Yohanes 17 - En Taar Weru a nunuwu' é Tontemboan

Pasombayang i Yesus sé makii-kiit Sia

¹ Kekawusai i Yesus kumua im pakasa in itu, Sia kumanat angé an langit wo sumombayang, “O Amang, an témponao! Irayoo wo siriino mai si Toyaang-Mu, wo in taniitu si Toyaang-Mu ka'i ro'na rumayo wo sumiri' Si Amang.

² Ampa'paan si Amang mééo mai ing kawasa a Yaku e merénta waya sé tou, wosama' Aku ro'na méé ing katouan akar ing kauré-uré ai séra sé aisarakano i Amang a Yaku.

³ Si anioo eng katouan akar ing kauré-uré: Katuusan éra si Amang, si Amang Kasuruan si wayake' in esa wo wutul, wo makatuus Yaku si Yesus Kristus si ayutuso i Amang.

⁴ Si Amang iparayo wo pasiriin-Ku ang kayo'baan anio', ampa'paan pinakatawoi-Kuo waya sé airu'du' i Amang in émaan-Ku.

⁵ Wo intarépé', o Amang, émaano mai Aku iparayo-rayo wo pasiri-siriin an dior-Mu, ang karapi i rarayo wo en sisiri' si a Yakuo mewali-wali wo si Amang an tutuw eng kayo'baan anio' ra'ipé' niéma'.

⁶ Aipapatuus-Kuo si Amang a sé tou si aisarakan-Muo a Yaku ang kayo'baan anio'. Séra itu anu i Amang wo séra aisarakano i Amang a Yaku. Wo intarépé' séra le'tek mengaéma' in taar-Mu si aicua-Ku.

⁷ Intarépé' kailekano éra sapaoka pakasa sé aicua-Kuo wo sé niéma'-Kuo itu asi Amang owo,

⁸ ampa'paan en taar sé aicua i Amang a Yaku aicua-Kuo waya ai séra wo tinerimao éra. Wo wutu-wutul kakailekan éra, Yaku mai asi Amang owo wo pinercaya éra, si Amango e mutuso mai Yaku.

⁹ Anaé, intarépé' séra ipasombayang-Ku. Taan ra'ica ipasombayang-Ku sé tou sé ra'ica maéman ang kayo'baan anio', sé ipasombayang-Ku séra sé aisarakan i Amang a Yaku, ampa'paan séra itu anu i Amang.

¹⁰ Pakasa sé anu-Ku anu ka'i i Amang, wo pakasa sé anu i Amang, anu-Ku ka'i. Ampa'paano iséra Yaku iparayo-rayo wo pasiri-siriin.

¹¹ Yaku maangé oka a si Amang, anaé Yaku ra'io ka'i ang kayo'baan anio', taan séra ang kayo'baané'. O Amang si lume'na-le'nas, téirano mai séra ang karapi i ngaran-Mu si aiwééo i Amang a Yaku, wosama' séra maesa, kaputé i Amang esa wo Yaku.

¹² Ang kauré-Ku imewali-wali wo iséra, tinéiran-Ku mai séra ang karapi ing kawasa-Mu si aiwéé-Mu a Yaku, wosama' ra'ica wana esaan tou ai séra e maté, aluar si esa si aitantuo imaté. Wo in taniitu sapa si aipatico ang Kitap Le'nas imalekepo.

¹³ Taan intarépé' Yaku mai a si Amang. Wo ang karoro'an Aku ang kayo'baané', icua-Ku waya en anio' ai séra, wosama' séra mendam in arui keli kaputé in até-Ku mendam ka'i in arui.

¹⁴ En Taar i Amang aicua-Kuo ai séra, wo pinercaya éra en Taar itu. Ampa'paan in ituo sé tou ra'ica mercaya in Taar i Amang masuut séra, ampa'paan séra ra'ica meputé wo sé tou ra'ica mapercaya itu, wo ka'i Yaku ra'ica meputé wo sé tou ang kayo'baan sé ra'ica mapercaya.

¹⁵ Yaku ra'ica mangilek a si Amang wosama' indon i Amang séra asi cayo'baan anio', taan pangileken-Ku wosama' loindongenai i Amang séra asi kawasa i léwo' siao kikiiten é sétang,

¹⁶ ampa'paan séra ra'ica anu ing kayo'baan, kaputé-Ku ka'i ra'ica anu ing kayo'baan.

¹⁷ Émaano mangé séra menonou le'nas ang karapi in sususuien wutul-Mu. Pakasa en taar-Mu siituo en sususuien wutul.

¹⁸ Tanu Si Amang imutuso mai Yaku ang kayo'baan, taniitu ka'i Aku mutus iséra ang kayo'baan.

¹⁹ Wo isarakan-Ku eng katouan le'nas-Ku en sumelewir si Amang. Niéma'-Ku en itu torona ing kalooran éra, wosama' séra ka'i ro'na sumarakan in owak en sumelewir si Amang kumiit in sususuien wutul-Mu.

²⁰ Em pasombayang-Ku ra'ica isérake', taan ka'i a sé tou sé luminga in sususuien éra wo maéman oka a Yaku.

²¹ Pekiupusen-Ku a si Amang wosama' séra im baya meesa, kaputé i Amang esa wo Yaku wo Yaku esa wo si Amang wosama' séra ka'i meesa wo Cita. Wo in taniitu, sé tou ang kayo'baan ro'na mercaya sapaoka si Amango e mutusai Yaku.

²² Aiwéé-Kuo ka'i ai séra e rarayo wo in sisiri' si aiwééo i Amang a Yaku, wosama' séra meesa, kaputé Yaku wo si Amang esa.

²³ Yaku meesa wo iséra wo si Amang meesa wo Yaku, wosama' séra wutu-wutul meesa. Sa séra wutu-wutul meesa, kakailekan oka é tou ra'ica maéman ang kayo'baan sapaoka si Amango e mutusai Yaku wo ka'i si Amango si mengaupus iséra, kaputé si Amang mengaupus Yaku.

²⁴ O Amang, icasalé'-Ku wosama' sé tou sé aisarakan i Amang a Yaku awéan mewali-wali wo Yaku asi tampa angéan-Ku. Icasalé'-Ku taniitu wosama' ro'na kaséréan éra e rarayo wo en sisiri'-Ku, siituo e rarayo wo en sisiri' si aiwééo i Amang a Yaku ampa'paan si Amang mengaupuso Yaku an tutuw ra'ipé' niéma' eng kayo'baan anio'.

²⁵ O Amang si ra'ica marapit! Si Amang wutul ra'ica katuusan é tou ang kayo'baan anio', taan Aku makatuus si Amang. Wo kailekan é makii-kiit Yaku si Amango e mutusai Yaku.

²⁶ Aicua-Kuo ai séra si séi si Amang en ulitna, wo ipengua-ngua-Ku oka melala'us andumoro si Amang. Wo in taniitu séra maupus oka sé tou walina tanu si Amang mengaupus Yaku wo Yaku meesa wo iséra.”