Titus 2 - En Taar Weru a nunuwu' é Tontemboan

En sususuien wutul patuuran ing katouan

¹ Taan ko é Titus, tioo ko meputé wo iséra! Musti susuianmu sé tou kumiit in sususuien wutul.

² Sina'uenmu mangé sé tuama matu'a wosama' makawoo tumang in owak, makaperi loor akar pasiriin é tou, mapaké ing kapinteran asi Casuruan owo, tatapke' maéman a si Casuruan, mengaupus sé kakélé tou wo talesen mengasaru ing kawenduan.

³ Taniitu ka'i sé wéwéné matu'ao, sina'uenmu mangé séra wosama' musti mengaapo' kumiit ing kasalé'an i Casuruan. Séra ka'i ra'ica toro mengawuruk i ngaran é tou wo ra'ica tansaléén in elepen mengalangu. Aweso taré séra itu mengasusui angé sé loor a sé tou.

⁴ Wo in taniitu séra ro'na sumusui a sé inang-inang sé wo'basé' wosama' séra mengaupus sé penanaan éra wo sé toyaang éra.

⁵ Wo ka'i pasusuian angé sé inang-inang wo'bas itu wosama' menonou maké ing kapinteran asi Casuruan owo, menonou le'nas an dior i Casuruan, re'dem maelur im pamalé, loor en até wo le'tek a si penanaanna. Sa séra mengaéma' in taniitu, en Taar i Amang Kasuruan ra'ica ojaten é tou.

⁶ Taniitu ka'i wo sé mangalitou, sina'uen angé séra wosama' makakawoo tuméir in owak am baya-waya.

⁷ Wo ko é Titus, em perimu musti mengaéma' in loor wosama' ko ro'na mamuali paandéan é tou. Sa ko sumusui, mengasusui angé ang karapi i makakii-kiit wo rondor en até.

⁸ An tutuw ko masusui, musti pakénmu sé nunuwu' wutul wo sumoma wosama' ko ra'ica iséro' é tou. Wo in taniitu sé kaséké'mu malawi', ampa'paan ra'ica wana en andumoro' sé ra'ica loor ai cita sé ro'na ipemaa-maar oka éra.

⁹ Musti sina'uenmu ka'i sé ata wosama' séra le'tek a sé tuang éra am baya-waya wo marui in até i tuang éra wo ra'ica toro masangkal a si tuang éra.

¹⁰ Séra ka'i ra'ica toro marombit in anu é tou. Aweso taré ituru' éra mangé a si tuang éra sapaoka en até éra wutu-wutul weresi wo le'tek, wo in taniitu séra ro'na percayan i tuang éra. Sa émaan éra tanu siitu, en sususuien i Amang Kasuruan, si Lumolowirta, irayo oka é tou walina.

¹¹ Ampa'paan si Amang Kasuruan itumambéro mai in upus-Na en lumowir waya sé tou.

¹² Wo en upus aitambér-Na itu ka'i en sumusui ai cita wosama' tioo menonou ra'ica maindé' a si Casuruan wo tioo makiit ing kasalé'an ing kayo'baan. En upus aitambér-Na itu isumusui ai cita e makawoo tumang in owak, menonou ra'ica marapit wo maapo' kumiit ing kasalé'an-Na ang kayo'baan ya'sa.

¹³ Émaanta waya en itu ang karoro'anta mengento-ngento'pé' wo maarap in endo i Casuruan maai sumawel. Sia itu si Amang Kasuruan mangko-wangko', Siao si Yesus Kristus si Lumolowirta. Sia maai wuta i rarayo wo in sisiri' wo maali mai ing kamang ai cita im baya.

¹⁴ Aiwéé-Nao en owak-Na mamuali raragés en tumu'bus waya ing kaléwo-léwo'anta wo émaan-Na kita mamuali tou-Na le'nas wo re'dem mengaéma' in loor.

¹⁵ Éi Titus, musti isusuimu waya en itu a sé tou maéman. Sina'uen angé séra wosama' émaan éra waya en itu wo romaanmu sé tou mengaéma' ing kaséaan. An tutuw ko mengasusui, mengasina'u wo mengaroma', émaanmu waya en itu maké ing kawasa i Casuruan wosama' ko pasiri-siriin wo pengalingan é tou. Tioo iwayamu sé tou maepes im beren ai co.