Wahyu 15 - En Taar Weru a nunuwu' é Tontemboan

Eng kakantaren éra sé imuntung

¹ Wo kaséréanku an langit awéan tuus walina si wangko' wo kakaya'kaan. Awéan pitu malaékat sé maali-ali im pitu kawangkuran sosomoi. Sa sé pitu kawangkuran itu icumawuso, eng kae'bowan i Amang Kasuruan ka'i icumawuso.

² Wo kaséréanku tanu awéan ta'sic kaca si kinemu in api. Wo awéan sé tou makatulung an tembir in ta'sic kaca itu. Séra itu sé tou imuntung asi binatang kataré, sé ra'ica mengakuru en sumiri' im patongna, wo ra'ica tumerima i nomor asi ngaran i binatang itu. Séra itu si esa wo si esa makatimboi esa kecapi aiwéé i Amang Kasuruan.

³ Séra makantar ing kakantaren i Musa si ata i Amang Kasuruan wo kakantaren i Toyaang i Domba. Eng kakantaren itu tana'i, “O Amang Kasuruan Si Makakawasa, uli-ulit wangko' wo kakaya'kaan pakasa sé niéma'-Mu! O Kolano pakasa im bangsa. Pakasa sé niéma'-Mu uli-ulit ra'ica marapit wo wutul.

⁴ Si séi réén si ra'ica maindé' ai Co, o Kasuruan? Si séi réén si ra'ica rumayo i ngaran-Mu? Ampa'paan wayake' Ico si le'nas. Pakasa im bangsa mai oka kumuru en sumiri' ai Co, ampa'paan sinéré érao em pakaakim-Mu waya wutul.”

Sé pitu malaékat wo sé pitu paelepan kae'bowan i Amang Kasuruan

⁵ Wo kaséréanku ka'i em Balé Le'nas an sorga mawuka', siituo en Ténda Kasairian.

⁶ Wo sé pitu malaékat maali-ali sé pitu kawangkuran icumesot asi Walé Le'nas. Séra mekarai ing kulo' weresi masélap, an da'dak éra pakalilitan in salémpang a mas owo.

⁷ Wo esaan asé epat mahluk itu méé mekélé esa paelepan mas a sé pitu malaékat. Sé pitu paelepan itu wuta in anggor kae'bowan i Amang Kasuruan si menonou akar ing kauré-uré.

⁸ Wo em Balé Le'nas imawutao in tembur ampa'paan ing kawangko'-Na wo ing kakawasaan-Na. Wo ra'ica wana esaan ka'i tou e ro'na muntep am Balé Le'nas itu, sa sé pitu kawangkuran sé paali-alin é pitu malaékat itu ra'ipé' icumawus.