si Nikodemus. Sia si sumangkumo mai meta'up wo si Yesus asi sangawengi. Sia imai maali-ali in solo mawou manam si kinemuan i mur wo eng gaharu, eng kauter i ramuan itu wona' telu ngapulu' kilo.

⁴⁰ Wo indon éra e mayat i Yesus, wo saputen éra ing kaéng lénen wo kisun éra in solo mawou manam itu, ciit ing kanaramen é tou Yahudi mengakubur i mayat.

⁴¹ An duru in tampa i Yesus aisalip, awéan esa uma. An uner in uma itu awéan esa kubur werupé' wo ra'ipé' pinaké.

⁴² Anaé, ampa'paan in tawio tumo'tol en endo Sabat wo eng kubur itu tawike', icubur éra e mayat i Yesus am bitu.