Yohanes 11 - En Taar Weru a nunuwu' é Tontemboan

Eng kepaté i Lazarus

¹ Awéan esa tou makangaran Lazarus, sia sumakit. Sia maento' an doong Betania mewali-wali wo sé poo-poowna wéwéné si Maria wo si Marta.

² Si Maria itu wéwéné si sumangkumo sumolo ing kécéi i Apo' Yesus maké in solo mawou manam wo linapna im buukna. Si wéwéné itu mepoow wo si Lazarus si sumakit itu.

³ Anaé, sé rua poowna wéwéné itu rumu'du' tou mangé kumua in abar a si Yesus tana'i, “Tuang, si Lazarus si caupus-Mu itu sumakit.”

⁴ An tutuw i Yesus iluminga in abar itu, icua-Na, “En sakitna itu ra'ica makawali oka sia am papaté. Taan en anio' mamuali wosama' ituru' i Amang Kasuruan eng kawangko'-Na, wo in taniitu si Toyaang-Na iparayo-rayo wo pasiri-siriin oka.”

⁵ Si Marta, si Maria wo si Lazarus, icaupus keli i Yesus.

⁶ Taan an tutuw luminga si Lazarus sumakit, aipetutu' i Yesus mento' am paento'an-Na ruapé' ngando.

⁷ Wo kekawus in dua ngando, icua-Na a sé murit-Na, “Mayoo angénta sumawel an Yudea.”

⁸ Taan icua éra ai Sia, “Guru, ra'ipé' uré sé tou Yahudi mangepé' mangkil im batu a si Guru. Masalé'pé' réén si Guru mangé sumawel am bitu?”

⁹ Isowat i Yesus ai séra, “Ra'ica réén an sangando eng kauréna sangapulu' rua jam? Sé tou mawaya' an tutuw in endopé', eng kécéina ra'ica icasu'su' ampa'paan sia makaséré in sendot ing kayo'baan anio'.

¹⁰ Taan sa si tou mawaya' wengi, eng kécéina icasu'su' ampa'paan ra'ica wana sendot an owakna.”

¹¹ Kumawus in itu icua-Na ai séra, “Si poowta Lazarus itu kinakili'an, taan mangé-Ku oka polon sia.”

¹² Wo icua é murit-Na ai Sia, “Tuang, sa si Lazarus wutul kinakili'an, sia masama' oka.”

¹³ En ulitna si aicua i Yesus itu, si Lazarus imatéo. Taan paweroten é murit-Na, si aicua i Yesus itu, si Lazarus asalo icumili'.

¹⁴ Ampa'paan in itu ang karapi ra'ica ipaene-enep, icua i Yesus ai séra, “En ulitna si Lazarus itu imatéo.

¹⁵ Taan Aku arui ra'ica a mangé mbitu asi témpo itu, ampa'paan awéan en untungna ai camu. Ampa'paan, awéan oka e mamuali si méma' icamu lébé maéman a Yaku. Anaé, intarépé' mayoo angénta a si Lazarus.”

¹⁶ Wo si Tomas si pengatowan ka'i Didimus, kumua a sé kara-karapina murit i Yesus walina, “Mayoo kita mangé ka'i an Yudea, mandé ka'i kita maté mewali-wali wo Sia.”

¹⁷ An tutuw i Yesus icateka'o, kalingaan-Na si Lazarus imatéo wo epato ngando an untep ing kubur.

¹⁸ En doong Betania itu ra'- ica tayang wo en Yerusalem, eng katayangna wona' telu kilometer.

¹⁹ Anaé, keli sé tou Yahudi an Yerusalem owo mai a si Marta wo si Maria e mibor iséra in dua ampa'paan si Lazarus poow éra tuama imatéo.

²⁰ An tutuw i Marta luminga si Yesus ang karoro'an imaai, mangéna sungkulen Sia an lalan. Taan si Maria mento'ke' am balé.

