Wahyu 3 - En Taar Weru a nunuwu' é Tontemboan

En taar a si jamaat an Sardis

¹ “Ipatico mio' a si malaékat si mengatéir in jamaat an Sardis. Si anioo en taar si ai Sia owo si makaanu sé pitu Roh i Amang Kasuruan wo sé pitu sumesendot itu: Kailekan-Ku waya sé pinengaéma' miow. Kamu kaséréan menonou taan en ulitna matéo!

² Menonouo mangé sumawel maéman a Yaku wo keteren sumawel em paémanen iow si matawio maté, ampa'paan kailekan-Ku ra'ipé' wana en lekep mandé esake' en tinawoi miow an dior i Amang Kasuruan.

³ Pena'né-na'néieno mangé en sususuien si liningao wo tinerimao miow. Émaano mangé en sususuien itu wo mape'diso mangé! Sa kamu ra'ica matéi-téir, Yaku maai oka tanu si rombit. Ra'ica kailekan iow kawisa Aku maai.

⁴ Taan an Sardis awéané' sé tou sé ra'ica kumotor ing karai éra. Séra maya' oka mewali-wali wo Yaku mekarai ing karai kulo', ampa'paan séra patus tumerima in itu.

⁵ Si séi e muntung sia pakéan ing karai tanu siitu. Wo e ngaran i tou itu ra'ica pisin-Ku ang kitap ing katouan, taan pangakun-Ku oka e ngaranna an dior i Amang-Ku wo an dior é malaékat-Na.

⁶ Si séi si makalunteng, aweso taré linganna sapa en aicua i Roh a sé jamaat.”

En taar a si jamaat an Filadelfia

⁷ “Ipatico mio' a si malaékat si mengatéir in jamaat an Filadelfia. Si anioo en taar Si Le'nas, Si Wutul, Si makakulu ing kukusi' i Daud. Sa em papalen winukaan-Nao, ra'ica wana e ro'na malen. Wo sa kinusi'an-Nao, ra'ica wana e ro'na muka'.

⁸ Kailekan-Ku waya e niéma' miow. Winukaan-Kuo em papalen torona miow wo ra'ica wana e ro'na malen. Kailekan-Ku ka'i sapaoka eng kaketeran iow wayake' im pira, taan kiniitano miow en sususuien-Ku wo ra'ica sumangkal i ngaran-Ku.

⁹ Séréno! Pira-piraan tou asé jamaat i kikiiten é sétang, sé matuul in owak éra tou Yahudi, taan en ulitna ra'ica taniitu, séra itu kotowo. Émaan-Ku oka séra itu mai wo kumundu an dior ing kécéi miow, wo kakailekan oka éra sapaoka kamu icaupus-Ku.

¹⁰ Kiniitano miow em peré-perénta-Ku ang karapi in talesen. Ampa'paan in itu loindongen-Ku oka kamu asi oras im pangepé'an si maai oka ang kayo'baan e mangepé' iséra sé maento' ang kayo'baan.

¹¹ Ra'io uré ka'i Yaku maai! Téirano sumama-sama' sapa sé anu miow, wosama' ra'ica wana tou e rumombit i mahkota miow.

¹² Si séi e muntung, émaan-Ku oka sia mamuali totombol am Balé Le'nas i Amang Kasuruan-Ku, wo sia mento' oka am bitu akar ing kauré-uré. Ipatic-Ku oka ka'i ai sia e ngaran i Amang Kasuruan-Ku, e ngaran ing kota i Amang Kasuruan-Ku Yerusalem weru. Wo eng kota itu itumpa oka mai i Amang Kasuruan an sorga owo. Wo ipatic-Ku oka ai sia e ngaran weru-Ku.

¹³ Si séi si makalunteng, aweso taré linganna sapa en aicua i Roh a sé jamaat.”

En taar a si jamaat an Laodikia

¹⁴ “Ipatico mio' ka'i a si malaékat si mengatéir in jamaat an Laodikia. Si anioo en taar asi Ulit owo, Sairi le'tek wo wutul, palemboian im pakasa sé niéma' i Amang Kasuruan:

¹⁵ Kailekan-Ku waya e niéma' miow. Kamu ra'ica uting wo ra'ica paso', lébé loor sisiren iow uting kuma'pa paso'.

¹⁶ Anaé, ampa'paan kamu lao-lao, wo ra'ica uting kuma'pa paso', ipelua'-Ku oka kamu am ba'ba'-Ku owo.

¹⁷ Aicua miow, ‘Kami anio' tou imasiya'o wo sapa-sapake' awéano ai cami, ra'ica wana e maina' ai cami,’ taan ra'ica kailekan iow en ulitna kamu itu tou sumusa-susa wo kawendun oka mai, lengéi, wola wo metangkol.

¹⁸ Ampa'paan in ituo, sina'uen-Ku kamu en tumeles mas a Yaku, si matuléno in api, wosama' kamu masiya'. Tumeleso karai kulo' a Yaku wosama' pakén iow wo ra'ica malawi' sérén é tou metangkol. Wo tumeleso solo eng kisu am beren wosama' kamu ro'na suméré.

¹⁹ Sé tou sé icaupus-Ku, sérao sé romaan-Ku wo samboken-Ku. Ampa'paan in itu maincaya'o mangé sumawel wo mape'diso.

²⁰ Séréno! Yaku makatulung an dior im papalen wo tuméngkor. Sa awéan tou luminga in suara-Ku wo muka' im papalen, muntep oka Aku meta'up wo isia, wo kuman mewali-wali wo isia, wo sia kuman mewali-wali wo Yaku.

²¹ Si tou muntung ilukut-Ku oka sia ang karapi-Ku asi palukutan pasiri-siriin-Ku, meputé wo Yaku si muntungo wo lumukut mewali-wali wo si Amang-Ku asi palukutan pasiri-siriin-Na.

²² Si séi si makalunteng, aweso taré sia lumi- nga sapa en aicua i Roh a sé jamaat.”