Yakobus 3 - En Taar Weru a nunuwu' é Tontemboan

Téirano sumama-sama' en lila'

¹ Poo-poowku! Tioo takeli ai camu sé masalé' mamuali guru, ampa'paan kailekan iow sapaoka si guru tumerima oka in ukuman si lébé uterai.

² Kita im baya mengaéma' ing kaséaan am baya-waya. Si tou makawoo tuméir im ba'ba'na akar ra'ica suméa' rumoma', sia itu tou lekep si ro'na kumawasa waya in owakna.

³ En andéanna si cawayo: Sa em ba'ba'na pinakéano songkom wo wina'kesano in tali léis wo wésoonta en tali léis itu, tantu si cawayo kumiit ing kasalé'anta. Wo in taniitu si cawayo ro'na peréntanta.

⁴ Awéan ka'i andéan walina tanumai ing kapal wangker. Mandé ka'i eng kapal itu wawangkeran wo iwali in deges repet, taan ro'na kaatoran ing kamudi tumeki-tekic kumiit ing kasalé'an i nakoda.

⁵ Taniitu ka'i en lila'ta. En lila'ta itu waya in tekic an owakta, taan sia ro'na tumirayo numuwu' andumoro' sé wawangkeran. Taniitu ka'i wo en api, mandé en api waya in tekic, ro'na luma'ung in talun wawangkeran.

⁶ En lila' itu meputé ka'i wo en api. En lila' itu waya in tekic an owakta wo ro'na luméwo' in owakta wo tumunu waya ing katouanta. En lila' itu imaléwo' taniitu ampa'paan en lila' itu meputé wo si kikiiten é sétang iméé mai in api asi api si ra'ica mape'de-pe'del.

⁷ Pakasa sé binatang sé ra'ica papiaran, sé burung, sé binatang maloyon, wo ka'i sé sera' an ta'sic ro'na naramen é tou.

⁸ Taan ra'ica wana mandé esake' tou e makawoo tuméir in lila'na. En lila' itu léwo' wo ra'ica wana e makawoo tuméir wo wuta i racung e ro'na makawali am papaté.

⁹ En lila'ta ro'na papakénta rumayo si Casuruan Amangta wo ang karapi in lila' itu ka'i pakénta makutuk sé tou sé niéma' i Amang Kasuruan meputé wo Sia.

¹⁰ Asi wa'ba' si meputé itu, lumembo mai ka'i eng kamang wo eng kutuk. En itu, é poo-poow, ra'ica toro mamuali.

¹¹ En andéanna tanu im palémboian in dano, tantu ra'ica wana rano tewang wo maasin en lumemboi asi esa palemboian.

¹² Poo-poowku, ra'ica kawisa en tuura in ara mua' in zaitun. Wo en tuura in anggor tantu ra'ica kawisa mua' in ara. Taniitu ka'i em palemboian in dano maasin, tantu ra'ica kawisa lumemboi in dano tewang.

Eng kapinteran asi Amang Kasuruan owo

¹³ Sa an esaan ai camu awéan kapinteran asi Amang Kasuruan owo wo keli eng kakailekan, musti ituru'na ang karapi i menonou in loor. Sia musti méma' in loor ang karapi ing kako'kosan in até si mai ang kapinteran i Casuruan owo.

¹⁴ Taan sa en até miow awéan em panganaten wo menonou ang katoronaanke' in owakna in esa, tioo kamu tirayo wo tioo matowo eng kumua sa kamu itu awéan kapinteran asi Casuruan owo, wo in taniitu ra'ica toro sélé'kow iow en sususuien wutul.

¹⁵ Sa eng kapinteran iow tanuke' siitu, eng kapinteran itu ra'ica asi Amang Kasuruan owo taan asi cayo'baan anio' owo, ang kasalé'an in owak owo wo asé sétang owo.

¹⁶ Ampa'paan sa awéan tou manganat wo menonou ang katoronaanke' in owakna in esa, am bitu tantu awéan eng kalicokoan wo ka'i pakasa sé andumoro' sé léwo'.

¹⁷ Taan si tou awéan kapinteran asi Amang Kasuruan owo itu, tana'i: Kataré sia menonou ang karapi in até weresi wo masalé' meelu-eluran wo sé tou, sama' a sé tou, téés, wuta ing kaupusan a sé tou wo mengéma-ngéma' andumoro' sé loor, ra'ica marapit wo ra'ica punek.

¹⁸ Mémang wutul eng kalooran ituo wuéna in lulumbo ing kaeluran si aiwuras é tou sé masalé' ing kaeluran.