Yakobus 5 - En Taar Weru a nunuwu' é Tontemboan

En sina'u a sé tou siya'

¹ Éi kamu tou siya', aweso taré kamu intarépé' maamé'o mangé in sesendu'an ampa'paan kamu tenan oka ing kasusaan.

² Eng kasiyaan iow imawuruko, wo eng karai iow linolondio waya.

³ Mas wo em pérak iow tuma'incéré'o. En ta'incéré' ituo e imamuali tuus sapaoka kamu asalo i meruu-ruut ing kasiyaan. Ta'incéré' itu oka eng kuman in owak iow tanuoka in api tumunu in owak iow. Icamuo sé meruu-ruut ing kasiyaan asi endo-endo kaka'puan ing kayo'baan.

⁴ Ra'ica winéran iow sé tou matawoi maupu' an uma miow. Séra mapatawa-tawango wo em pinangimbulu éra itu kinalingaano i Casuruan si Makakawasa.

⁵ Kamu menonouo arui ang kasiyaan wo mengéla-ngéla in doit ang kayo'baan anio'. Kiniitano miow eng kasalé'an in até miow in esa, akar kamu makemel, tanu sé binatang papiaran si tu'tulo im pokolen.

⁶ Kamu mukumo wo matéo sé tou nianggap wutul i Amang Kasuruan, wo ra'ica kawooan éra sumundur icamu.

Malese-leseno mangé sa meta'up ing kawenduan

⁷ Ampa'paan in ituo é poo-poow, malese-leseno mangé kamu akar si Apo' Yesus maai sumawel. Séréno tambisa si tou menganguma talesen keli mengento-ngento' in uran an oras i mausew wo an oras in tinanem mua'. Sia talesen mengento-ngento' im buéna si awéan em bééna asi tana'na itu.

⁸ Taniituo ka'i kamu, malese-leseno mangé wo kete-ketereno mangé en até miow ampa'paan ra'io uré en orasna si Apo' Yesus maai sumawel.

⁹ Poo-poow, tioo kamu mengimbu-ngimbulu wo membém-béan séa' wosama' kamu ra'ica ukumen i Casuruan. En ulitna, si Akim maayo, Sia an dioro im papalen.

¹⁰ Poo-poow, ta'néieno mangé sé nabi indior sé makua in taar i Casuruan. An tutuw itu séra meta'up ing keli kawenduan, taan séra kasake' talesen. Anaé, kiiteno mangé eng katalesenan éra itu.

¹¹ En ulitna, sé tou talesen makiit si Casuruan mandé ka'i meta'up ing kawenduan, séra itu tou pakakamangen. Wo tantu pinalingao miow andumoro' ing katalesenan i Ayub. Wo kailekan iow kekawus ako in itu, sia kinamang i Amang Kasuruan, ampa'paan si Amang Kasuruan taloso taupus wo wuta ing kaupusan a sé tou.

En andumoro' in sumpa wo en sombayang torona é tou sumakit

¹² Poo-poow! Eng kumataré-taré, tioo kamu mengasumpa ang karapi i ngaran in langit wo in tana' kuma'pa sapa-sapake' mangé. Sa wutul, icuao mangé “wutul”. Wo sa ra'ica wutul, icuao mangé “ra'ica wutul”. Wo in taniitu kamu ra'ica kawisa ukumen i Casuruan.

¹³ Sa awéan esaan angé ai camu meta'up ing kawenduan, aweso taré sia sumombayang. Sa awéan tou arui en até, aweso taré sia kumantar rumayo si Casuruan.

¹⁴ Sa awéan esaan angé ai camu sumakit, aweso taré sia tumowa sé penatua an jamaat, wosama' isombayang éra wo kisun éra in solo sia maké i ngaran i Casuruan.

¹⁵ Sa séra sumombayang wo maéman a si Casuruan, tantu en sakit i tou itu masama'. Wo sa si tou itu méma'o ing kamesé-meséaan, sia ampungan oka.

¹⁶ Ampa'paan in ituo, mangakuo mangé ing kamesé-meséaan asi esa wo si esa wo menson-sombayangano mangé wosama' kamu masama'. En sombayang é tou mengaéma' im butul uli-ulit wangko' eng kawasana.

¹⁷ Si Elia tou kaputéta. Sia uli-ulit masombayang mangilek ra'ica toro muran, wo uli- ulit tuu ra'ica tumumpa en uran ang kayo'baan telu ngata'un wo enem ngaserap eng kauré.

¹⁸ Wo sia sumombayang sumawel ka'i e mangilek uran wo tumumpa mai en uran an langit owo wo en tinanem an tana' mua'.

¹⁹ Poo-poowku, sa awéan esaan angé ai camu, indior makiit in sususuien wutul i Casuruan taan intarépé' isumélé'kowo asi sususuien wutul itu, uli-ulit loor woo sa awéan tou en tumawang isia e maréng sumawel a si sususuien wutul i Casuruan itu.

²⁰ Ta'néien iow en anio': Si tou e makin sumawel si tou meséa' tumela'u in lalan sélé'kow, niéma'nao e mu'kur i tou itu lowiren oka am papaté wo niéma'nao eng kamesé-meséaan i tou itu niampungan.