²¹ Wo meta'upo si Marta wo si Yesus, icua i Marta ai Sia, “Tuang, sa woo si Tuang am bia'i an tutuw itu, si poowku ulit ra'ica maté.

²² Taan kailekankuo, asi oras anio'ke', sapa em pangileken-Mu a si Amang Kasuruan iwéé-Na oka mai.”

²³ Icua i Yesus a si Marta, “Si poowmu Lazarus tumou oka sumawel.”

²⁴ Wo icua i Marta a si Yesus, “Kailekanku sia tumou oka sumawel mewali-wali wo sé tou imatéo asi endo kaka'puan ing kayo'baan anio'.”

²⁵ Isowat i Yesus a si Marta, “Yakuo en tumou sumawel sé tou imatéo wo méé ing katouan akar ing kauré-uré. Si séike' sé maéman a Yaku, mandé ka'i sia matéo ang kayo'baan anio', sia tumou oka akar ing kauré-uré.

²⁶ Wo sé tou menonou meesa wo Yaku wo maéman a Yaku, ra'io maté akar ing kauré-uré. Ra'ica réén percayanmu si aicua-Ku itu?”

²⁷ Isowat i Marta a si Yesus, “Én é Tuang, percayanku sapaoka Ico si Mesias, Toyaang i Amang Kasuruan si aijanjio maai oka ang kayo'baan anio'.”

Si Yesus maamé'

²⁸ Kumawus ako i Marta kumua in taniitu a si Yesus, sia maréng angé sumawel am baléna en tumowa si poowna Maria wo icewitna ai sia, “Si Guru am biao, patowan-Na ko.”

²⁹ An tutuw i Maria luminga en aicewitna itu, sia makala'us tumulung wo mangé a si Yesus.

³⁰ An tutuw itu, si Yesus ra'ipé' icateka' asi roong itu. Sia an lalané' am pineta'upan i Marta wo Sia.

³¹ An tutuw é tou Yahudi sé ang karoro'an i maibor si Maria am balé itu, isuméré sia makala'us tumulung wo mario-rior kumesot. Pawasan éra sia maangé ang kubur e maamé' a mangé mbitu, anaé kiniit éra mangé sia.

³² An tutuw i Maria cateka' an tampa i Yesus makaento' wo sinérénao Sia, wo si Maria makala'us kumundu an dior ing kécéi i Yesus wo kumua ai Sia, “Tuang, sa Ko am bia'i, tantu si poowku ra'ica imaté.”

³³ An tutuw sérén i Yesus si Maria maamé' wo ka'i sé tou Yahudi sé mai mewali-wali wo isia maamé', en até i Yesus masusa wo wendu keli,

³⁴ wo wuéien-Na ai séra, “Am bisa réén eng kinuburan iow si Lazarus?” Isowat éra a si Yesus, “Tuang, mayoo wo sérénta.”

³⁵ Wo si Yesus maamé'.

³⁶ Pira-piraan tou Yahudi kumua, “Séréno, icaupus-Na keli si Lazarus!”

³⁷ Taan awéan sé walina makua, “Sia iméma'o si tou wola ro'na maséré. Ra'ica réén kawooan-Na iméma' wosama' si Lazarus ra'ica woo imaté?”

Si Lazarus tinou sumawel i Yesus

³⁸ En até i Yesus mawendu keli, wo Sia mangé ang kubur i Lazarus. Eng kubur itu esa wo'bok si pinénet im batu wangker.

³⁹ Wo icua i Yesus, “Angkaieno mio' si watu itu!” Taan si Marta poow i tou matéo kumua, “Tioo é Tuang, epato ngando sia imaté, anaé mawouwo.”

⁴⁰ Icua i Yesus, “Ra'ica réén aicua-Kuo ai co tarépé'? Sa percayanmu, sérénmu oka eng kawangko' ing kawasa i Amang Kasuruan.”

⁴¹ Wo angkaien éra em batu itu. Wo si Yesus kumanat angé wo kumua, “Amang, Yaku kumua makapulu'sama' a si Amang, ampa'paan liningao i Amang en sombayang-Ku.

