Wahyu 6 - En Taar Weru a nunuwu' é Tontemboan

Si Toyaang i Domba muka' in enem ségél

¹ Wo kaséréanku si Toyaang i Domba muka' in ségél kataré asé pitu ségél. Wo kalingaanku esa asé epat mahluk itu maangko', tanuoka in erut maténgé. Icuana, “Mayoo!”

² Wo kaséréanku esa kawayo kulo'. Si tou si makasaké asi cawayo itu makatimboi im pana. Wo sia winéan mahkota, wo melala'us angé eng kumala sé kaséké'na wo muntung.

³ An tutuw i Toyaang i Domba muka' in ségél karua, kalingaanku si mahluk karua kumua, “Mayoo!”

⁴ Wo mapaturu'o mai si esa kawayo walina, si cawayo itu réindang tanuoka embung in api. Wo si tou si makasaké asi cawayo itu winéan kawasa e mindo ing kaeluran ang kayo'baan, akar sé tou mempam-patéan. Wo sia winéan esa sa'bel wangker.

⁵ An tutuw i Toyaang i Domba muka' in ségél katelu, kalingaanku si mahluk katelu kumua, “Mayoo!” Wo kaséréanku esa kawayo wuring. Si tou makasaké asi cawayo itu eng kamana makatimboi in esa timbangan.

⁶ Wo palinganku tanu awéan suara an uner é epat mahluk itu makua in tana'i, “Sanga liter sléi em bééna esa dinar, wo telu liter gandum em bééna esa dinar. Taan tioo peléwoon en solo wo en anggor itu.”

⁷ An tutuw i Toyaang i Domba muka' in ségél kaepat, kali- ngaanku si mahluk kaepat kumua, “Mayoo!”

⁸ Wo kaséréanku esa kawayo kulo tina'. Wo si tou makasaké asi cawayo itu, e ngaranna ‘Papaté’, wo pakiiten ing kakolanoan im papaté. Séra in dua winéan kawasa e maté sé sangapeepat tou ang kayo'baan anio' ang karapi in sa'bel, ang karapi ing kaareman, ang karapi in sakit malawé, wo ang karapi é binatang léwo' sé ang kayo'baan.

⁹ Wo tutuw i Toyaang i Domba muka' in ségél kalima, kaséréanku sé mu'kur an darem im pawetaan i raragés sé pinatéo ampa'paan in Taar i Amang Kasuruan wo ampa'paan ing kasairi-sairian éra.

¹⁰ Wo sé mu'kur itu kumua in taangko' keli, “O Kasuruan Si Makakawasa si le'nas wo wutul! Urépé' réén sé tou ang kayo'baan akimen i Casuruan? Wo kawisa réén suliin-Mu sé tou imaté icami?”

¹¹ Wo sé mu'kur itu winéan mekélé esa karai lambot kulo' wo séra kinuanan i mento'pé' toyo' ka'i akar eng kakeli éra malekep. Ampa'paan awéané' sé kara-karapi éra maselewir wo sé poo-poow éra esa paémanen sé patén oka tanu iséra.

¹² Kaséréanku, an tutuw i Toyaang i Domba muka' in ségél kaenem, mangéroo mai eng kayo'baan repet keli. Si yéndo imawuring tanu ing karai wuring si kanaramen pengapakén é mala'lu wo si serap maréindang tanu in enda'.

¹³ Wo sé sumesendot an langit merongko-rongkor ang kayo'baan tanu in tuura in ara mengarongkor im bua-wua'na sé rowaré' pakésé in deges repet.

¹⁴ Wo en langit makala'us icatala tanuoka ing gulungan kitap si ginulung, eng kuntu-kuntung wo em pulo-pulou icaéra an tampana.

¹⁵ Wo sé kolano ang kayo'baan, sé tou wangko', sé kikiiten é suraro, sé tou siya', sé tou makatimboi ing kawasa, sé ata wo sé tou ra'ica pakakawasan é tou walina, séra im pakasa rumaméji menep an untep im bo'bo-wo'bok wangker, wo am paawuu-paawuun im batu- watu ing kuntung.

¹⁶ Wo icua éra a sé kuntung wo a sé watu itu, “Mapokalo mai wo tawunano mai kami wosama' kami caenep ai Sia si makalukut asi palukutan pasiri-siriin itu wo icaséip ang kae'bowan i Toyaang i Domba itu.

¹⁷ Ampa'paan imayo en endo si kaindéén, si endo i Amang Kasuruan wo si Toyaang i Domba makim pakasa in tou. Si séi réén e ro'na makatang?”