Wahyu 5 - En Taar Weru a nunuwu' é Tontemboan

Eng kitap sinégél wo si Toyaang i Domba

¹ Kekawus in itu sérénku esa gulungan kitap si ang kama kakan-Na si makalukut am bawo im palukutan pasiri-siriin itu. Eng gulungan ing kitap itu pinatican waya an untep wo ang kesot, wo sinégél im pitu ségél.

² Wo kaséréanku ka'i esa malaékat makaowak enté', mengangko-ngangko' wo icuana, “Si séi em patus muka' in ségel-ségélna wo muka' ing gulungan kitap itu?”

³ Taan ra'ica wana mandé esaké tou e makawoo muka' ing gulungan kitap itu kuma'pa suméré sé an untepna, mandé sé an sorga, sé ang kayo'baan kuma'pa sé an darem ing kayo'baan.

⁴ Wo aku maamé' in sesendu'an, ampa'paan ra'ica wana mandé esake', tou em patus muka' ing gulungan kitap itu kuma'pa suméré sé an untepna.

⁵ Wo esaan asé rua ngapulu' epat matu'a kumua a yaku, “Tioo ko maamé'! Séréno! Awéan Singa asé suku i Yehuda owo, Siao si taranak i Daud. Sia muntungo akar Sia ro'na muka' sé pitu ségélna wo ing gulungan kitap itu.”

⁶ Wo sérénku awéan esa Toyaang i Domba tanu sumangkumo pinaté, makatulung an uner im palukutan pasiri-siriin wo sé epat mahluk wo an uner é matu'a itu. Sia makaanu pitu sungé wo pitu weren. Sé pitu weren ituo sé pitu Roh i Amang Kasuruan sé ayutus am pakasa ing kayo'baan.

⁷ Wo mai si Toyaang i Domba itu wo tumerima ing gulungan kitap itu ang kama kakan ai Sia owo si makalukut am palukutan pasiri-siriin itu.

⁸ An tutuw Sia mindo ing gulungan kitap itu, sé epat mahluk wo sé rua ngapulu' epat matu'a kumundu an dior i Toyaang i Domba itu. Sé mahluk wo sé matu'a itu makatimboi mekélé esa kecapi wo mekélé esa paelepan mas si wuta ing kamenyan. Siituo en sombayang é tou le'nas.

⁹ Wo séra kumantar esa kakantaren weru tana'i: “Icoo em patus tumerima ing gulungan kitap itu, wo muka' in ségél-ségélna. Ampa'paan Ko sumangkumo pinaté, wo ang karapi in enda'-Mu, tinu'bus-Muo séra torona i Amang Kasuruan, séra itu mai am pakasa in suku, i nunuwu', i negara wo im bangsa.

¹⁰ Séra itu niéma'-Muo mamuali esa kakolanoan, wo mamuali imam-imam i Amang Kasuruanta. Wo séra merénta oka tanu kolano ang kayo'baan.”

¹¹ Kekawus in itu sérénku wo linganku en suara é kelian malaékat sé lumi'cir im palukutan pasiri-siriin, sé mahluk wo sé matu'a itu, eng kakeli éra mariwu-riwu wo mayuta-yuta.

¹² Séra im baya mewali-wali makantar in taangko' keli. Em pakantar éra tana'i, “Si Toyaang i Domba si sumangkumo pinaté itu em patus tumerima ing kawasa, ing kasiyaan, ing kapinteran, ing kaketeran, in siri', im parayo-rayo wo pasiri-siriin wo rarayoan.”

¹³ Wo kalingaanku pakasa sé mahluk an sorga, ang kayo'baan, an darem ing kayo'baan wo an ta'sic, séra mewali-wali kumua, “Toronake' Sia si makalukut am palukutan pasiri-siriin wo torona i Toyaang i Domba, e rarayo wo in sisiri' wo iparayo-rayo wo pasiri-siriin wo ing kawasa akar ing kauré-uré.”

¹⁴ Wo sé epat mahluk itu kumua, “Ulit!” Wo sé matu'a itu ka'i kumundu wo kumuru in sumiri'.