Wahyu 8 - En Taar Weru a nunuwu' é Tontemboan

Si Toyaang i Domba muka' in ségél kapitu

¹ An tutuw i Toyaang i Domba muka' in ségél kapitu, pakasa sé an sorga ra'io kalingaanai en suara eng kauréna wona' sténga jam.

² Wo sérénku sé pitu malaékat sé makatulung an dior i Amang Kasuruan, séra si esa wo si esa winéan esa terompét.

³ Wo mai si esa malaékat walina, wo tumulung an dior im pawetaan i raragés. Sia makatimboi im patemburan in dupa si niéma' a mas owo. Sia winéan kumeli-keli kamenyan e iragés mewali-wali wo in somba-sombayang im pakasa é tou le'nas am bawo im pawetaan i raragés niéma' a mas owo si pakatulir an dior im palukutan pasiri-siriin itu.

⁴ Wo ang kama i malaékat itu en tembur ing kamenyan wo in somba-sombayang é tou le'nas sumosor mewali-wali akar a si Amang Kasuruan.

⁵ Wo si malaékat itu mindo im patemburan in dupa itu, pumpunanna in api asi pawetaan i raragés owo. Wo iwangkilna em patemburan in dupa itu ang kayo'baan. Wo tuméngé mai en erut, parapiten ing kilat wo im pangéro'.

Sé epat malaékat sumengo in terompét

⁶ Wo sé pitu malaékat sé makatimboi mekélé esa terompét itu tu'tulo en sumengo in terompét.

⁷ Wo si malaékat kataré sumengo in terompétna, wo mamualio mai en uran éis wo api kinemu in enda'. Wo pakasa in itu iténdél ang kayo'baan. Sangapetelu ing kayo'baan wo sangapetelu in tuu-tuura ing kayu wo pakasa en dukut makatunu-tunu.

⁸ Wo si malaékat karua sumengo in terompétna, wo awéan tanuoka kuntung wangker si mengembu-ngembung aiténdél an ta'sic. Wo sangapetelu in dano an ta'sic imamuali enda',

⁹ wo sangapetelu é menonou an ta'sic me'delo waya, wo ka'i sé sangapetelu eng kakelina ing kapal an ta'sic materio.

¹⁰ Wo si malaékat katelu sumengo in terompétna, wo rumongkorai ka'i an langit owo si esa sumesendot wangker si mengembu-ngembung tanuoka im pakaembung in obor, wo irumongkor an sangapetelu in doyo-royongan wo ka'i am pakasa im palemboian in dano.

¹¹ E ngaran i sumesendot itu Apsintus. Sangapetelu asé pakasa in dano mapentu', wo kelian tou imaté ampa'paan in dano pentu' itu.

¹² Wo si malaékat kaepat sumengo in terompétna, wo sangapetelu i yéndo, serap wo sé sumesendot kinapasutan akar sangapetelu asé im pakasa sé kinapasutan itu mariréimbeng. Wo in taniitu sangapetelu in endo mariréimbeng, taniitu ka'i sé sangapetelu im bengi.

¹³ Wo kaséréanku awéan esa rajawali tuméléw rumangka-rangka' an langit. Wo linganku si rajawali itu mengangko-ngangko', “Icawangkur, icawangkur, icawangkuro sé tou sé maento' ang kayo'baan, ampa'paan awéané' telu malaékat walina sé sumengo oka in terompét éra.”