Wahyu 7 - En Taar Weru a nunuwu' é Tontemboan

Sé tou Israel sé sinégél

¹ Kekawus in itu, kaséréanku awéan epat malaékat makatulung an epat pawayaan in deges ang kayo'baan. Péneten éra en epat lalan in deges itu wosama' ra'ica rumeges ang katanaan, an ta'sic, kuma'pa an tuu-tuura ing kayu.

² Wo kaséréanku ka'i awéan esa malaékat walina mapaturu' mai in owak a mico em paantanganai i yéndo. Si malaékat itu maali-ali in ségél asi Amang Kasuruan owo si menonou. Wo si malaékat itu kumua in taangko' a sé epat malaékat sé winéano kawasa en luméwo' ing katanaan wo in ta'sic,

³ “Tioo léwoon eng katanaan, en ta'sic kuma'pa sé tuura ing kayu, sa ra'ipé' pinakaségél ami en tuintung é ata i Amang Kasuruan ami!”

⁴ Wo palinganku sapaoka eng kakeli é tou sé sinégél itu sangaatus epat ngapulu' epat riwu tou, sé imai asé im pakasa in suku é tou Israel.

⁵ Asi suku i Yehuda sangapulu' rua ngariwu sé sinégél, asi suku i Ruben sangapulu' rua ngariwu, asi suku i Gad sangapulu' rua ngariwu,

⁶ asi suku i Asyer sangapulu' rua ngariwu, asi suku i Naftali sangapulu' rua ngariwu, asi suku i Manasye sangapulu' rua ngariwu,

⁷ asi suku i Simeon sangapulu' rua ngariwu, asi suku i Lewi sangapulu' rua ngariwu, asi suku i Isakhar sangapulu' rua ngariwu,

⁸ asi suku i Zebulon sangapulu' rua ngariwu, asi suku i Yusuf sangapulu' rua ngariwu, asi suku i Benyamin sangapulu' rua ngariwu.

Sé tou keli ra'io karékénan

⁹ Kekawus in itu, sérénku ka'i sangareru' tou sé ra'io karékénan eng kakelina. Séra itu asé im pakasa im bangsa, in suku, i negara, wo i nunuwu'. Séra makatulung an dior im palukutan pasiri-siriin wo an dior i Toyaang i Domba itu. Séra mekarai ing kulo' wo eng kama éra makatimboi in lala-lalaina im palem.

¹⁰ Ang karapi in taangko' icua éra, “Eng kalowiran itu asi Amang Kasuruan ami owo si makalukut am palukutan pasiri-siriin wo asi Toyaang i Domba.”

¹¹ Kekawus in itu, pakasa sé malaékat tumulung wo lumi'cir im palukutan pasiri-siriin ang karapi é matu'a wo sé epat mahluk itu. Sé malaékat itu kumundu an dior im palukutan pasiri-siriin, wo kumuru en sumiri' a si Amang Kasuruan.

¹² Wo icua éra, “Ulit! Irayoo mangé si Amang Kasuruan! Toronake' Sia e rarayo wo en sisiri', eng kapinteran, wo i makapulu'sama', siri', kakawasaan, wo kaketeran akar ing kauré-uré! Ulit.”

¹³ Wo esaan asé matu'a itu mamuéi a yaku, “Si séi réén séra sé makapaké in juba kulo' itu? Am bisa owo réén séra wo mai?”

¹⁴ Wo sowatenku, “Tuang! Si tuang e makailek.” Wo icuana a yaku, “Séra ituo sé tou ilumangkoio mai ing kawenduan wangko'. Wo pakén éra en enda' i Toyaang i Domba eng kumemes in juba éra wo méma' akar i makulo'.

¹⁵ Ampa'paan in ituo, séra makatulung an dior im palukutan pasiri-siriin i Amang Kasuruan wo sumelewir Sia endo wo em bengi an untep im Balé Le'nas. Wo Sia si makalukut asi palukutan pasiri-siriin itu mewali-wali oka ang karapi éra en lumoindong iséra.

¹⁶ Séra ra'io ka'i maarem kuma'pa maré'om. Wo ka'i eng kapaso'na i yéndo ra'io tumena iséra.

¹⁷ Ampa'paan si Toyaang i Domba si an uner im palukutan pasiri-siriin itu mamuali oka gembala éra, wo akinen-Na séra mangé asi palemboian in dano si mengawéé ing katouan. Wo pisin oka i Amang Kasuruan pakasa en dano im beren éra.”