⁴² Kailekan-Ku pelinga-lingan i Amang en sombayang-Ku. Taan intarépé' icua-Ku tanu siitu ampa'paan keli sé tou makali'cir Yaku makalinga in sombayang-Ku. Icasalé'-Ku ro'na percayan éra sapaoka si Amango e mutusai Yaku.”

⁴³ Kekawus ako Sia kumua in taniitu, Sia rumoma' in taangko', “Lazarus, kumesoto mai!”

⁴⁴ Wo si Lazarus si matéo itu kumesotai ang kubur itu. Eng kama wo eng kécéina pakawe'berené' ing kaéng kafan, wo en amona pakatutuwen ing kaéng limuut. Icua i Yesus ai séra, “Wukaano eng kaéng kafan itu wosama' sia ro'na maya'.”

Sé kikiiten é tou Yahudi mawasa-wasa e maté si Yesus

⁴⁵ Sé tou Yahudi sé mai e mibor si Maria, isuméré i niéma' i Yesus itu, akar keli en tou ai séra maéman ai Sia.

⁴⁶ Taan awéan piraan tou ai séra sé imangé a sé tou Farisi wo isisil éra e niéma' i Yesus itu.

⁴⁷ Ampa'paan in itu, sé kikiiten é imam wo sé tou Farisi tumowa sé Mahkamah Agama mali'us e mepaar, “Sapa réén e musti émaanta? Ampa'paan, si Tou itu méma'o ing keli kakaya'kaan.

⁴⁸ Sa iwayata Sia mengéma-ngéma' in taniitu, pakasa en tou mercaya oka Sia. Wo sé tou Roma maai oka tumongkar im Balé Le'nasta wo kita tou Yahudi pakapaté-patén.”

⁴⁹ Taan awéan esaan ai séra si makangaran Kayafas, si imam wangko' asi ta'un itu. Icuana ai séra, “Kamu anio' ra'ica makailek in sapa-sapa.

⁵⁰ Ra'ica kaangéan iow sapa si loor ai camu. Lébé loor esake' tou e maté wotaré cita im baya tou Yahudi pakapaté-patén é tou Romawi.”

⁵¹ En ulitna si aicua i Kayafas itu, ra'ica am bewerotna in esa taan asi Amang Kasuruan owo. Wo tanu imam wangko' asi ta'un itu, riniorano i Kayafas in cumua sapaoka si Yesus maté oka en lumowir sé tou Yahudi,

⁵² wo ra'ica asaloke' sé tou Yahudi, taan ka'i en lumi'us wo meesa sé toyaang i Amang Kasuruan sé imeseraro am pakasa ing kayo'baan.

⁵³ Tumo'tol asi endo itu sé kikiiten é agama Yahudi meesa en até e maté si Yesus.

⁵⁴ Ampa'paan in itu, si Yesus ra'io mapaturu-turu' ka'i a sé tou keli an uner é tou Yahudi. Itela'u-Na en Yerusalem wo Sia mangé ang kota makangaran Efraim si menduruan wo en tana' kapayasan. Sia mento' am bitu mewali-wali wo sé murit-Na.

⁵⁵ An tutuw itu matawio en endo wangko' Paska é tou Yahudi, keli tou Yahudi an tampa-tampa walina owo mangé an Yerusalem. Piraanné' ngando, ra'ipé' tumo'tol em pésta Paska séra imayo an Yerusalem eng kumiit in atoran agama e meresi in owak.

⁵⁶ Paéré-érén éra si Yesus. An tutuw éra makatulung am Balé Le'nas, séra membum-buéian i esa wo sé walina, “Tambisa réén em bewerot iow? Maai réén am pésta anio' Sia?”

⁵⁷ Séra mengkung-kuanan taniitu, ampa'paan sé kikiiten é imam wo sé tou Farisi imééo perénta sa awéan tou e makailek am bisa si Yesus, mai cua ai séra wosama' Sia ro'na tangkaan éra.