Wahyu 13 - En Taar Weru a nunuwu' é Tontemboan

Esa binatang si cumesotai an ta'sic owo

¹ Wo sérénku awéan esa binatang icumesotai an untep in ta'sic owo, sia makaro'kos pitu wo makasungé sangapulu'. An tempok é sungé itu awéan sangapulu' mahkota. Wo an do'kos i binatang itu pinatican i ngara-ngaran é maojat si Amang Kasuruan.

² Si binatang sinéréku itu, en owakna puté wo in owak i macan tutul, eng kécéina puté wo ing kécéi i beruang, em ba'ba'na puté wo im ba'ba' i singa. Wo iwéé i naga eng kaketeranna itu, em palukutan pasiri-siriinna wo eng kawasana wangko' a si binatang itu.

³ Wo esaan asé ro'kos i binatang itu kaséréan awéan kalat im péla' si misioka makawali sia am papaté. Taan em péla' itu imasama'o. Pakasa en tou ang kayo'baan mangaya-ngaya'ka' wo kiiten éra si binatang itu.

⁴ Séra kumuru en sumiri' a si naga itu ampa'paan eng kawasana aiwéénao a si binatang itu. Wo séra kumuru en sumiri' a si binatang itu wo kumua,“Ra'ica wana binatang kaputé i binatang itu. Wo ra'ica wana e makawoo sumundur sia.”

⁵ Asi binatang itu winéan wa'ba' si wuta ing katirayoan wo mengaojat. Wo sia winéano ka'i kawasa e méma' ing kasalé'- anna epat ngapulu' rua ngaserap eng kauréna.

⁶ Wo sia muka' im ba'ba'na e mojat si Amang Kasuruan wo i ngaran-Na, em paento'- an-Na an sorga, wo pakasa sé maento' an sorga.

⁷ Sia ka'i winéan kawasa e merang sé tou le'nas wo kumala iséra. Sia ka'i winéan kawasa e merénta am pakasa in suku, am pakasa i negara, am pakasa i nunuwu' wo pakasa im bangsa.

⁸ Pakasa é tou sé menonou ang kayo'baan kumuru en sumiri' oka a si binatang itu. Sérao sé tou tumo'tolke' mai eng kayo'baan anio' niéma' e ngaran éra ra'ica aipatic ang kitap ing katouan i Toyaang i Domba si pinatéo.

⁹ Si séi si makalunteng, aweso taré sia luminga in abar anio',

¹⁰ “Si séi si aitantuo e mamuali tawanan, sia mamuali oka tawa- nan. Si séi si aitantuo patén in sa'bel sia patén oka in sa'bel.” Ampa'paan in ituo sé tou le'nas musti talesen wo le'tek maéman mandé meta'up ing kawenduan.

Si binatang si cumesotai an untep in tana'

¹¹ Wo kaséréanku si esa binatang walina si cumesotai an untep in tana' owo. Si binatang itu makasungé rua kaputé i ana' i domba wo maroma' tanu si naga.

¹² Wo pakasa eng kawasa si aiwéé i binatang kataré ai sia, pinakéna en itu an dior i binatang kataré wosama' pakasa in tou sé menonou ang kayo'baan kumuru en sumiri' a si binatang kataré itu. Siao si binatang si masama'o em péla'na si misioka makawali sia am papaté.

¹³ Si binatang karua ka'i méma' in tuu-tuus wangko'. Wo an dior waya é tou émaanna en api an langit tumumpa mai ang kayo'baan.

¹⁴ Wo ampa'paan in tuu-tuus sé niéma'nao an dior i binatang kataré itu, sé tou ang kayo'baan anio' aisélé'kowna. Iru'du'na séra méma' im patong eng giona tanu si binatang kataré, si pinéla'o in sa'bel taan menonouke'.

¹⁵ Wo si binatang karua itu ka'i tumerima ing kawasa e méma' im patong i binatang kataré itu menonou, akar em patong itu ro'na rumoma' wo maté pakasa in tou sé ra'ica kumuru en sumiri' a si patong itu.

¹⁶ Wo pakasa in tou tumo'tolai asé tou sé ra'ica pengasiriin kuma'pa sé tou pengasiriin, sé tou lengéi kuma'pa sé tou siya', sé ata kuma'pa sé tou ra'ica pakakawasan é tou walina leséén i binatang karua itu wosama' wéan tuus ang kama kakan kuma'pa an tuintung éra.

¹⁷ Ra'ica wana tou e ro'na tumeles kuma'pa mangkér in sapa-sapake' sa sia ra'- ica wana tuus. Si tuus ituo e ngaran i binatang kataré kuma'pa nomor i ngaranna.

¹⁸ Si penting am bia'i en tou musti awéan kapinteran asi Amang Kasuruan owo. Sé tou sé awéan kapinteran ro'na rumékén i nomor i binatang itu, ampa'paan e nomor itu nomor i esa tou. Wo e nomor itu enem ngaatus enem ngapulu' enem.