Titus 3 - En Taar Weru a nunuwu' é Tontemboan

Em peri wutul é tou maéman a si Yesus Kristus

¹ Éi Titus, ita'néimu mangé a sé tou maéman am pakasa in jamaat wosama' séra mengalinga wo mengaéma' sapa sé airu'du' é maperénta wo sé makakawasa i negara. Séra musti le'tek maéma' in loor a sé tou walina.

² Musti ita'néimu mangé ai séra, ra'ica toro mengawuruk i ngaran é tou walina wo ra'ica toro meindo-indoan roma'. Aweso taré em peri éra musti loor wo ka'i ko'kos en até a sé im pakasa in tou.

³ Kailekanmu é Titus, indior kita ra'ipé' makailek sapa-sapa. Ampa'paan in itu kita ra'ica le'tek a si Amang Kasuruan, icasélé'kow wo kinatawéranke' mengaéma' in léwo', kita mamuali ata ing kasalé'an ing kayo'baan si asalo maarui in owak in esa, kita menonou mengéma-ngéma'ke' in léwo', kokanat a sé tou walina, bengis, mengkasuutan asi esa wo sé walina.

⁴ Taan intarépé', aituru'o i Amang Kasuruan si Lumolowirta eng kasamaan-Na wo eng kaupusan-Na a sé pakasa in tou.

⁵ An tutuw itu Sia lumowiro icita, en itu ra'ica ampa'paan kita mengaéma' im butul an dior-Na taan ampa'paan aituru'-Nao eng kaupusan-Na ai cita. Weresin-Na eng kamesé-meséaanta wo pakén-Na e Roh Le'nas e méma' ing katouanta maweru. En itu meputé kita tumou sumawel.

⁶ Sia ka'i mééo mai i Roh-Na ai cita ang karapi i mawuta-wuta maké si Yesus Kristus si Lumolowirta. E Roh ituo e meresi ing kamesé-meséaanta.

⁷ Aitambér-Nao mai en upus-Na wosama' kita anggapen-Na wutul an dior-Na wo ro'na makéré ing katouan akar ing kauré-uré, kiit im paara-arapenta.

⁸ Pakasa e nunuwu' sé aicuaku anio' wutul wo loor wo awéan torona a sé pakasa in tou. Icasalé'ku icuamu waya en sususuien itu a sé tou maéman a si Amang Kasuruan wosama' séra uli-ulit rumaméji tumawoi loor.

⁹ Wo ko ra'ica toro mapaar im papaaren sé ra'ica wana torona wo andumoro' in sisisilen taranak é apo-apo' miow, ra'ica toro meindo-indoan roma'. Wo ko ka'i ra'ica toro meréndéran andumoro' in ukum Torat. Ampa'paan pakasa en itu ra'ica wana torona wo uli-ulit ra'ica wana torona.

¹⁰ Musti ka'i romaanmu mangé si tou maéma' ing kapetanéan an jamaat. Sa makaruao sina'uenmu sia wo ra'ica kiimna luminga, tioo ko mekarapi wo isia.

¹¹ Ampa'paan kailekanmu, sa si tou mawerot tanu siitu sia icasélé'kowo. Wo eng kamesé-meséaannao in esa en tumuru' sapaoka sia meséa' wo eng kamesé-meséaan ituo e mukum in owakna in esa.

Eng Kumusi' in surat i Paulus

¹² Éi Titus, iru'du'ku oka si Artemas kuma'pa si Tikhikus maangé ai co. Sa sia icateka'o mangé, rumaméjio ko mario-riorai a yaku ang kota Nikopolis. Ampa'paan pinusé'kuo e mento' am bitu akarke' in oras ing kautingan.

¹³ Wo an tutuw si Zenas si makailek wutul in ukum Torat wo si Apolos karapina tu'tulo lumala'us im bawayaan éra, tawangeno mangé séra ang karapi in loor wosama' sapa em paperlun éra am bawayaan éra itu ra'ica kainaan sapa-sapa.

¹⁴ Wo sé touta maémano, musti rumaméji maéma' in tawoien loor wosama' ro'na tumawang sé tou walina e makéré ing kaperluan éra mengendo-ngendo. Wo in taniitu eng katouan éra awéan en torona.

¹⁵ Éi Titus, pakasa in tou sé mewali-wali wo yaku am bia'i méé in siri' ai co. Wo icua ka'i mio' en siri'ku a sé kara-karapita esa paémanen sé mengaupus icita. Pangilekenku, itambérai i Casuruan en upus-Na ai camu im baya.