Yakobus 2 - En Taar Weru a nunuwu' é Tontemboan

Tioo kamu masisirke' in tou

¹ Poo-poowku! Icita anio' tou maémano a si Yesus Kristus, Apo'ta si parayo-rayo wo pasiri-siriin. Tioo kamu masisirke' in tou asalo maséré ing kasiyaan.

² En andéanna, awéan si tou siya' mai am paapo'an iow, sia makasondol in cincin mas wo mekarai loor sosor ulit em bééna. Wo muntep ka'i mai si tou lengéi am bitu sia mekarai ra'ica loor.

³ Si tou mekakarai loor wo sosor ulit em bééna sinungkul iow in sumiri' wo icua miow ai sia, “Mayoo é tuang, lumukuto mai asi palukutan loor anio'” Taan a si tou lengéi itu icua miow, “Tumulungo mio' am bitu!” kuma'pa “Lumukuto mai an salé' anio' an duru im paléakan ing kécéiku!”

⁴ E niéma' miow itu mamualio tuus sapaoka ra'ica pengapeputén iow masiri' in tou wo tanu mamualio akim ang karapi i mawasa in léwo'.

⁵ Poo-poow sé icaupusku! Lingano mai en icuaku anio': Sinisiro i Amang Kasuruan sé tou sé paweroten ing kayo'baan anio' lengéi, wosama' séra masiya' am paémanen éra wo makaanu im bagéan ang kakolanoan-Na tanu si aijanji-Nao a sé pakasa in tou sé mengaupus Sia.

⁶ Taan aiséro'ke' miow sé tou lengéi itu. En ulitna sé tou siya'o e maokoi wo makawali icamu am pangadilan.

⁷ Séra itu ka'i maojat i Ngaran i parayo-rayo wo pasiri-siriin, taan asi Ngaran ituo, kamu imamuali anu i Amang Kasuruan.

⁸ Sa émaan iow en ukum kumataré-taré si aipatic ang Kitap Le'nas, “Mengaupuso mangé sé tou walina, meputé kamu mengaupus in owak iow in esa!”, kamu iméma'o im butul.

⁹ Taan sa kamu masisirke' in tou, kamu iméma'o ing kamesé-meséaan, wo ampa'paan kamu isumangkalo in ukum itu, en tuusna kamu méma'o ing kamesé-meséaan.

¹⁰ Ampa'paan si séi eng kumiit im pakasa in ukum i Amang Kasuruan taan esake' en da'ica émaanna, sia sumangkalo pakasa in ukum itu.

¹¹ Si Amang Kasuruan sumangkumo icumua, “Tioo mengabersina”, icua-Na ka'i, “Tioo mengapaté tou”. Anaé, mandé kamu ra'ica mengabersina taan kamu imatéo tou, en itu meputé wo icamu isumangkalo in ukum i Amang Kasuruan.

¹² Ampa'paano in itu, mareti-retio mangé sa numuwu' wo am pengaémaan. Ampa'paan kamu akimen oka iciit in ukum-ukum sé imekar icamu ang kamesé-meséaan.

¹³ Sa an témponao si Casuruan mai makim sé tou, Sia ra'ica kawisa tumuru' ing kaupusan a sé tou sé ra'ica wana kaupusan a sé tou walina. Taan sé tou mengaupus sé tou walina, séra ra'ica makéré in ukumen asi endo pengaakiman.

Em paémanen sa ra'ica pengaémaan ra'ica wana torona

¹⁴ Poo-poowku! Sa si tou kumua sia maéman a si Casuruan, taan ra'ica pengaémaanna en airu'du' i Casuruan, em paémanenna itu ra'ica wana torona. Ro'na réén em paémanen tanu siitu en lumowir sia?

¹⁵ En tuusna tana'i: Awéan poow iow tuama kuma'pa wéwéné ra'ica wana karai kuma'pa ra'ica awes eng kakanen susur in endo.

¹⁶ Wo icua miowke' ai sia, “Mangéo in sama', makéo mio' ing karai' kura'ber wosama' ko ra'ica kautingan, wo ka'i kumano mio' akar imawesu wosama' ko ra'ica kaareman”. En aicua miow itu ra'ica wana torona sa ra'ica winéan iow em paperlunna.

¹⁷ Taniitu ka'i em paémanenta a si Casuruan. Sa kita maéman taan ra'ica paémaanta en airu'du' i Casuruan, em paémanenta itu ra'ica wana torona.

¹⁸ Taan awéan wona' tou makua, “Ico awéan em paémanen, taan aku awéan em pengaémaan.” Taan icuaku oka ai sia, “Tambisa réén ko ro'na tumuru' im paémanenmu sa ra'ica maéma' im butul a sé tou walina? Ituru'ku oka em paémanenku ang karapi maéma' im butul.”

¹⁹ Percayan iow sapaoka waya in esa si Amang Kasuruan, en itu loor! Taan sé sétang ka'i mercaya andumoro' in itu wo séra gume'ger in indé'.

²⁰ Éi camu sé tou bodok! Masalé' réén pangakun iow intarépé' sapaoka em paémanenmu ra'ica wana torona sa ra'ica pengaémaan?

²¹ Séréno si apo'ta Abraham. Aisarakanna si toyaangna Ishak tanu raragés am bawo im paragésan, ampa'paan si niéma' i Abraham itu, akar sia nianggap wutul i Amang Kasuruan.

²² Ro'nao kailekan iow sapaoka sia maéman wo ka'i pengaémaanna si airu'du' i Casuruan ai sia, wo in taniitu em paémanenna a si Casuruan makaleke-lekep.

²³ Anaé, e niéma' i Abraham itu ilumekepo si aipatic ang Kitap Le'nas, “Abraham maéman a si Amang Kasuruan, ampa'paano in itu sia nianggap-Na wutul.” Wo sia patuulen, karapi i “Amang Kasuruan.”

²⁴ Anaé, sérén iow sapaoka sé tou paanggapen wutul i Casuruan en itu ra'ica asaloke' i maéman taan ka'i ampa'paan im pengaémaan.

²⁵ Séréno ka'i si Rahab, si wéwéné sundal. Sia itu nianggap wutul i Casuruan ampa'paan im paémaanna. An tutuw itu tinerimana wo ayenepna am baléna sé tou Israel sé mawere-weren, wo iwalina séra kumesot kumiit an lalan walina.

²⁶ Anaé, si tou makua sapaoka sia maéman a si Casuruan taan ra'ica maéma' in loor, em paémanenna itu ra'ica wana torona. Sia itu meputé wo si tou makaowak taan ra'ica nimu'kuran.