Wahyu 12 - En Taar Weru a nunuwu' é Tontemboan

Si esa wéwéné wo si esa naga

¹ Kekawus in itu, kaséréano an langit awéan tuus wangko'. Awéan esa wéwéné en owakna pakasaputen i yéndo wo eng kécéi aiweta'na am bawo i serap. Wo en do'kosna pinakéan i mahkota si niéma' asé sangapulu' rua sumesendot.

² Sia maowa-owak, wo an témponao i makéré toyaang. Ampa'paan in ituo sia mengangko-ngangko' ing kasakitan.

³ Wo mapaturu' mai ka'i esa tuus walina an langit. Wo séréno si esa naga wangker kliur réindang. Sia itu makaro'kos pitu wo awéan sangapulu' sungé. An do'kos si esa wo si esa awéan mahkota.

⁴ Wo en ipusna méso' sé sangapetelu sumesendot an langit wo iténdélna ang kayo'baan. Si naga itu tumulung an dior i wéwéné si tawio makéré toyaang en lumo'mot si toyaangna, sa si toyaang itu tumou.

⁵ Wo si wéwéné itu makéré esa Toyaang tuama si merénta oka im pakasa im bangsa maké im beka' bési. Tumarépé'anke' si Toyaang itu andéten i esa malaékat wo uwitenna mangé a si Amang Kasuruan am palukutan pasiri-siriin-Na.

⁶ Wo si wéwéné itu tumincas angé an tana' kapayasan, asi esa tampa si aitu'tulo i Amang Kasuruan ai sia. Am bitu sia paliaran oka sangariwu rua ngaatus enem ngapulu' ngando eng kauréna.

Si naga makalao

⁷ Kekawus in itu mamualio mai em perang an sorga. Si Mikhael wo sé malaékatna maperang sumundur si naga itu, wo si naga itu tinawang é malaékatna.

⁸ Taan si naga wo sé malaékatna makala i merang, akar séra ra'io ka'i makéré paento'an an sorga.

⁹ Si naga wangker ituo si ula' matu'a, si patuulen kikiiten é sétang kuma'pa Roh léwo', si mengasélé'kow pakasa in tou ang kayo'baan. Sia itu aiténdél ang kayo'baan mewali-wali wo sé malaékatna.

Eng kakantaren an sorga

¹⁰ Wo kalingaanku en suara taangko' keli an sorga owo makua in tana'i, “Intarépé' imayo eng kalowiran asi Amang Kasuruan wo Sia tumuru' ing kawasa-Na wo merénta tanu Kolanota. Wo ka'i en témpona i Kristus si sinisir-Na tumuru' ing kakawasaan-Na. Ampa'paan si kikiiten é sétang aiténdélo ang kayo'baan, sia itu si menudu-nudu sé poo-poowta an esa paémanen endo wo em bengi an dior i Amang Kasuruan.

¹¹ Wo sé poo-poowta an esa paémanen itu kumala sia ang karapi in enda' i Toyaang i Domba wo ampa'paan sé nunuwu' ing kasairian éra. Séra ra'io mengaupus in owak éra in esa mandé ka'i meta'up im papaté.

¹² Ampa'paan in ituo éi sorga wo kamu im baya sé maento' an untepna maaru-aruio, éi camu sé ang katanaan wo sé an ta'sic icawangkuro! Ampa'paan kailekano i kikiiten é sétang sapaoka en témpona tawio maka'pu, wo tumumpao mai sia ai camu ang karapi i mae'bow keli.”

Si wéwéné pinaangit i naga

¹³ Wo an tutuw kailekano i naga sapaoka sia aiténdélo ang kayo'baan, paangitennao si wéwéné si tumou si Toyaang tuama itu.

¹⁴ Taan awéan e méé rua tétéléw wangker i rajawali a si wéwéné itu, wosama' sia ro'na tuméléw angé an tampana an tana' kapayasan tumayang asi naga. Am bitu sia piniara tayang asi tampa i yula' itu eng kauréna telu ngata'un enem ngaserap.

¹⁵ Wo ireput i naga en dano am ba'ba'na a si wéwéné itu tanu- oka in dano in doyongan, wosama' sia royong in doyongan itu.

¹⁶ Taan si wéwéné itu tinawang ing katanaan. Wo inganga ing katanaan em ba'ba'na en lumo'mot in dano in doyongan si aireputai i naga itu.

¹⁷ Wo si wéwéné itu cae'bow i naga, wo mangé serangenna sé taranak walina i wéwéné itu. Séra ituo sé tou makiit in ukum-ukum i Amang Kasuruan wo mawéé ing ka- sairian andumoro' si Yesus.

¹⁸ Wo si naga itu tumulung an tembir in ta'sic.