Yakobus 1 - En Taar Weru a nunuwu' é Tontemboan

En siri'

¹ Siri' a yaku owo Yakobus, ata i Amang Kasuruan wo i Apo' Yesus Kristus. Aipaticku en surat anio' a sé sangapulu' rua suku Israel am panangkéian sé maémano a si Yesus Kristus.

Em paémanen wo eng kapinteran asi Amang Kasuruan owo

² Poo-poowku! Sa kamu meta'up i membam-balinaan pangepé'- an, terimano mangé waya en itu ang karapi in arui en até.

³ Ampa'paan kailekan iow sa kamu tatap maéman a si Casuruan an tutuw iow meta'up i membam-balinaan pangepé'an, en itu méma' oka icamu makale'tek maéman.

⁴ Kamu kasake' le'tek maéman tanu siitu wosama' em paémanen iow wutu-wutul makaketer wo makaleke-lekep wo ra'ica imaina' sapa-sapa.

⁵ Sa awéan esaan ai camu mendam wayapé' im pira eng kapinteran asi Amang Kasuruan owo, aweso taré sia mangilek angé a si Amang Kasuruan. Wo énan-Na oka mai em pinangilek itu. Ampa'paan si Amang Kasuruan mengawéé a sé im pakasa in tou ang karapi ing kasamaan in até, ra'ica mengaimbo'.

⁶ An tutuw sia mangilek a si Casuruan, musti émanenna mangé em pinangilekna itu, tioo marua-rua até. Si tou marua-rua até, meputé wo in sempa' an ta'sic si ipawali-wali in deges.

⁷ Si tou tanu siitu, tioo mawerot sa sia makéré in sapa-sapa asi Casuruan owo.

⁸ Ampa'paan si tou marua-rua até, em pakawerotna ra'ica le'tek a si Casuruan, siituo eng katouanna ra'ica elur.

En sina'u a sé tou lengéi wo a sé tou siya'

⁹ Si poow lengéi esa paémanen a si Yesus, sia itu musti tumirayo sa sia irangka' i Casuruan.

¹⁰ Wo si tou siya' esa paémanen a si Yesus, sia ka'i musti tumirayo sa émaan i Casuruan sia mamuali tou wawa', ampa'paan si tou siya' maka'pu oka kaputé im bungang in dukut maweles rior.

¹¹ Sa si yéndo mantango mai wo em paso' in télangna makatena-tena in dukut, en dukut itu maweles. Ampa'paan in itu em bungangna rumongkor wo maka'pu eng kapasungna. Tanu siituo ka'i sé tou siya', an tutuw éra rumaméji menawo-nawoi masuun in doit keli, séra in esa maté oka.

Em pangepé'an ra'ica asi Amang Kasuruan owo

¹² Pakakamangeno sé tou talesen masaru im pangepé'an wo kasake' maéman a si Amang Kasuruan, ampa'paan kéréanna oka e mahkota ing katouan akar ing kauré-uré si aijanji-Nao a sé tou sé mengaupus ai Sia.

¹³ Sa awéan tou makéré im pangepé'an, tioo cuana, “Si Amang Kasuruano e méé mai im pangepé'an a yaku!” Ampa'paan si Casuruan ra'ica kapangépé'an in léwo' wo Sia ka'i ra'ica kawisa mangepé' a sé tou.

¹⁴ Sa awéan tou katawéran maéma' in léwo', en itu ampa'paan sia kumiit ing kasalé'anna in esa mengaéma' in léwo'.

¹⁵ Wo sa eng kasalé'an itu kiniitannao, sia iméma'o ing kamesé-meséaan. Wo sa eng kamesé-meséaan itu icumawasao isia, eng kasiwakanna sia makéré oka im papaté.

¹⁶ Poo-poow sé icaupusku! Tioo kamu icasélé'kow.

¹⁷ Pakasa sé loor wo lekep, mai an dangka' owo, asi Amang an sorga. Siao e méma' waya sé mengasendot an langit. Sia ra'ica kawisa mawalina, ra'ica tanu in serap wo sé sumesendot, en sendotna ro'na mawalina.

¹⁸ Kita niéma'-Na mamuali toya-toyaang-Na ang karapi in Taar wutul kumiit ing kasalé'an-Na. En itu icasalé'-Na wosama' kita mamuali wuéna kataré-taré asé im pakasa sé niéma'-Na.

Lingan wo émaano en Taar i Casuruan

¹⁹ Poo-poow sé icaupusku! Musti ta'néien iow in andumoro' sé anio': Sa awéan tou ang karoro'an imaroma' lingan owo em pakuana. Tioo taporak manuwu' wo tioo taporak mae'bow.

²⁰ Ampa'paan sa si tou mae'bow, ra'ica kaémaanna en sususuien wutul e méma' in até i Amang Kasuruan arui.

²¹ Anaé, itiya'o waya sé ra'ica wutul wo ka'i mentoo mengéma-ngéma' ing kaléwo'an' sé taloso keli itu. Terimano mangé en Taar i Casuruan ang karapi ing ko'kos en até. En Taar si ayusew an até miow awéan kawasa en lumowir icamu.

²² Tioo kamu asaloke' mengalinga in Taar i Casuruan, taan musti pengaémaan iow. Sa en Taar itu ra'ica pengaémaan iow, en itu meputéke' kamu imuwako in owak iow in esa.

²³ Si tou asaloke' iluminga in Taar i Casuruan taan ra'ica pengaémaanna, sia itu tanuoka si tou ruma'da ing giona an dior in cermin,

²⁴ kumawusai sia ruma'da ing giona wo itumela'u in cermin itu, ailupanao tambisa eng giona.

²⁵ Taan en tou sé mati'tir in ukum si lumeke-lekep, awéan kawasa e mekar sé tou sé iméma' ing kamesé-meséaan, si tou itu kasake' le'tek an ukum itu wo ka'i pengaémaanna, ra'ica asalo iluminga wo ilupana. Si tou tanu siitu kamangen oka ampa'paan sapa sé paémaanna.

²⁶ Sa si tou maanggap sia maapo' makiit ing kasalé'an i Casuruan, taan sia ra'ica matéir im ba'ba'na, sia itu imuwako in owakna in esa. Em pakaapo'na itu ra'ica wana torona.

²⁷ Taan imaapo' im butul wo lekep an dior i Casuruan Amangta, tanu si anio': Tumawang sé toyaang ula wo sé wéwéné balu ang kasusaan éra wo matéir in owak wosama' ra'ica kumiit ing kasalé'an ing kayo'baan anio'.